1 Timutiyu 2

Katatuyi Tam Darangin sa Tam Diyus

1Taguna ku fagyalongun ayu, get aw te, darangini tuwa fagayu taw. Fadasugi sas Diyus ay ngay fagetun ay ay ngay fagusegananun laman sas fagayu taw. 2Darangini sa tam Diyus laman tam Diyus tumarabang ngay fun ay anggan at ke fagmadaragangun, laman manabayan tuwa fagdaul tam talun, kaduge tam gfaning tam Diyus, ay laman masine tuwa tam ugali sa tam iba. 3Masine tuwa katanya, tam Diyus tam Tagfalangfe kaumsig tuwa. 4Anway Diyus at fakaumsigun laman fagayu taw umlangfe tuwa ay sumaful at matuyan fag longan. 5Anway sadi way tam Diyus ay sadi way tam tagbuknga sas Diyus. Kanya wa fag taw, tam Fun Isus. 6Kanya nafon at leleg laman sas fagayu taw. Kanya wan tagfatuyan te, tam Diyus kaumsig gfalangfe fagayu gina sit kasakan fag lungud. 7Katanya at fagnafiliun angku sik Nasugu ay sik takamoyung, laman nanfoyung aw sa at yud Udyu fag ngay taw sa baliwas fagafanudun ay matuyan fag longan. Matuyan ku longan ay dakwa kamuwagan.

8Gina ngay tagafanud maful, kaumsig aw ngay mangama nu gdarangin faabati at take ay masine tuwa at amatanganan, ay di kadotama ay di garingangan.

9Ay anggan sa sangay mangena, nu gsulun at balukas, lingamani tuwa takasakan, laman masine tuwa nu kalag, ay kasakan yakman nu gfasineun at buk. Ay lag gsulun ayuwayu ngay dalag ay fanumyu ay at ngayu nu kasali fag balukas. 10Fangkabat falagani tuwa sat masine fag ngay fagbulun. Katanyai tuwa sik mangena tagfaning Diyus.

11Ay gina e gfoyung, masine sik mangena dungugani way fagtvngvd ay fababauni way. 12Ay kwa kaumsig sik mangena nu gfoyung ay nu nanlabi at mangama; masine nu maragangan way. 13Anway Diyus at naawat taguna sik mangama, at ngayan Adan. Ay fadogan at naawat sik mangena, at ngayan Eba. 14Ay bunwa at mangama at nalukan. At mangena way at nalukan, ay at yud nafaning Diyus. 15Dewa katanya, Diyus kafanyu tuwa sik mangena anway gfasalug tuwa sik ngenge, ay nu gfatunglus tuwa gafanud ay nu kafanyu tuwa at iba, ay nu malayun tuwa sat masine, ay anggan nu malukme tuwa at amatanganan.

Currently Selected:

1 Timutiyu 2: TAWEAST

Highlight

Copy

Compare