1 Kurintu 10

Lag Gseg sas Tawtawan

1Ku ngay fadugsay, kaumsig aw nanfasaful sa ayu at kin-gurungan sa tam ngay aguyangan ebi tagalo Muisis. Kanya fagayu kaduge glo, galo sik linyabu ay nadife Dagat Maraska. 2Kanya fag linyabu ay fag dagat, sik fafaskudanan te, ka fag ngay taw kata wa nu nsurung, laman Muisis wa at taw. 3Ay ka fag ngay taw naon fakonun siginans Diyus. 4Ay nainum safa siginans Diyus, ka fag safa at kinsure siginan sad Batu. Ay ka fag Batu gufud tam aguyangan, anway kanya tam Fun Isus wan. 5Dewa katanya, at ngayu wa nafagbulun masine sas Diyus. Nu katanya, ngayuk taw inkate wan sa sangaba talun at yud e taw.

6At ngay kin-gurungan sanya fag ngay taw sik famatagak sa antam, laman di tam kaumsig gfagbulun sat mauri, kata kanya fag ngay taw at nafagbulun. 7Ay lag am gseg sa sangay tawtawan, kata ebi tibak taw at fagbulun, anway marirukan sis Diyus at longan te,

“At ngay taw malunggung, ay kon, ay ginum. Ay kanya malindug laman nanfalelegan at bilug gfauseganan tawtawan.”#10:7 Nu Galin 32:6.

8Lag am kamayun, kata kanya fag ngay taw tiba at nafagbulun. Katanya wayay ginanya fag menit at kinkate 23,000k taw. 9Ay lag am gfaskud tam Fun Isus, kata ka fag ngay taw at tiba at nafagbulun. Katanya ka fag ngay taw ubyanun at fagnaagatun ay inkate wan. 10Ay lag am gfayud kata ka fag ngay taw at tiba. Katanya ebi Diyus at tagfabarita at fagnafateun ka fag ngay taw.

11Fagayu at kindasug takatanya sik famasaful sa antam. Ay at fagnarirukun takatanya laman sik famatagak sa antam, anway katsi makbang wan at fakatabuwan fag ngay menit. 12Nu katanya, nu gamatangan am te, matvngvd wan nu gafanud am, matagakani tuwa gugat, laman di am mafaningan sas asalanan. 13Ye famaskud at kindasug sa ayu tibak taw yud nadalan. Dewa katanya, matuyan Diyus at longan, kanya di gfabayan ngay famaskud taglabi ay katvngvdan. Nu katanya galay am gdalan ngay famaskud, kanya moyung sik balyavtan laman mabo am.

14Nu katanya, ku fakesugun ku ngay taw, lag nanseg sa sangay tawtawan. 15Nafoyung aw sa ayu, am tagtogdungug ku longan. Nu katanya, amatangani tuwa ku longan sa ayu. 16Sa baliwa tam Fun Isus at yafun, guseganan tam sas Diyus sa ka fag safa ay anggan sa ka fag tinafay tam fakonun, teway insadi wa tam sa tam Fun Isus at taguk ay sat bilug. 17Fakatanyaun, sadik bilug way tam dewa ngayu at afud, teway sadik tinafay way tam naafudan naon. 18Kata taw Israel, fagayu takon ngay anyun, kanya fagayu kinsadi wa sanya fag fagbulun sis fagyagoan. 19Nataw ku longan at masuwad? Go glong aw te, sik fakonun at nafon sa sangay tawtawan go e masuwad, ay ate sik tawtawan go e masuwad tuwa? 20Yaya. Ku longan at masuwad antuwa te, at nafon fag ngay anyun sa way at mafurat fag falad, ay wa sas Diyus. Ay kwa kaumsig nu kaful am sa sangay mabara. 21Watam masine ginum sa tam Fun at faginuman ay sa sangay mafurat fag falad at faginuman. Ay watam masine gfasfuwan gfangon sa tam Fun at fagfangonan ay sa sangay mafurat fag falad at fagfangonan. 22Go masine nu gfalimatan tam tam Fun? Ay go sangay e fagmadaragangun yay tam glabi anya?

23Mafafagbulun way tam nus nga setaw tam fakaumsigun, ay roro tibak fagbulun wa masine sa antam tagafanud, ay we tarabang sa tam fagafanudun baliwa. 24Dangay si ayu ay fagamatanganun. Amatangani yangay ay iba. 25Fagayu takasali fag karni siginans fagsalian oni wan. Ay lag am ginto, laman di am e amatanganan mafurat. 26Anway marirukan sis Diyus at longan te, “Tam Fun wan tagagbilug fagdaul daga ay anggan fagayu tagsanya.”#10:26 Danyu 24:1.

27Ay sik yud gafanud fag taw nu nagewan ayu sat bale laman nanfangon, ay kaumsig am nanlinggat, oni wan nus nge wain fag fakonun at fon ayu, ay lag am ginto, laman di am e amatanganan mafurat. 28Ay roro sik taw nu nalong sa ayu te, tuy fag fakonun nafon sas tawtawan, lag am kon. Afanyui tuwa at nafoyung ayu fag taw, laman at amatanganan di mafurat. 29Ku fagalongunun bunwa sa ay ngay amatanganan baliwa nu mafurat ay ate nu masine, antuwa sa ay iba at amatanganan. Labon lumong am te, “Taw ro sik taw at amatanganan at fagsalagun ku fakaumsigun?” 30Nu guseganan aktuwa sas Diyus gina aw kon ka fag fakonun, taw ro tibak taw fakalimataun sa ku naonan?

31Nu katanya, katatuy ku famalus: dewa am kon ay dewa am ginum, fagbuluni tuwa mauseganan sas Diyus. 32Dangay gfagbulun nus nga setaw tagfe asalanan sa sangay taw Udyu ay sa sangay taw Gresiya, ay anggan Diyus at ngay taw. 33Faningi tuwa ku ngay fagbulun. Ku fagbulun gugatan kwan laman fatarabang aw sas fagayu taw. Bundi ku amatanganan mandi ku fagamatanganun, anggan tuwa tibak taw, laman umlangfe yangay.

Currently Selected:

1 Kurintu 10: TAWEAST

Highlight

Copy

Compare