1 Uan 5

Tam Fagafanudun Tam Fanbabo ste swa Daga fag ngay Mauri

1Sik taw nu gafanud tuwa te, tam Isus, tam Diyus at nafili fag Fun, kanya fag taw Diyus wa fiya at unga. Sik taw nu kesug tuwa at magurang, kanya kesug tuwa anggan at unga. 2Katatuy tam fagsafulan te, kesug tuwa tam Diyus at ngay unga, nu kesug tuwa tam Diyus ay nu gfaning tuwa tam at ngay suguwan. 3Katatuy nu kesug tuwa tam tam Diyus: gfaning tuwa tam at ngay suguwan. Ay at ngay suguwan di mataka. 4Nus nga sinu fag taw nu Diyus tuwa at unga, kanya gbabo nu nus nga setaw fag mauri ste swa daga. At fanbabo teway gafanud tuwa. 5Sinu at tagbabo ste swa daga fag ngay mauri? At tagafanud te, tam Isus tam Diyus at Baguwama.

6Tam Fun Isus nafatuyan wa fiya te, Diyus at Baguwama, gina kasurung sasad safa ay gina yangay at taguk inbusbus gina kate. Bundi nsurung sasad safa fagtvngvd, anggan tuwa sigon nabusbus at taguk. Ay at Masine fag Falad tagfatuyanan anya, anway at Masine fag Falad matuyan. 7-8Nu katanya e tuluk tagfatuyan: at Masine fag Falad, ay at safa, ay at taguk. Ay kanya fag tulu gdiyuganan. 9Nu gafanud tuwa tam sa sik taw at fatuyanan, Diyus at fatuyanan glabi yay fiya fiya sa sik taw at fatuyanan nu mafanud. Ay Diyus tagfatuyanan sa antam sat Baguwama baliwa. 10Sik taw nu gafanud tuwa sas Diyus at Baguwama, kanya fag fatuyanan sa wa at amatanganan. Ay at yud gafanud sas Diyus, kanya gfangayan way Diyus te, sik takamuwag, anway kanya fag taw wa gafanud sas Diyus at fatuyanan sat Baguwama baliwa. 11Katatuy Diyus at fatuyanan: Diyus nafon antam sik leleg at yud katabu, ay ka fag leleg siginan at Baguwama. 12Ay sik taw nu nsadi tuwa sas Diyus at Baguwama, e leleg tuwa at yud katabu. Ay sik taw nu dway insadi sas Diyus at Baguwama, we leleg at yud katabu.

E Leleg ban at Yud Katabu

13Nariruk aw tuy fag rirukan sa ayu, sa sangay tagafanud sas Diyus at Baguwama, laman sumaful wam fiya te, e leleg wam fiya at yud katabu. 14Katatuy nu ntuyan tam sas Diyus: Nu get watam nus nge wain, nu gfaning at fakaumsigun, kanya nadungug antam. 15Ay nu nasaful watam te, kanya nadungug antam nus nge wain tam fagetun, nasaful yangay tam te, nafabul watam tam fagetun siginan anya.

16Sik taw nu nalag at fadugsay gina e asalanan, ay ka fag asalanan di gfadasug ban anya sas fakateun, darangini yap, laman Diyus mon anya leleg at yud katabu. Takatanya sa baliwa at ke asalanan at yud gfadasug sas fakateun. Ay e tibak asalanan long tagfadasug ban sik taw sas fakateun. Nu katvngvd wa long anya fag asalanan, dakwa nalong te, darangini yap. 17Fagayu at mauri fag fagbulun asalanan way. Ay tibak asalanan di gfadasug sik taw sas fakateun. 18Nasaful watam te, Diyus at ngay unga di gfaning asalanan, anway Diyus at Baguwama tagdingding anya, laman Satanas di nanfauri anya. 19Nasaful watam te, itam wan Diyus at unga. Ay Satanas madaragang nu gmagurang ste swa daga fag ngay taw. 20Ay nasaful yangay tam te, Diyus at Baguwama fagindasugun laman nanfayamag sa antam, laman sumaful tam at Matuyan. Ay insadi watam sas matuyan, sas Diyus at Baguwama, tam Fun Isus. Ay kanya matuyan fag Diyus ay leleg at yud katabu.

21Am, ku ngay sisiyan, lag gseg sa tibak fagsegan.

Currently Selected:

1 Uan 5: TAWEAST

Highlight

Copy

Compare