1 Uan 2

Isus Tam Tagbuknga

1Am ku ngay sisiyan, griruk aw sa ayu laman di am gasalanan. Ay sik taw nu e asalanan way, e nanbuknga yay ban antam siginan antam ay sa tam Tama. Tam tagbuknga tam Fun Isus. Kanya matuyan. 2Isus at naatean, at mafafalyam tam asalanan. Ay at fagfalyamun bundi antam tam asalanan fagtvngvd, anggan fagdaul daga at taw at asalanan. 3Nu gfaning tuwa tam tam Diyus at longan, intuyan watam fiya fiya, ay nasaful watam Diyus at ugali. 4Sik taw dewa nalong te, “Nasaful akwan Diyus,” ay nu dway gfaning Diyus at ngay suguwan, kanya sik takamuwag way. Ay at matuyan fag longan dya si at amatanganan. 5Ay roro nus nga sinu nu gfaning tuwa Diyus at longan, kanya kesug tuwa Diyus. Katatuy nu gsaful tam te, Diyus watam at taw: 6nus nga sinu at nalong te, “Aw wan tagfaning Isus,” at ugali faningi yangay Isus at ngay ugali.

At Suguwan Bagu

7Ku fakafanyuun ku ngay fadugsay, ku rirukan sa ayu bunwa sik suguwan bagu. Ku rirukan sik taglugo wa fag suguwan ay dan wam nasaful. Tuy taglugo fag suguwan at foyungan ayu ebi ginan wa gugat ay nadungug. 8Ay roro dewa glugo ka fag suguwan, kata yay nu bagu. Ay tibak taw at fagnasafulun ka fag suguwan at matuyan, anway nalag tam Isus at fagbulun ay anggan ay fagbulun. Anway at marum kalyam wan, ay at matuyan fag fagmayamagun kasure wan. 9Sik taw dewa nalong te, aw wan tagsisad mayamag, ay roro nu kabalo#2:9 kabalo: ay ate, kalimata. Sis Faniganun, napopoot. yay sat fadugsay sat amatanganan, kanya sisad marum yay anggan katsi. 10Ay nus nga sinu nu kafanyu tuwa at fadugsay, kanya sisad mayamag wan. Ay at fagbulun di gfataid at fadugsay. 11Ay nus nga sinu nu kabalo yay at fadugsay sat amatanganan, kanya sisad marum yay, ay nu glo, sasad marum yay. Ay kanya wa nasaful te, dada ro nu glo. Anway at marum gfarum wayay at mata.

12Ku fagnarirukun sa ayu, ngay sisiyan, teway nafalyam wan ay ngay asalanan anway sa tam Fun Isus. 13Ku fagnarirukun sa ayu, ngay tama, teway nasaful wam anya, at tagsiginan ngays fagsigadan. Ku fagnarirukun sa ayu, ngay mabaguwama, teway nababo wam Satanas. 14Ku fagnarirukun sa ayu, ngay sisiyan, teway nasaful tuwam tam Tama. Ku fagnarirukun sa ayu, ngay tama, teway nasaful wam anya, at tagsiginan ngays fagsigadan. Ku fagnarirukun sa ayu, ngay mabaguwama, teway mabitsug tuwam. Ay Diyus at longan si wa ay amatanganan ay nababo wam Satanas.

15Lag kesug nus nge wain ste swa daga, anggan at taw at ugali. Sik taw nu kesug way nus nge wain ste swa daga, wa kesug tam Tama. 16Fagayu ste swa daga, anggan at taw at ugali, tenday at bilug at fagalabianun, ay at mata at fagalabianun, ay anggan at amatanganan at fagalabianun, wa siginan tam Tama, ste ginan way fag daga at ugali. 17Ay fagayu ste swa daga fag ngay fagalabianun, mamin way ban. Ay roro sik taw nu gfaning tuwa Diyus at fakaumsigun e leleg tuwa ban faggugat.

At Nanfaligbatan Diyus At Nafili fag Fun

18Am ku ngay sisiyan, katsi makbang wan at taguyan fag ngay menit. Ay ebi nadungug wam te, umdasug ban takalimata tam Fun Isus, ay katsi ngayu wan. Nu katanya wan, gsaful watam te, katsi makbang wan at taguyan fag ngay menit. 19Ebi ngay takalimata tam Fun Isus dewa maful antam, wa gfadiyuganan tam amatanganan. Anway nu gfadiyuganan tuwa satu, anggan katsi maful yay antam. Ay siginan at naloan, intuyan watam te, kanya bunwa tam faudgufudan. 20Ay tam Fun Isus nafat si wa ayu at Masine fag Falad, ay fagayu am nasaful wam at matuyan fag longan. 21Ku fagnarirukun sa ayu bunwa te, di am nasaful at matuyan fag longan, antuwa te, dan wam gsaful at matuyan fag longan. Ay manga nasaful wam te, siginan at matuyan fag longan duwa kamuwagan. 22Sinu ka fag takamuwag? Kanya tagafayudun te, Isus bunwa Diyus at nafili fag Fun. Kanya kalimata tam Fun Isus. Ay manga kanya sik tagafayudun way tam Diyus tam Tama ay anggan at Baguwama. 23Nus nga sinu fag taw nu gafayudun way sat Baguwama, kanya gafayudun yangay anggan tam Tama. Ay kanya nu nafoyung tuwa te, tam Isus tam Diyus at Baguwama, kanya gafanud tuwa anggan tam Tama. 24Ay dangay kalyam ebi taguna ay nadungug. Nu gamatangan tuwam sa ebi taguna ay nadungug, insadi wam sat Baguwama ay anggan sat Tama. 25Ay at fatuyanan sa antam, e leleg tuwa ban tam faggugat.

26Katanya ku fagnarirukun sa ayu, anway e gfanluk ban ayu. 27Ay tam Fun Isus fagnafatsiun ayu at Masine fag Falad, laman si tuwa ayu faggugat. Ay katanya tuway, di am gayudan tibak takamoyung, teway at Masine wa fag Falad at tagfoyung ayu fagayu nus nge wain. At ugali matuyan ay di kamuwagan. Ani tuwa masadii sas Isus kata at foyungan sa ayu.

28Am ku ngay sisiyan, masadii tuwa sas Isus, laman ban Isus nu msure wan, di tam malimuwanan. Ay di tam kapla kanya gina kadasug. 29Nasaful tuwa tam te, tam Isus matuyan tuwa. Nu katanya, fagayu at matuyan at fagbulun, kanya Diyus wa at unga.

Currently Selected:

1 Uan 2: TAWEAST

Highlight

Copy

Compare