1 Uan 3

Diyus At ngay Unga

1Amatangani te, matvngvd tuwa tam Tama nu kesug antam, katanya at fagnafangayanun antam te, at ngay unga. Ay kin wa fiya. Ay ngay taw ste swa daga wa natoglag antam, anway wa nasaful Diyus. 2Ku fakafanyuun ku ngay fadugsay, katsi itam wan Diyus at unga. Ay katsi ya tam nasaful te, go tain ban tam fiya fiya. Tam fagsafulun anyay fagtvngvd te, tam Isus ban gina msure, fagayu tam kata yangay ban tam anya, anway lumag wa ban tam fiya anya. 3Ay fagayu taw at ke fagsegun takatanya, falayuni at ugali sat masine kata tam Fun Isus at ugali nu malayun sat masine.

4Fagayu taw nu gasalanan way, kamabo way Diyus at longan. Anway asalanan ay fakamaboun sadi way. 5Nasaful wam te, Isus at faginsureun, laman nanfalyam tam asalanan. Ay kanya di e asalanan. 6Nus nga sinu fag taw nu nsadi tuwa sas Isus, di nanfaning asalanan. Nus nga sinu fag taw nu gfatunglus yay gfaning asalanan, wa nalag ay wa natoglag Isus.

7Ku ngay sisiyan, lag galukan sa nus nga sinu tagfanluk. Nus nga sinu tagfagbulun sat matuyan, kanya matuyan wan, kata tam Isus nu matuyan. 8Nus nga sinu fag taw nu gfaning yay sas asalanan, kanya Satanas yay taw. Anway siginan ngays fagsigadan Satanas gasalanan wa gugat. Katanya Diyus at Baguwama at faginsureun, laman nanfalyam Satanas at ngay fagbulun.

9Nus nga sinu fag taw nu Diyus tuwa at unga, di gfatunglus nu gfaning asalanan, anway Diyus at ugali si wa anya. At matuyan, kanya di gfaning asalanan anway kanya Diyus wa at unga. 10Katatuy at nasaman Diyus at unga ay Satanas at unga: nus nga sinu at yud gfagbulun masine, ay at yud kafanyu at fadugsay, kanya bunwa Diyus at unga.

Tanan tuwa Tam Madkafanyuwan

11Katatuy ay dungganan ebi at foyungan te, tanan tuwa tam madkafanyuwan. 12Lag gfaning Kain at fagbulun, anway Kain Satanas way at taw, madyay nafate way at ariyan. Ay at masuwad at fagnafateun at ariyan anway te, at fagbulun mauri way. Ay at ariyan at fagbulun masine tuwa. 13Ku ngay fadugsay, lag gadulawan at ngay taw ste swa daga dewa kadotama ayu sat amatanganan. 14Nasaful watam te, naubun watam fakateun, ay naalin watam sas leleg faggugat. Anway kafanyu tuwa tam tam fadugsay. Ay sik taw nu dyay kafanyu at tiba, kanya si yay gugat sfakateun. 15Nus nga sinu takadotama at fadugsay sat amatanganan, kanya kata yay sik takamate fag taw. Ay nasaful watam te, sik takamate fag taw wa fabul leleg faggugat. 16Katatuy tam fagsafulan fakafanyuun at masuwad. Tam Isus inkate katvngvdan nu nfanyu antam. Ay anggan itam, foni yangay tam leleg laman tam fadugsay sigon e fanambagun yangay. 17Sik taw at ke kwa nu nalag at fadugsay at yud e kwa nu gayudan, ay nu dway gtarabang at fadugsay, go tam Diyus fakesugun si wa anya? Yaya! 18Am ku ngay sisiyan. Nu kafanyu tam tam fadugsay, dangai si tam longan fagtvngvd. Falagi tuwa tam fakafanyuun at matuyan sa tam fagbulun.

19Nu katanya tuwa tam fagbulun, sumaful tam te, si watam at matuyan. Ay manabayan tuwa tam sas Diyus at daga salubangan. 20Dewa tam e faganudanun, nasaful watam te, tam Diyus at fagmadaragangun glabi yay tam amatanganan. Ay kanya nasaful tuwa nus nge wain. 21Ku fakafanyuun ku ngay fadugsay, nu gdi tam e faganudanun, di ban tam kapla sas Diyus at daga salubangan. 22Ay mafabul tuwa tam nus nga setaw tam fagetun sas Diyus, anway gfaning watam at longan, ay tam fagbulun igfauseganan tuwa sa anya. 23Ay katatuy Diyus at suguwan: afanudi sat Baguwama, tam Fun Isus. Ay tanani adkafanyuwani anway katanya tuwa tam Isus at suguwan sa antam. 24Nus nga sinu tagfaning sas Diyus at suguwan, kanya nsadi wa sas Diyus, ay anggan Diyus si yangay anya. Ay nasaful watam te, Diyus insadi sa antam anway nafon antam at Masine fag Falad.

Currently Selected:

1 Uan 3: TAWEAST

Highlight

Copy

Compare