1 Timutiyu 5

At Masine fag Ugali sa at ngay Iba baliwa

1Lag gelongan mauri sa sik fufuwama. Fangkabat, fabitsugi tuwa at amatanganan katai nu am mama, ay sa sangay baguwama katai wa am ngay fadugsay. 2Ay sik fufuyna, fabitsugi tuwa at amatanganan katai nu am mina, ay sa sik diyaga katai wa nu am fadugsay. Ay malayuni tuwa sat masine am amatanganan faggugat.

At Ugali at Masine sa sik Burangday fag Mangena baliwa

3Afanyui tuwa sik burangday fag mangena at yud e fagsegun tagtarabang anya. 4Ay sik burangday nu e sisiyan yay ay nu e fufu yay, kanya yay tagtarabang anya. Anway nu katanya tuwa, kanya gfafoli at fagusegananun sa at magurang ay sas Diyus. Anway Diyus kaumsig tuwa katanya.

5Ay sik burangday tagsesadian ay we tagtarabang anya, kanya at fagsegun sas Diyus way fagsadi. Ay kayu menit ay yabi gdarangin ay get tarabang sas Diyus. 6Ay roro sik burangday at fagamatanganun nut sa way dawdaw at fakaumsigun mandi, kanya dewa gleleg, kata way nu sik matean.

7Foyungi wa fiya aro ku longan, laman at ngay burangday ay anggan at ngay sisiyan di e kalong at yud masine sa baliwa anya fagayu. 8Sik taw nu dway gtarabang at kalongan ay nu dway gtarabang anggan tagsi oma at bale, at fagbulun at masuwad te, wa gafanud. Ay ka fag taw glabi yay sat yud gafanud nu mauri.

9Ay ay fagtarabangun ngay burangday fag ngay mangena: at banwa 60 sat tungud baliwa, ay sadi tuwa at mangama ebi, 10ay e kafoyung tuwa te, masine tuwa at fagbulun, ay nafoyung at sisiyan siginan ngay alay laman masine faggugat at fagbulun, ay gfasakbo at ngay betaw, ay gtarabang sa sangay tagafanud, ay gtarabang sa sangay taw tagatarabangan, ay mafafaning tuwa nus nge wain fag fagbulun at masine.

11Ay ay fagyudun gtarabang, at yud kafufuyna fag ngay burangday. Anway nu kaumsig yay ban kadaduwa, mansaman at amatanganan at fatuyanan sa tam Fun Isus. 12Ay nu katanya way, nu gina wa gfasaman ebi ataw at fatuyanan sa tam Fun Isus, manke asalanan ban. 13Ay mannanad gfamomuyun ay gfangulan at lungud sat fasabale. Ay saman yay gfamomuyun gelongan way sat iba baliwa, ay gfayud way at iba, ay gelongan wan nus nga setaw at naumsigan. 14Ay fagalay ban katanya, gamatangan aw te, at masine at yud kafufuyna fag burangday, adaduwai yap laman e unga yay, ay igfatvngvdun yay fagayu tagsi at bale, laman at yud gafanud fag taw di e fagfalingunun antam nus nge wain. 15Ay at matuyan, e tibak burangday naubun wan at fagafanudun ay gfaning way Satanas at fakaumsigun.

16Sik tagafanud fag mangena nu e kalongan yay sik burangday, at masine kanyai wa fag mangena tagtarabang ka fag burangday, laman tibak tagafanud at fagtarabangun sa way tibak burangday at yud e gtarabang.

17Ay sa sik tagmagurang sa sangay tagafanud, nu maseganama tuwa nu gmagurang, masine nu gfon at nalufuyan. Ay glabi wan sa sik tagmagurang at maseganama nu gfoyung ay nu gfayamag Diyus at longan. 18Anway marirukan sis Diyus at longan te, “Lag am gbugsung ay baka dungus kaduge am igfarabas.” Ay marirukan yangay te, “Sik taw tagfagbulun, e foni wa fiya at nalufuyan.”#5:18 Diyuterunumyu 25:4.

19Lag gdungugan nu sadi wayk taw tagfoyung sik tagmagurang at asalanan, nu bunway duwa ay anggan tuluk taw at nadiyuganan nalag at fagbulun. 20Ay sa baliwa tagfatunglus gasalanan, bayai anya sa sangay tagafanud at buknga, laman fagayu tagafanud kalimu tuwa nu gfaning way katanya.

21Tam Diyus, ay tam Fun Isus, ay at ngay tagfabarita tagfatuyan nu glong aw sa emu te, faningi tuwa ste ku longan fagayu. Ay lag e filian taw. 22Ay lag gfanmafali nu gfatayuk o am daluwap sa sik taw at alfuyu laman sik tagmagurang sas bale fakafulan. Ay lag e afud siginan sik taw at asalanan. Tagaki tuwa laman am ugali malayun tuwa sat masine.

23Nu ginum o, dangay mamam fagtvngvd, inumi tuwa sirut fangaranug, laman di o kasait am ungdan ay di ginfolian am daylan tiba.

24Tibak taw at asalanan kasaful wan bagu nanfauri, ay at tibak taw at asalanan glugo yay nu kasaful. 25Ay katanya yangay tibak taw at masine fag fagbulun, mafali tuwa nu kasaful. Ay tibak taw at masine fag fagbulun glugo yay nu kasaful.

Currently Selected:

1 Timutiyu 5: TAWEAST

Highlight

Copy

Compare