1 Pedru 4

Tagafanud Inbagu wan at Ugali

1Teway tam Fun Isus nadalan fagatakanun, anggan itam, mafamasadani yangay atakani. Sik taw nu nadalan fagatakanun, lag gfaning asalanan. 2Ay nu katanya ay fagbulun, kaduge am gleleg ste swa daga, wam gfaning asalanan. Ay di ban am gugalian kata ngay taw tagasalanan. Fangkabat, gfaning wam Diyus at fakaumsigun. 3Sak wan nu gfaning am ay ugali ebi, kata at yud tagafanud at ugali. Ebi, kamalabiun am, ay kaumsig kamayun, ay maful am laman nanginum fangaranug ay gfagbulun am nus nga setaw at mapla. Ay gina am gseg sa ay ngay fagsegan, gfagbulun am at mason dawdaw fag mafurat. 4Ay ay gfaygaluwan ebi fag ngay taw katsi nadulawan ayu te, “Taw ro manga katsi wam kaful sa em fagbulun kata ebi?” Ay ka fag ngay taw wa gsaful te, at ngay fagbulun asalanan mason ay gfauri anya. Ay nu katanya, kanya naelongan mauri sa ayu baliwa. 5Ay roro bandi, ka fag ngay taw nansalubang ay nanfayamag ban sas Diyus sat ngay nafagbulun baliwa, gina ban Diyus gfoyung at fasadan sa sangay taw, dewa sa tagleleg ay dewa sat kinkate. 6Katanya at fagnafoyungun at Masine fag Barita dewa sa ebi at kinkate. Nu katanya, dewa at bilug inkate kata tibak taw ste swa daga, kanya gleleg ban, kata Diyus nu gleleg. Ay at ngay leleg siginan Diyus at Falad.

Fagayu Tagafanud Tarabangi tuwa Ay Iba

7Katsi makbang wan fagayu nu katabu. Ay nu katanya, maadani tuwa ay urunganani, laman mafafatunglus tuwam nu gdarangin am. 8Ay at tiba tungud fag ugali at matvngvd: Afanyui tuwa gugat ay iba, teway nu kafanyu tuwam ay iba, mafamasadan tuwam gfalyam ngayuk asalanan. 9Fasakboi ay iba sa ay bale, ay dangay gfaaringangan anya. 10Diyus nafon sa sadi sadik tagafanud at fagmafabulun. Fagayu tagafanud, fagbuluni wan sat masine, laman tibak tagafanud e fanambagun siginan ay fagmafabulun. Matuyani fag tagtanud sas Diyus at nafamanyun ayu nus nge wain. 11Nu sik tagfoyung o, Diyus yakman at elongan am foyungan. Ay nu sik tagtarabang o, tarabangi wa nus nga setvngvd Diyus at nafon emu at fagmadaragangun. Nu katanya, nus nga ginain nu gfagbulun o, gfauseganan tuwa Diyus, teway tam Fun Isus wan at tagtarabang emu. Ay gseg watam anya teway kanya at tiba tungud at ke fagmasineun faggugat faggugat. Kin, katanyai tuwa!

Useganani dewa e Gfauri Ayu

12Ku fakafanyuun ku ngay fadugsay, lag gadulawan dewa e mason fag ngay famaskud. Galay e gfaskud ay fagafanudun, lag am gamatangan te, taw manga at fagin-gurunganun katanya. 13Fangkabat, useganani tuwa, teway e gfauri wa fiya ayu kata nu e gfauri tam Fun Isus ebi. Guseganan tuwa ban am dawdaw gina tam Fun Isus gfasure at fagmadaragangun. 14Ay nu e gfalingun ayu teway gafanud am sa tam Fun Isus, e fanambagun ban am, teway Diyus at Madaragang fag Falad si wa ayu. 15Ay nu e gfauri ayu, dangay nangus siginan ay nafatean sik taw, ay ay nafangkamul, ay ay nafagbulun mauri, ay ay nafayud ay iba fagbulun. 16Roro ngap dewa e gfauri ayu teway gafanud wam sa tam Fun Isus, lag kapla, fangkabat, useganani way sas Diyus teway tiba nangayan wayu te, Isus at taw.

17Katsi makbang wan Diyus nu nantap fagayu taw at asalanan. Ay at taguna at fagnantapun at filian yay fag ngay taw at asalanan. Diyus nu e fagtapun way tam asalanan, setvngvd ngap ban at faurianan sa at yud gafanud sas Diyus at Masine fag Barita. 18Marirukan sis Diyus at longan te,

“Sik matuyan fag taw nu maduwanun yay kabalabag, setvngvd ya ban sa sik tagasalanan at yud naseg Diyus.”

19Nu katanya, dewa e gfauri ayu, nu katanya wa Diyus at fakaumsigun, faningi at masine. Ay nus nge wain fanusetawi wa sas Diyus, teway matuyan wa fiya te, wa long gfabayan ayu.

Currently Selected:

1 Pedru 4: TAWEAST

Highlight

Copy

Compare