1 Kurintu 8

At Foyungan sa at Nafon fag Fakonun sas Tawtawan baliwa

1Katsi nanbalus aw ay fagintoun sa sik fakonun at nafon sa sik tawtawan baliwa. Dewa ngayu tam fagsafulun, amatangani te, tiba ginan fagsafulun tagfaamatanganan taw laman gfalabi. At masine adkafanyuwani tuwa, anway kanya tagfatvngvd tam fagafanudun. 2Sik taw tagamatangan te, ngayu wan at fagsafulun, at matuyan, ya nsak at fagsafulun. 3Ay roro sik taw nu kesug tuwa Diyus, Diyus nasaful tuwa ka fag taw.

4Katatuy ku longan sa baliwa sik fakonun at nafon sa sangay tawtawan: gsaful watam te, sik tawtawan wa matuyan fag fagsegan, anway tam Diyus, sadi way. 5Ay dewa e glong te, ngayuk diyus ay ngayuk fun sas banwa ay swa daga, 6sa antam, sadi way tam Diyus, tam Tama, at naawat fagayu, ay tam faginketawun laman gfaning anya. Ay sadi way tam Fun, tam Fun Isus. Ay siginan anya faginkawatun nus nge wain, ay siginan yangay anya tam faglelegun.

7Ay bunya fagayu tagafanud at nasaful ka fag fagsafulun at matuyan. Ebi ataw tibak tagafanud igseg yay sa sangay tawtawan. Nu katanya, galay kon at naanyun sa sangay tawtawan fag ngay fakonun, gamatangan te, kanya wan at sadi tagseg sa sangay tawtawan. Ay gasalanan wa sat amatanganan. 8At matuyan, sik fakonun wa mafafakbang antam sas Diyus. Ay dewa tam gyud naon, du e mbali tam fagmasadiun sa tam Diyus.

9Dewa katanya, maadani tuwa, laman ay fagbulun di gfe asalanan sa at yud matvngvd at fagafanudun. 10Ay roro o at ke fagsafulun, nu gfangon way o sis fagnansegan tawtawan at bale, ay sik taw at yud matvngvd at fagafanudun nu nalag emu, kanya ro nangon yangay kata emu, kanya dewa gamatangan te, takatanya asalanan way. 11Ay nu katanya yay am fagbulun, am fagsafulun gfe asalanan yay am fadugsay at yud matvngvd at fagafanudun. Tam Fun Isus inkate yangay laman sa anya. 12Nu katanya, nasalan wo sa tam Fun Isus, ay nafe asalanan yangay o am fadugsay, anway sa am nafagbulun at yud namasine sa at amatanganan. 13Nu katanya, ku fakonun nu gfe asalanan way sa ku fadugsay, dakwa ban kon karni faggugat, laman dakdi gfe asalanan ku fadugsay.

Currently Selected:

1 Kurintu 8: TAWEAST

Highlight

Copy

Compare