1 Timutiyu 4

At Yud Matuyan fag Takamoyung

1At Masine fag Falad mayamag nu nafoyung te, sa bans fakatabuwan fag ngay menit, tibak taw mubun wa ban at fagafanudun. Ay at fagdunguganan ban sa ways tagfanluk fag ngay taw ay anggan sa sangay mafurat fag falad at foyungan. 2Ay ka fag foyungan siginan way takamuwagan ay tagfanluk fag ngay taw, at yud e naaplan ay mauri way mangaro at fagbulun. 3Ka fag ngay taw igsalag way tiba te, lag kadaduwa, ay lag kon tibak fakonun. Ay roro at matuyan, Diyus at fagnaawatun ka fag ngay fakonun, laman fagayu tagafanud ay tagsaful at matuyan oni tuwa ay useganani sas Diyus. 4Fagayu Diyus at naawat masine wan. Ay lag gamatangan te, mauri way. Buli ay useganani tuwa. 5Anway Diyus at longan ay tam darangin nafasine wan nus nge wain tam fagnangonun.

Fun Isus At ngay Fanuguwan at ke Ugali at Masine

6Nu nafoyung tuwo ku longan sa tam ngay fadugsay sanya, o wan tam Fun Isus at fanuguwan at matuyan. Ay am fagafanudun umkugat yay siginan at matuyan fag foyungan am fagfaningun.

7Lag gdungugan ste swa daga fag ngay fansulitan at yud e masuwad, fangkabat, fananadani tuwa emu nu gfaning sat matuyan. 8Masine tuwa nu gfananadan tam tam bilug laman mabitsug. Ay roro glabii yap nu gfananadan tam gfaning Diyus nus nge wain fag fagbulun, anway e fanambagun tuwa dewa ste swa daga, ay anggan e fanambagun yangay ban sas banwa.

9Matuyan wa fiya ka fag foyungan, ay fagayu taw afanudi wa fiya. 10Ay nu katanya, maasungatan tuwa tam katvngvd tam fagmabitsugun gfoyung sa sangay taw, anway tam fagsegun siginan tuwa tagleleg fag Diyus. Kanya tagfalangfe sas fagayu taw, glabi yay sa sangay tagafanud. 11Foyungi ay fagurungani kanya fagayu.

12Lag gafalingunan dewa o sik mabaguwama. Fangkabat, masinei tuwa am ugali laman sik fagulitan tuwo sa sangay tagafanud, dewa sam longan, ay sam ugali, ay sam fakafanyuun, ay sam fagafanudun, ay sam leleganan at masine. 13Ay yap ngay aw sanya, tapi Diyus at longan, ay foyungi ay fayamagi at masuwad sas fagayu taw. 14Lag gfabayan at Masine fag Falad nafon emu fag fagbulun. Ka fag fagbulun naguna nafoyung emu ebi gina ngay tagmagurang sa sangay tagafanud nafatayuk at daluwap sa am alfuyu ay nadarangin emu. 15Maseganamai ay fagbuluni tuwa fagayu fagbulun, laman lumag ban te, gfainkugatan tuwo. 16Maadani am ugali ay anggan am foyungan. Ay fatunglusi tuwa katanya am fagbulun, laman umlangfe tuwo ay anggan tagdungugan emu.

Currently Selected:

1 Timutiyu 4: TAWEAST

Highlight

Copy

Compare