1 Timutiyu 3
3
Katatuyi tuwa sik Taw nu Kaumsig Nanmagurang
1Matuyan tuy fag longan te, sik taw takaumsig nanmagurang sa sangay tagafanud, masine nu katanya at fasadan. 2Katatuyi sik tagmagurang at ugali: di gfagbulun sat mauri, ay sadi way at mangena, ay mamatanganan tuwa fagayu at gfagbulun, ay gsaful tuwa nu gfili at masine ay at mauri, ay di gfangadotama, ay masine fagdaul at ugali, ay igfasakbo tuwa at bagu kadasug fag taw, ay mafafoyung tuwa sa tibak taw. 3Ay di ginum fangaranug, ay di gfangaunat, malukme tuwa faggugat, ay di kamaringangan sa tiba, ay di kaumsig dawdaw gfaayu at singku. 4Ay gsaful tuwa gmagurang at talnayan, ay at ngay sisiyan gfaning tuwa ay gdungugan anya. 5Anway sik taw nu dway gsaful gmagurang at talnayan, tain ro nu mafamagurang nut sa wa ngap ro daws Diyus at ngay taw? 6Ay agi yap gfili sik tagmagurang nu bagu yay gafanud. Labon mafalabi at longan ay at fagbulun, ay manfauri kata Satanas. 7Ay ka fag tagmagurang masinei tuwa at fagbulun, laman at yud gafanud fag taw di e nalag at fagbulun mauri, ay di ban umgamat sas Satanas at fanggamat.
Ngay Tagtanud at Ugali
8Katatuy at masine tagtanud fag ngay mangama at ugali: matuyan tuwa, ay di gfanlamangan, ay di ginum fangaranug, ay di gyafaayuun at singku. 9Ay matvngvd tuwa nu gafanud sa at nafasure fag foyungan sa tam fagafanudun baliwa. 10Faskudi yap te, go matuyan tuwa at fagbulun. Ay nu gdi gfagbulun mauri, filii wa long anya laman ban ay tagtanud. 11Katatuy yangay tagtanud fag ngay mangena at ugali: matuyan tuwa, ay di glong mauri sa tiba baliwa, ay mamatanganan tuwa fagayu at fagbulun, ay faggugat mafanud tuwa fagayu at ugali.
12Ay tagtanud fag ngay mangama, sadi yakman at mangena ay gsaful tuwa gmagurang at talnayan. 13Anway sik tagtanud nu masine tuwa at fagbulun, tiba sumeg tuwa anya. Ay kanya maseganama tuwa nu gfoyung sa baliwa at fagafanudun sa tam Fun Isus.
Diyus At Fagsuksukun fag Longan at Matuyan
14Ku fakaumsigun te, laman di glugo nu mdasug aw sa emu. Dewa katanya, igriruk akyay sa emu katsi, labon lumugo akyay manga ste, 15ay nu dakyay umdasug, gsaful tuwo Diyus at ngay unga at ugali. At masuwad te, itam wan tagleleg fag Diyus at ngay taw, anway fagayu tagafanud tagfatvngvdun ay tagfoyung Diyus at matuyan fag longan. 16Intuyan watam te, matvngvd dawdaw at nafasure fag foyungan sa tam fagafanudun baliwa. Ay at foyungan at masuwad te:
Kanya naste swa daga, insik taw.
Ay at Masine fag Falad at nafatuyan te, kanya matuyan.
Ay at ngay tagfabarita nalag anya.
Ay e nafoyung at foyungan sas fagayu talun at ngay taw.
Ay ngayu at tagafanud sa anya ste swa daga.
Ay nafasakbo anya sas banwa.
Currently Selected:
1 Timutiyu 3: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
