1 Pedru 3

At Longan sa sik Daduwa

1Mangenam, katai yangay ngay fanuguwan: faningi tuwa ay mangama. Nu katanya tuwa, kanya katsi dewa yud gafanud sas Diyus at longan, gfafataban tuwam anya sas Diyus. Dewa am yud naelongan, nu lumag wa ay fagbulun at masine, gfaning wa ban ayu. 2Teway ay mangama glag tuwa ayu te, kalimu tuwam Diyus, ay malayun sat masine ay ugali. 3Nu gfasineun am, dangay fagtvngvd takalag, kata nu gfasine am ay buk, ay nu gsulun at ngayu nu kasali fag ngay dalag, ay at tiba tungud at masine fag balukas. 4Ay roro ngap, ay fagfasineun antuwa ay amatanganan, ay at masine fag ngay ugali at yud ginbalian. Nu katanya, mabayani ay malukmei tuwa. Takatanya fag ngay ugali mafanud dawdaw sas Diyus. 5Katanya tuwa ebi fag ngay mangena, matuyan tuwa at fagbulun. Kanya gfanseg tuwa Diyus. Ay tain ro nu gfasine anya? Gfaning tuwa at ngay mangama mandi. 6Katanya tuwa ebi Sara at fagbulun. Gfaning tuwa at mangama Abrayam, ay nangayan tuwa at mangama te, “Ku fun.” Ay fagayu am mangena, kata wam Sara at unga nu matuyan tuwa ay fagbulun, ay dangay kalimu nus nge wain takagurungan.

7Mangamam, katai yangay ay ngay mangena nu gfaning ayu. Ay fatvngvduni anya katvngvd ay nasaful, teway kanya wa kamagong ayu. Ay galangi tuwa anya, teway kanya kata yangay ayu gbul yangay Diyus at fagafonun fag leleg at yud e fakatabuwan. Ay nu katanya tuwa ay fagbulun, di e gsalag nu gdarangin am.

8Ay katsi, katatuy ku longan fagayu at taguyan: e fagmasadiyuni tuwa, ay fangaumsigi am iba at amatanganan, ay adkafanyuwani tuwa kata sik ngay dugsayan. Ay malukmei ay fababauni tuwa. 9Lag am gfasudan gfauri sa at nafauri ayu, ay anggan sa tagfalingun ayu. Fangkabat, ay fagbulun: darangini sas Diyus te, “Famanyuni yangay ka fag ngay taw.” Teway Diyus fagnafiliun ayu, laman gfagbulun am at masine takatanya. Ay nu katanya tuwa, Diyus mamanyun yangay ayu. 10Teway marirukan sis Diyus at longan te,

“Nus nga sinu takaumsig guseganan ay takaumsig masine nu gbanwan,

dangay glong mauri sa tiba baliwa.

Ay dangay gfanluk tiba.

11At mauri ubuni wan,

ay fagbuluni sat matuyan.

Maragangani yap,

ay fasadii at ngay taw tagaringangan.

12Teway tam Fun wan tagfatvngvdun sa tagfagbulun at masine,

ay gdungug tuwa at ngay darangin.

Ay roro ngap kanya kalimata way sa tagfagbulun at mauri.”

13Sinu takaumsig gfauri ayu, nu madaragang tuwam gfaning sat masine? 14Ay roro, galay e gfauri ayu teway ay fagbulun masine tuwa, e fanambagun tuwa ban am. Nu katanya, “Lag kalimu ay lag gafanawa sa ay amatanganan dewa nus nga setaw at fagbulun sa ayu.”#3:14 Isayas 8:12. 15Amatangani tuwa te, tam Fun Isus malayun tuwa sat masine. Ay longi sa anya te, “O wan tagmagurang angku.” Ay nu e ginto ayu te, “Taw ro am fagfansegun sas Diyus?” mafamasadani tuwa, laman mafafayamag tuwam sa anya ay fagsegun at masuwad. 16Ay roro, nu gbalus am, malukmei tuwa ay galangi am fasulitanan. Ay atuyani tuwa te, di am e nafagbulun at mauri. Nu katanya, mapla tagelongan mauri sa ayu baliwa, teway kanya nalag ay ugali at masine. Kanya fag ugali tagsiginans Isus. 17Nu Diyus tuwa at fasadan, masine dewa am gatakan, nu masine tuwa ay fagbulun. Ay roro, wa masine nu gatakan am nu nafagbulun am at mauri.

Diyus At Nafili fag Fun At Fagbulun gina Gdog Inleleg

18Sayginan way tam Fun Isus nu nkate, laman nanfalyam taw at asalanan. Sik masine fag taw inkate laman at yud masine fag ngay taw e fanambagun ban. Ay kanya tagfakbang antam sas Diyus. Gina kata antam at bilug, e nafate anya, ay roro nadog yay naleleg sit falad. 19Ay kanya nalo wan, ay nafoyung sat masungsungan fag ngay taw at falad. 20Kanya at ke falad ebi fag ngay taw at kinkate teway wa gfaning Diyus, gina Nuwe kawat sik balutu daul. Ginanya, glugo wan Diyus nu gfanya te, go e taw yay tagafanud sa anya. Ay roro, walu wayk taw tagafanud at nasakbo sasad balutu daul ay inlangfe sis lino daul. 21Ka fag lino daul ebi sik fafaskudanan sa tam naasurungan baliwa. At masuwad te, Diyus nafalangfe antam sas faurianan. At masuwad bunwa te, nafegus at malayung si tam bilug, antuwa te, get tam sas Diyus te, “Falayuni sat masine em amatanganan.” Ay gsaful watam te, inlangfe watam, teway tam Fun Isus nadog yay gleleg. 22Ay Isus katsi nasakbo wa sas banwa, ay malunggung wa sas Diyus at siyun baliwa. Ay Diyus nafasa wa Isus at daga fagmadaragangun at ngay tagfabarita, ay at ngay fun, ay at ke ngay fagmadaragangun.

Currently Selected:

1 Pedru 3: TAWEAST

Highlight

Copy

Compare