1 Uan 4

Tam Diyus At Falad ay Satanas at Falad

1Ku fakafanyuun ku ngay fadugsay, lag am gafanud sas fagayu at tagelongan te, “Si wa angku at Masine fag Falad,” fangkabat, faskudi yap anya te, go kanya siginan tuwas Diyus. Teway ngayu at takamoyung at yud matuyan at kinrapyag sas fagdaul daga. 2Katatuy nu sumaful tam te, Diyus at Masine fag Falad si wa fiya si sik taw: ka fag taw nu gfoyung tuwa te, tam Fun Isus e bilug tuwa ebi gina kadasug ste swa daga. 3Ay nu dway gfoyung takatanya, kanya bunwa siginans Diyus. Kanya anway at takalimata tam Fun Isus. Ay dan wam gdungug te, kanya umdasug ban. Ay katsi ste swa daga. 4Am ku ngay sisiyan, Diyus wam at taw. Ay nababo wam ngay takamoyung at yud matuyan; anway at Masine fag Falad tagsi ayu nu madaragang glabi yay tagsanya fag takamoyung at yud matuyan ste swa daga. 5Kanya fag ngay takamoyung at yud matuyan tagste way swa daga fag ngay taw. Ay at foyungan tagste ginan yangay swa daga fag ngay foyungan. Ay tagste ginan yangay swa daga fag ngay taw at tagdungugan anya. 6Ay roro itam wan Diyus at taw. Ay nus nga sinu at nasaful Diyus, kanya gfaning tuwa tam foyungan. Ay kanya nu bunway Diyus at taw, kanya wa gfaning tam foyungan. Katanya tam fagnasafulun te, saman wan at matuyan siginan at Masine fag Falad, ay at yud matuyan siginan way sik takamuwagan fag falad.

Diyus Faggugat nu Maugalian, Gfangafanyu tuwa

7Ku fakafanyuun ku ngay fadugsay, tanani tuwa tam madkafanyuwan, anway fakafanyuun siginan tuwas Diyus. Ay sik taw nu kafanyu tuwa at tiba, kanya Diyus wa fiya at unga, ay nasaful tuwa Diyus. 8Ay sik taw nu dway kafanyu at tiba, wa nasaful Diyus, anway Diyus faggugat nu maugalian, gfangafanyu tuwa. 9Katatuy Diyus nu kafanyu antam: Diyus nasugu at Baguwama fag sadi ste swa daga, laman e leleg tuwa ban tam siginan anya. 10Katatuy fakafanyuun fiya: bunwa te, infanyu tam Diyus, antuwa te, Diyus tuwa at kinfanyu antam. Ay kanya nasugu ngani at Baguwama laman at anyun famalyam tam asalanan. 11Ku fakafanyuun ku ngay fadugsay, nu katvngvd wa dawdaw anya Diyus nu kafanyu sa antam, anggan itam adkafanyuwani yangay. 12Ay dewa tam yud batang glag tam Diyus, nu kadkafanyuwan tuwa tam, Diyus si wa antam. Ay tam fakafanyuun sa tam iba siginans Diyus kasakan tuwa.

13Gsaful watam te, si watams Diyus, ay Diyus si wa antam. Madyay Diyus nafat si wa antam at Masine fag Falad. 14Ay nalag wami ay nafatuyan te, Diyus nasugu at Baguwama, laman kanya at Tagfalangfe sas fagayu taw ste swa daga. 15Ay nus nga sinu fag taw nu nafoyung tuwa te, tam Isus tam Diyus at Baguwama, Diyus si tuwa anya. Ay kanya nsadi yangay sas Diyus. 16Nu katanya, nasaful watam ay gafanud watam te, Diyus kafanyu tuwa antam. Diyus faggugat nu maugalian, gfangafanyu tuwa. Ay sik taw faggugat nu kafanyu tuwa at tiba, kanya nsadi wa sas Diyus. Ay Diyus si yangay anya. 17Tam Diyus at fakafanyuun kasakan tuwa sa antam. Nu katanya, di tam kalimu gina ban sas fakatabuwan fag menit. Anway dewa tam ste swa daga, tam ugali kata yangay tam Diyus at ugali. 18Nu e fakafanyuun tuwa tam, di tam kalimu. Nu kasakan tuwa tam fakafanyuun gfalyam tuwam tam fakalimuun. Sik taw kalimu anway gamatangan te, umfaurianan. Takatanya fag taw ya kasakan at fakafanyuun. 19Ay kafanyu tuwa tam tam iba, anway Diyus taguna at kinfanyu antam. 20Sik taw dewa nalong te, kesug akwa Diyus, ay roro nu kalimata yay at usama, kanya sik takamuwag way. Teway sik taw nu dway kafanyu at faglagun fag fadugsay, tain ro nu kesug sas Diyus nu dyay ngap batang glag? 21Katatuy Diyus at suguwan sa antam te, sik taw nu kesug tuwa Diyus, esugi tuwa anggan at fadugsay.

Currently Selected:

1 Uan 4: TAWEAST

Highlight

Copy

Compare