1 Pedru 2
2
1Nu katanya, ubuni wan fagayu at mauri fag ugali: lag gfanluk, lag gfalukanan, lag galabian ay iba dewa e kwa, ay lag gelongan yud masine sa ay iba baliwa. 2Katai sik ngenge nu kaumsig susu bilug at yud e fasagbatan. Katanyai yangay am: aumsigi Diyus at longan, teway kanya tam falad at fakonun. Nu katanya, umtvngvd tuwam fiya fiya sa baliwa ay fakalangfean. 3Nafaskud wam te, tam Fun masine tuwa.
4Akbangi sas Isus! Kanya wan takata sik mafanud fag batu famatvngvd at turuk sa sik bale. Kanya fag batu gleleg tuwa. Ay roro kanya ngay taw fakalimataun, dewa Diyus at nafili anya, ay mafanud dawdaw sa anya. 5Am sigon, kata yangay am tagleleg fag ngay batu, am wan Diyus at fangawat sik fanfalad fag bale. Diyus nafili ayu laman at ngay taganyun, ay gfon am sa anya fanfalad fag ngay anyun tagfaumsiganan anya. Ay mafagbulun yangay am katanya, teway tam Fun Isus igfagbulun sa ayu. 6Teway Diyus at longan glong te,
“E nafili aw at nanmagurang sas Erusalem.
Kanya at mafanud fag Batu at fagfatungkudan turuk.
Ay kayu tagafanud sa anya di ban kapla.”
7Nu katanya, am tagafanud sa anya, gsaful wam te, Diyus nafatiba tungud anya. Ay roro, sat yud gafanud fag taw, umgurungan Diyus at longan at nalong te,
“At ngay takamale kalimata sik batu.
Ay roro, kanya tuwa Diyus at nafili tagfatvngvd fagdaul at bale.”
8Ay nalong yangay te,
“Kanya fag batu tagfataid ay tagfatong ngay taw.”
At masuwad te, ka fag ngay taw fakataidun, teway wa nafaning Diyus at longan. Katanya wan Diyus at fasadan sanya fag ngay taw siginan ngay ebi ebi.
9Ay roro, am at nafili fag ngay taw. Ay am wan tagbuknga sa sangay taw ay sas Diyus, kata sik ngay taganyun. Ay gmagurang yangay am sit daga fag fagmadaragangun, kata sik ngay fun. Ay kata am sik talanan at malayun sat masine. Diyus at fagnafiliun ayu laman at taw am, ay am wan tagfoyung at madulawan dawdaw fag ngay fagbulun. Kanya at nabul ayu siginan sad marum laman sa tuwam at madulawan fag fagmayamagun. 10Ebi yam masadi sas Diyus, ay katsi am wan at ngay taw. Ebi we kafanyu ayu. Ay katsi Diyus kafanyu tuwa ayu.
11Ku fakafanyuun ku ngay fadugsay, matvngvd nu glong aw ayu te, lag gfaning nu si ayu way ay fakaumsigun tagfabarangyan ay falad. Kanya fag longan mafanud way ngap sa ayu, teway sik ngay betaw way am ste swa daga. 12Faggugat masinei tuwa ay ugali sa at yud gafanud fag taw. Nu katanya tuwa, kanya lumag wa ban ay ugali at masine, dewa kamuwagan sa ayu baliwa te, ay ugali mauri way. Ay nu katanya, gina ban Diyus umdasug, kanya sumeg ban Diyus.
Faningi Tam ngay Fun ste swa Daga
13Faningi tuwa fagayu tagmagurang ayu at longan si ay talun, laman tam Fun Isus guseganan tuwa. Ay faningi tuwa ay fun ste swa daga. 14Ay dewa sa sangay gubernadur, at fun nasugu laman nanfauri sa tagfagbulun mauri ay gfauseganan sa tagfagbulun masine. 15Teway katatuy tuwa Diyus at fakaumsigun: nu masine tuwa ay fagbulun, at yud mamatanganan fag ngay taw di e fagfayudun ayu. 16Isus nafalangfe ayu. Nu katanya, katai sik ngay taw yud gafanuguwanan. Ay roro lag gamatangan te, “Inlangfe kwan. Nu katanya, mafafagbulun aw at mauri.” Ay roro ngap am, nangugaliani tuwa Diyus at fakaumsigun kata at ngay fanuguwan. 17Galangi tuwa fagayu taw. Ay afanyui fagayu ay fadugsay sas Diyus. Ay nu gbanwan am, malimuwani tuwa sas Diyus. Ay segi yangay ay fun.
Nu e Gfauri Wayu Faningi Tam Fun Isus
18Am at ngay fanuguwan, faningi ay galangi tuwa ay fun ste swa daga. Ay bundi fagtvngvd sat malukme fag fun, anggani tuwa sat yud malukme fag fun. 19Go e gfaurianan ayu dewa yud am e asalanan? Ay go gbaris tuwam teway gamatanganan tuwam gugat sas Diyus? Nu katanya, Diyus guseganan tuwa ayu. 20Ay roro, nu e gfaurianan way ayu teway e asalanan am, dewa am gbaris, we fanambagun sa ayu. Ay roro, Diyus guseganan tuwayu nu masine tuwa ay fagbulun, dewa e gfaurianan ayu, nu gbaris tuwam gugat. 21Ugaliani katanya, teway katanya Diyus fakaumsigun gina gfili ayu. Teway tam Fun Isus nabaris tuwa, laman e fanambagun am. Kanya wan ay fagulitan; nu katanya, faningi at nafagbulun. 22Katatuy Diyus at longan sa baliwa tam Fun Isus:
Kanya di e asalanan,
ay di batang kamuwagan.#2:22 Ay ste Pedru nalong yangay tuy fag ngay tapan sis Isayas 53:4,5,6,12.
23Kanya di mauri at longan sa tagfalingun anya,
ay di gfalimuwanan sa tagfauri anya.
Nafanusetaw tuwa sas Diyus,
teway Diyus matuyan tuwa nu gtap taw at asalanan.
24Gina tam Fun Isus inkate sanya fag salibagan kayu,
kanya nabul wan tam asalanan,
laman di ban tam gfaning asalanan.
Ay tam fagfaningun sa tuwa at matuyan fag ugali.
Ay Isus at ngay fakarukan#2:24 fakarukan: Sis Faniganun, sugat. at nafafiya antam.
25Teway ebi kata am sik ngay tupa at malyaman.
Ay roro katsi nfoli am sa Tagtanud ay Tagdingding ayu.
Currently Selected:
1 Pedru 2: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
