1 Kurintu 9

Isus At ngay Nasugu at Fagbulun

1Go sangay di e gfasalag angku? Go sangay dakwa Isus at Nasugu at sadi? Ay go sangay wam nasaful te, nalag kwa fiya fiya tam Fun Isus? Ay go sangay wam nasaful te, inke fagafanudun am anway siginan ku nafagbulun sa ayu? 2Dewa tibak taw gamatangan sa angku baliwa te, dakwa Isus at Nasugu, ay naafandiyugan sa tam Fun at tagfatuyan te, aw fiya at Nasugu at sadi. 3Ay katanya ban ku famalus sa sik taw taginto te, go Isus aw at Nasugu at sadi.

4Go sangay wa masine gbul ami em fakonun ay em fanginum, siginan em nalufuyan? 5Ay nu e mangena di ami, go wa masine gtaban ami em mangena sik tagafanud, sa em fagloan, kata tibak fadugsay sa tam Fun, kata Pedru ay tiba yak Nasugu? 6Ay go ami way Bernabe at tagnanfagbulun laman e fakonun ami? 7Ay go e sundalu gsali at nalufuyan sa at nafagbulunan mandi? Ay go e nantanum yay manga dewa gyud ban mul at buwadan? Ay go e gfagut tuwa kambing deyud ban e nabul at gatas?

8Ku longan takatanya bundi siginans taw at amatanganan, siginan tuwa Muisis at Suguwan fiya fiya. 9Anway marirukan sis Muisis at Suguwan te, “Lag gbugsung baka at dungus kaduge am gfarabas.”#9:9 Diyuterunumyu 25:4.

Go Diyus at fagnalongun katanya, go sa way ngay balan fagtvngvd? 10Yaya. At fagnalongun sa yangay antam, anway sik taw takali ay tagrabas gsudan e fagsegun te, umke afud wa ban fiya sat fagnanganiun. 11Natanum ami sa ayu sik fanfalad fag famanyun. Ay go gbiya ro fag fanambagun nu nabul ami ngay takalag fag ngay famanyun siginan ayu? 12Ay tibak takamoyung nu masine tuwa gbul katanya siginan ayu, kaugat wan ami, ay roro dewa ami masine gbul, wami get siginan ayu.

Igbaris tuwami, laman ro di mke fanlonganan nu gfarapyag ami at Masine fag Barita sa baliwa Fun Isus. 13Go wam gsaful te, sik taw tagfagbulun sas Diyus bale nu gbul at fakonun siginan was Diyus bale, ay sik taw tagfagbulun sas fagyagoan nu gbul at fakonun siginan wa sik afud at anyun? 14Katanya yangay tam Fun at longan te, fagayu tagfaning at Masine fag Barita, tarabangi at ngay tagfoyung at Masine fag Barita at ngay nayudanan.

15Dewa katanya, dakwa gfabulun takatanya. Ay dakwa griruk sa ayu laman gfon am sa angku ay fanarabangun. Amasine yap ro nu mkate aw sas kalunus, nu di ro malyam ku fagfalabiun te, gfoyung aw at Masine fag Barita gyud e nabul fansali. 16Ay dewa katanya, dakwa gfandaragang nu gfoyung aw at Masine fag Barita, Diyus nafon angku fag fagbulun. Ay at mabalu nu dakway ban nafafoyung at Masine fag Barita. 17Ay nu gfagbulun aktuwa magan sa ku amatanganan, e fagfanyaun kwa ban fiya ku nalufuyan. Ay roro at matuyan, gfagbulun kway Diyus at nafon angku fag fagbulun. 18Nu katanya, nataw katsi ku nabul ku nalufuyan? Ku nabul sik fagusegananun te, dakdi gbul fansali sa ku nafoyungan at Masine fag Barita, dewa te, satu masine kway gbul fansali.

19Dewa aw yud sik fanuguwan, insik fanuguwan aw sas fagayu, laman umkayu yay tagafanud. 20Kaduge aw maful sis wa taw Uda, ku ugali kata yangay sik taw Uda, laman gfataban aw sas fagafanudun. Ay dewa aw gyud gfaning Muisis at Suguwan, roro gfaning aktuwa, laman gfataban aw sas fagafanudun. 21Ay kaduge aw maful sa at ngay yud Udyu fag taw, ku ugali kata yangay sa at yud gfaning Muisis at Suguwan, laman gfataban akyangay sas fagafanudun. At masuwad bunwa te, dakwa gfaning Diyus at ngay suguwan, anway at matuyan, gfaning aktuwa tam Fun Isus at ngay suguwan. 22Ay nafamaning aw at yud matvngvd at fagafanudun, laman fafatvngvd aw at fagafanudun. Nafamaning aw nus nga sinu fag taw at ugali, laman nus nga setaw ku fagbulun tibak taw umlangfe tuwa ban. 23Fakatanyaun ku fagbulun, laman at Masine fag Barita umrapyag, ay laman umke afud akyangay sanya fag famanyun.

24Go sangay wam nasaful te, fagayu taggudgunan gtarung fag ngay taw, sadi wadi tagbabo. Nu katanya, fasineuni tuwa nu gtarung am, laman fafabul tuwam at famanyun. 25Sik tagawyan fag ngay taw gfaadalun yay fiya fiya ay gfananadan at bilug laman fafabul sik sangbo. Ay ka fag sangbo yud glugo. Ay roro itam tagafanud, tam fagyabulun antuwa sangbo at yud karasras faggugat. 26Nu katanya, nu gtarung aw, e masuwad tuwa ay e fakadasugan. Ay nu sa sik tagsuntuk, dakdi gsuntuk sas tagmara. 27Gfananadun aw ku bilug ay gfabarangyan ku amatanganan at mafurat, teway labon gina ntabu nu gfoyung aw sa ku ngay iba, mayud aw mul ka fag famanyun.

Currently Selected:

1 Kurintu 9: TAWEAST

Highlight

Copy

Compare