1 Tesalunika 2

Pablu at Fagbulun Ebi Gina Igfamoyung sis Fulan Tesalunika

1Em ngay fadugsay, nasaful wam te, em naloan sa ayu inke fanambagun tuwa, madyay gafanud tuwam em foyungan ayu. 2Ebi, gina ami kadasug sa ayu, siginan wamis fulan Filipus. Ay nasaful wam te, gina ami nafamoyung sanya fag fulan, e nafauri dawdaw emi si swa taw ayuwayu. Satu ro nanfaplan emi. Ay dewa katanya, gina ami indasug sa ayu, di ami inlimu igfoyung ayu at Masine fag Barita siginan tam Diyus. Dewa te, tibak taw anway kalimata dawdaw nu an ami kamoyung, nafamoyung yay ami. Di ami inlimu igfamoyung ayu, teway tam Diyus nafabitsug tuwa em amatanganan.

3-4Em faginkumsigun igfoyung Masine fag Barita, teway tam Diyus nafon tuwa emi kanya fag barita, laman nanfoyung ami. Bundi te, nu kamoyung ami, e suksukan way ami mauri, ate ro nanfasalan way ami at ngay taw amatanganan. Igdi. Em foyungan, antuwa tagtungul. Ay nu gfoyung ami sa sangay taw, em fasadan bundi te, nanfaumsiganan ami at ngay taw, laman at ngay taw ayuwayu kaumsig gdungugan emi. Antuwa te, kaumsig ami igfauseganan tam Diyus, teway kanya wan tagsaful tam ngay amatanganan, te go masine tuwa.

5Em ngay fadugsay, gina ami sanya si ayu, nu gelongan ami, matuyan tuwa. Nasaful wam te, di ami sigad gelongan at maumsig sa ayu fag ngay longan. Ay at sadi ya, di ami inke amatanganan te, roro nu an ami gfoyung sa ayu, kaumsig way ami nanfaayu em fagmabalanun. Yaya, Diyus nasaful wa te, bundi katanya em amatanganan.

6Ay anggan yangay te, gina ami sanya si ayu, di ami namatangan te, ani nangus fababauni sa emi. Dewa am ay dewas nga sinu fag taw, ani nangus fababauni sa emi. Di ami e amatanganan katanya. Nu katanya way ro em amatanganan, gasarapan tagfababaun sa emi, mafafagbulun way ro ami. Mafalong way ro ami te, “Fababauni sa emi, teway ami wan Diyus at filian fag ngay taw tagfadasug at Masine fag Barita sa sangay taw.” Ay roro, igdi, di ami nafagbulun katanya. 7Fangkabat kaduge ami sanya si ayu, gimalu tuwami ayu. Nu gimalu ami ayu, katvngvd yangay sik mangena nu gimalu at ngay sisiyan sirut. 8Ay katvngvdan nu kafanyu ami ayu, nafoyung tuwami ayu at Masine fag Barita. Ay at sadi, kaduge ami sanya maful ayu, mafonan wami sa ayu, teway at katvngvdan wa nu kafanyu ami ayu.

9Em ngay fadugsay, go namatang yay am ebi ay nalag em fagbulun? Nalag wam te, gfagbulunan tuwami. Gfangenitan yangay ami. Dewas wa menit ay dewa sad yabi, gfagbulunan tuwami. Ay em fagnafagbulunun katanya, gamatangan ami te, laman kadugemi gbanwan sanya si ay fulan, di ami gfaabyatan ayu. Di ami masefuwan sa ayu em ngay nayudanan kadugemi gfoyung ayu at Masine fag Barita siginan tam Diyus.

10Go gamatang yay am te, kaduge tam maful sanya, em ngay nafagbulun sa ayu, kata tuwa tam Diyus at fakaumsigun? Igtungul tuwa. Anggan tam Diyus, gamatang yangay, te di ami e nafagbulun mauri sa ayu. 11Ay go gamatang yay am te, gina tam maful, kata ami sik mama, tagfangatulun at ngay unga? 12Gfangatulun ami ayu, ay igsugu ami ayu, te, “Ay ugali, katai tuwa Diyus fakaumsigun, teway am wan at filian fag ngay taw. Ay tam Diyus gina ban igmagurang at ngay taw, am wa ban tiba at fagmagurangun, teway am wan ay at ngay filian. Ay kanya e fon ban ayu at fagmasineun ay at fagmadaragangun.” Katanya ebi em longan ayu.

Tiba Pablu at Fagusegananun sas Taw Tesalunika

13Katatuy yay tiba em fagusegananun sa ayu. Guseganan ami dawdaw te, ebi gina ami kamoyung ayu at Masine fag Barita, nasaful am te, kanya at ke foyungan, bundi taw. Diyus wan at ke foyungan katanya. Ay nu nasaful wam katanya, gafanud wam sa tam Diyus. Ay tam Diyus at foyungan igtunglus tuwa nu gfasine ayu. Katanya em fagusegananun tiba.

14Ay nu gafanud wam sa tam Isus, sik ngay taw sanya si ayu at yud gafanud, mason dawdaw nu kalimata ayu. Igfauri wa ayu. Katanya yangay ebi ginan takagurungan sas talun Udiya. Ngayuk taw Udyu at yud gafanud sa tam Isus anyangay kalimata dawdaw tiba nu gafanud sa tam Isus. Ay igfauri yangay at ngay tagafanud sa tam Isus, sa tam Diyus filian fag Fun.

15-16Ay teway fakatanyaun, mason dawdaw tibak taw Udyu nu gsalag nu e gfoyung Diyus longan. Ebi ngani, dewa Diyus e nasugu sik ngay takamoyung sa sangay taw Udyu, sik ngay taw Udyu nafate wan. Ay dewa gina tam Isus stes daga, sik ngay taw Udyu yangay at nafate tam Isus. Anggan takalimata gugat gugat emi, tagfalo siginan sangay fulan, sik ngay taw Udyu yangay. Fakatanyaun, kanya fag ngay taw Udyu at yud gafanud sa tam Isus kalimata dawdaw nu gfoyung ami Masine fag Barita sa tibak taw. Kaumsig dawdaw nansalag tibak taw nu mlangfe, teway kanya fag ngay taw Udyu kalimata wayay tibak fulan taw. Ay katanya wayay at fagbulun, kanya fag ngay taw Udyu igfaayu way gugat gugat at asalanan. Nu katanya, Diyus kalimata wa dawdaw takatanya fag ngay taw Udyu, ay makbang wa long Diyus nu gfaurianan sanya fag ngay taw.

Pablu nu Gfasaful sas Taw Tesalunika te, “Gananlagun wami Dawdaw Ayu”

17-18Em ngay fadugsay, glugo wa sirut nu antam yud gladlagan. Ay roro dewa katanya, di ami kalyaman ayu. Fangkabat, kabalu ami dawdaw ayu. Satu, ebi, naloun wami dawdaw sanya. Ay roro aw Pablu, bundi sayginan, bundi duwa ginan, nu an aw e fasadan nanlag ayu sanya. Ay dewa katanya, kanya em fasadanan wa n-gurungan, teway Satanas nasalag way emi. Naawat at ngay faran laman wami maatunglus sanya.

19Em ngay fadugsay, em faginkumsigun dawdaw nanlag ayu, teway kesug ami dawdaw ayu. Guseganan ami dawdaw sa ayu. Ay igfanseg ami te, di ban kasirut nu gafanud am sa tam Isus. Ay gina long ban tam Fun Isus kafoli stes daga, am wa ban em fakadaragangun, teway am wan em nafamoyung. Katanya fagmasonun dawdaw nu gananlagun ami ayu. 20Katsi oma, am wan em fakadaragangun ay em fagusegananun.

Currently Selected:

1 Tesalunika 2: TAWEAST

Highlight

Copy

Compare