2 Kurintu 12

Pablu Nafoyung at Taginfanan at Masuwad

1Kaumsig akyangay nanfalabi nanfoyung sa ayu ku fagbulun at masine, dewa yud e fanambagun sa angku. Ay katsi lumong aw sa ayu tam Fun at nafoyung ay at nafalag sa angku. 2-3Labi ufat banwa wan at kinlangfe, gina e naurug angku sas fatuluk langkub banwa. Ginanya, gafanud kwan sa tam Fun Isus. Ay kwa gsaful fiya fiya te, go ku bilug wan, ay go falad way. Diyus way at nasaful. 4Ku nasaful anway te, indasug aw sas Diyus at fagbanwanan. Ay sanya nadungug aw sik ngay longan yud e mafafayamag at masuwad, ay wa masine gfoyung nus nga sinu. 5Ku faglabiun ku ngay nadalan takatanya. Ay nu sa way ku balyu baliwa, kwe faglabiun dasday sa ku kafanaloan. 6Ay dewa aw mafafoyung sa ayu ku ngay nadalan takatanya, dakdi kata sik yud mamatanganan fag taw, anway matuyan tuwa ku longan. Ay dewa katanya, dakwa gfoyung ayu, laman tibak taw nu gfansulup sa angku baliwa di mason, glabi sa at nalag sa ku leleganan.

7Ay dewa katanya, laman dakdi gfalabi ku fagbulun sas Diyus at nafalag sa angku fag ngay maylatan, Diyus nafatsi angku sik daylan, ay nafabayan angku sas Satanas laman gfatakan ay dakdi gfalabi. 8Tulu ginan aw gdarangin sa tam Fun te, “Fafiyai ku daylan.” 9Ay kanya nabalus angku te, “Insak wan ku famanyun sa emu, anway ku fagmadaragangun umsure wa fiya sa at mafanalo fag taw.” Ay nu katanya, guseganan aw gfoyung ku fagmafanaloun, laman tam Fun Isus at fagmadaragangun gamatang aktuwa gugat. 10Ay dewa katanya, guseganan aktuwa dewa aw mafanalo, ay gafalingunan, ay gatakan, ay gafaurianan anway sa tam Fun Isus. Anway nus nga seduge nu mafanalo aw, ginanya nu gfabitsug angku.

Pablu e Fagafanawaun sas Taw Kurintu

11Kata akway sik yud mamatanganan fag taw nu gfalabi aw, ay roro am yay at nafabulun angku laman gfalabi aw. Satu nangus fauseganani tuwa angku sanya fag ngay taw tagfalukanan te, sik Nasugu unu fag ngay taw, ay roro wam nafagbulun katanya. Dewa aw nasaful te, nu aw way mandi kwe faglabiun, ay roro dakwa gaguyanan sanya fag ngay taw at masafulan unu fag ngay Nasugu. 12Nafatuyan aw sa ayu te, sik matuyan aw fag Nasugu sa ku nafalag at madulawan ay at madaragang fag ngay fagbulun. 13Nus nga setain ku nafagbulun sa tibak bale fakafulan, katanya yangay ku nafagbulun sanya sa ayu, dasday sa ku yud naetan fanarabangun sanya sa ayu. Nu si ayu nu sik asalanan way, falyami tuwa ku nasalan sa ayu.

14Katsi at fatulu ginan ban nu mdasug aw sa ayu. Ay kata yangay ebi, dakdi ban get tarabang sa ayu, anway am way ku naumsigan, bunwa ay fagekwaun. Kata am sik ngay sisiyan. At ngay magurang way tagfaful at fon sat ngay sisiyan, bundi at sisiyan tagfaful laman at magurang e kwa ban. 15Guseganan aw dawdaw gfagbulun ay gfon ku fagmabitsugun sa ayu. Taw manga ay fagyudun fiya fiya kesug angku, ay katvngvd wanya nu kesug aw ayu? 16Nasaful wam te, dakdi batang e naet siginan ayu. Ay dewa katanya, tibak taw sanya e glong yay te, nafalukanan aw sa tibak balyavtan. 17Ay roro setain nu gfanluk aw ayu? Nasaful wam te, dakwa nafanluk ayu dewa aw nasugu tam ngay fadugsay sanya. 18Ebi matvngvd nu glong aw sas Titu laman nanlag ayu, ay nasugu akyangay tam fadugsay at sadi laman nangufud anya. Ay go Titu gfanluk way ayu gina ndasug sanya? Igdi! Teway sadi wayk Masine fag Falad em fagfaningun, ay sadi yangay em fasadanan.

19Ay go ginanya gamatangan am te, nanfoyung ami te, masine em fagbulun fagayu? Yaya. Gfoyung tuwami Diyus at fagmasineun, bilang sik ngay tagafanud. Em fakesugun, glong ami ayu te, fagayu em fagbulun gfatvngvd tuwa ay fagafanudun. 20Ay gafanawa aw te, labon nu ndasug aw sanya, lumag aw ay fagbulun saman sa ku fagsegun fag fagbulun, ay saman yangay sa ay fagsegun fag fagbulun. Ay labon manga e garingangan yay, ay e gadgalabianan, ay e kadotama tiba, ay e gfangesug, ay e kamuwagan sa tiba baliwa, ay e gibugan sa tiba baliwa, ay e gfalabi at fagbulun, ay e gfabadbaboan sa tiba. 21Ay gafanawa aw te, labon gina ban aw mdasug sanya sa ayu, Diyus mafaplan ban angku si ay akbang. Ay nu katanya, umbalu aw anway ngayu si ayu at ke nasalan, ay anggan katsi wam naubun at fagmafuratun, ay at fakamayunun, ay tagfaning sat bilug at fagalabianun.

Currently Selected:

2 Kurintu 12: TAWEAST

Highlight

Copy

Compare