2 Kurintu 11

Pablu ay At Yud Matuyan fag ngay Nasugu

1Lag am gamatangan, dewa kata sik yud mamatanganan fag taw nu gelongan aw. 2Gafanawa aw kata Diyus nu gafanawa ayu, anway kata am sik fasad mangena ku nafatuyan sa sik mangama, we tiba nu bunway tam Fun Isus. 3Ay gamatangan aw gugat te, labon malukan am sa ay amatanganan, kata ebi ka fag ubyanun nu gfanluk Eba, ay manyayu am sat matuyan ay masine fag fagafanudun sa tam Fun Isus. 4Anway mafali nu gafanud am sa takadasug sa ayu fag ngay tagfoyung at yud kata em foyungan sa ayu fag Isus. Ay inkumsig yangay am tibak falad anggan at foyungan at yud kata em foyungan.

5Ay nu gamatangan aw, kwa naguyanan sa sangay tagelongan te, kanya at madaragang fag ngay Nasugu. 6Labon nu glag am angku, kwa gsaful gelongan, ay roro ku fagsafulun sas fagmatuyanun kasakan tuwa. Ay nafalag ami sa ayu takatanya em foyungan fagayu.

7Nu gfoyung aw at Masine fag Barita siginans Diyus, dakwa get fansali sa ayu. Nafababaun aktuwa laman umtvngvd am. Go asalanan way ku nafagbulun katanya? 8Ay ebi gina aw gfoyung ayu, tibak tagafanud way tagfon angku ku ngay fagayudanun. Kata kway kamul at fagekwaun laman gumubuk aw ayu. 9Ay kaduge aw sanya dewa namin ku fagayudanun, dakdi e nafatakan nus di sadik taw sanya. Anway tam ngay fadugsay siginans talun Masidunya nafon tuwa angku ku fagayudanun. Ay nu katanya, gsaruy aw nu mfanlonganan am siginan angku, ay katanya ban gugat ku fagbulun. 10Ay kaduge tam Fun Isus at fagmatuyanun si angku, dewa nus nganday sis talun Akaya kwa mtuwas nu guseganan aw te, dakdi nsik fanlonganan sa ayu. 11Taw ro ku fagfagbulunun katanya? Go katanya dakwa kesug ayu? Diyus nasaful wa te, kesug aktuwa ayu.

12Ay gfatunglus aktuwa katanya ku ugali, laman tagfalabi at fagbulun taglong te, em ugali kata yangay Pablu at ugali nu gfoyung. 13Ka fag ngay taw at yud way matuyan fag ngay Nasugu. Ay igfanluk way te, tam Fun Isus yangay at ngay Nasugu. 14Ay wa tam gadulawan nu nadungug tam at fagbulun, anway anggan Satanas gfanluk yangay te, “Aw at mayamag fag tagfabarita.” 15Ay nu katanya, wa tam gadulawan Satanas ngay fanuguwan nu gfalukanan te, “Ami wan fagmatuyanun at fanuguwan.” Ay roro sik menit faurianan ban ka fag ngay taw anway sat ngay nafagbulun.

Pablu at Nadalan fag ngay Mataka

16Gdog kyay glong sa ayu te, lag gayup te, dakwa mamatanganan. Ay roro nu katanya wan ay amatanganan, masine way sa angku, laman anggan aw mafafandaragang aktuwa kata sik taw at yud mamatanganan. 17Nu tengap, nu gfandaragang kway bunwa siginan tam Fun, ay kata kway sik taw yud e mamatanganan. 18Teway ngayuk tagfandaragang at fagbulun ste swa daga, anggan aw, gfandaragang akyangay sa ku fagbulun at masine. 19Ay glong am te, e fagsafulun tuwam, ay roro gfaning way am ka fag ngay taw at yud mamatanganan. 20At matuyan, gfabayan way am nu gfanuguwanan ayu, ay nu gbilug ay ngay nanuranan, ay gfanluk ayu, ay gelongan malimata sa ayu, ay gfalang at daluwap sa ay fingi. 21Kapla aw gfoyung sa ayu te, wami kata ka fag ngay taw. Ay roro ngap, sik taw nu gfalabi way, mafafalabi kyangay gelongan kata at yud mamatanganan fag taw.

22Go kanya fag ngay taw gfalabi te, sik taw Ebriyu ay sik taw Israel katap sas Abrayam at kadagdagan? Anggan aw, sik taw Ebriyu aw ay sik taw Israel, ay siginan kyangay Abrayam at kadagdagan. 23Ay go kanya fag ngay taw tam Fun Isus at fanuguwan? Aw, tam Fun Isus kyangay at fanuguwan, ay glabi kyay ka fag ngay taw, teway nasungatan aw glabi yay ka fag ngay taw. Ngayu ginan kwa kasungsung, ay gafalangan, ay gakateun. 24Ay lima ginan nu gagamatan aw, ay kayu ginan nagamat nafusfus angku 39 ginan siginan ku kaiban Udyu. 25Ay tulu ginan at famalang angku kayu. Ay sayginan at famalang angku batu. Ay tulu ginan karasras ku sakayan fag balutu gina sa sangaba dagat. Ay sik yabi ay sik menit nu si aba gurayo akway sa sangaba dagat. 26Ay sa ku ngay fagloan, nadalan aw ngay malimu sa sangay safa gina aw gdife, ay sa sangay takamate fag ngay taw, ay sa ku ngay kaiban Udyu, ay sa at yud Udyu, ay sa at ngay mafanawa sis fulan, ay anggan sas talun at yud e taw, ay sas dagat, ay sa sangay tagfalukanan te, gafanud. 27Ay matvngvd tuwa ku fagbulun. Gatakan akwadi. Ay ngayuk yabi nu gyud aw maatiyug. Ay kalunus ay kadanum akway. Ay ngayu ginan nu gyud aw e fakonun. Ay tiba ginan katis aw dawdaw ay wa kasakan ku falefe.

28Ay saman ku nadalan fagayu, kayu menit gamatangan kyay sas fagayu tagafanud. 29Nu e kalukme at fagafanudun, kabalu aw. Ay nu nke asalanan way gatakan aw gamatang.

30Nu gafoyungun kway ku fagbulun, ku fagfoyungun ku fagbulun way at mafanalo. 31Tam Diyus, tam Fun Isus at Tama, nasaful wa te, dakwa kamuwagan ku longan. Segi anya faggugat! 32Gina aw sis fulan Damasku, at gubernadur sanya sis fun Aretas at fagmagurangan, nafaulit sat ngay tagulit sakbawan laman gumamat angku. 33Ay roro ku ngay ufud nasuwad angku sa sik basad baliswa daul laman fadaga angku sas day fulan alad, ay inlagyu aw.

Currently Selected:

2 Kurintu 11: TAWEAST

Highlight

Copy

Compare