1 Kurintu 7

Sik Longan sa baliwa nu Nangadaduwa

1Nariruk am te, wa masine manga sik ama nu nangadaduwa. 2Ay roro nu si angku, anway ngayu way tagamatangan gfagbulun nanfamayun, masine nu e mangamai ay nu e mangenai. 3At mangama faumsigani tuwa sat mangena. Ay at mangena faumsigani tuwa sat mangama. 4Anway bunwa at mangena tagagbilug at balyu, at mangama tuwa. Ay at mangama bunwa kanya tagagbilug at balyu, at mangena tuwa. 5Nu katanya, lag am gafayudun nut sa am ay sadi. Ay nu nadiyuganan am te, yam sa ay sadi, agi yap sa ay sadi, laman e lungud yay am gdarangin gsesadian. Ay nu nlangfe wa long, dogi yangay sa ay sadi, laman di am gafaskudan Satanas. 6Ku longan bunwa sik suguwan, glong kway ku amatanganan. 7Nu masine di, ku fakaumsigun fiya fiya, fagayu am katai wa angku yud e faduwan. Dewa katanya, saman way Diyus at nafon at fagmafabulun sa sadi sadik taw.

8Katatuy yangay ku longan sat yud batang e ufud ay sa sangay burangday fag mangena te, at masine sesadiani way kata angku. 9Ay roro dewa aw nalong katanya, nu dway am maabaris, at masine adaduwai wan. Anway amasine yap nu ndaduwa am laman di am umke asalanan.

10Katatuy ku longan sa sik daduwa. Ay bundi aw at ke longan, tam Fun tuwa sigon at ke longan te, “Mangena, lag gubun am mangama.” 11Ay nu naubun way o, lag gdog nangadaduwa, nu dway katanya, afolii way sa am mangama. Katanya yangay am at ngay mangama.

12Ay katatuy tiba ku fagalongunun, ay bunwa tam Fun at nalong: sik tagafanud nu e mangena sik yud gafanud, ay at mangena nu kesug tuwa anya, lag gubun. 13Ay sik mangena tagafanud nu e mangama sik yud gafanud, ay at mangama nu kesug tuwa anya, lag gubun. 14Anway sik mangama at yud gafanud, Diyus natap anya sik tagafanud, teway sat mangena tagafanud. Ay sik mangena at yud gafanud, Diyus natap yangay anya sik tagafanud, teway sat mangama tagafanud. Nu dway katanya, Diyus wa tumap at ngay unga, sik tagafanud. Ay at matuyan, Diyus gtap tuwa te, at ngay unga yangay. 15Ay roro, at yud gafanud nu kaumsig wa gubun at faduwan, lag gsalag anya. Anway katanya, we asalanan tagafanud fag mangama ay ate fag mangena, anway Diyus at fagnafiliun antam laman manabayan tuwa tam. 16Mangena, labon manga o wan at nanfoyung am mangama laman umlangfe tuwa ban. Mangama, labon manga o wan at nanfoyung am mangena laman umlangfe tuwa ban.

Ugaliani tuwa Diyus at Nafon Emu fag Fagbulun

17Bawat am at sadi, ugaliani kata tam Fun at nafon sa ayu fag ugali, kata ebi gina Diyus gfili ayu. Katanya ku suguwan sas fagayu tagafanud. 18Sik taw nu matulian wan gina Diyus gfili anya, lag wa nanfabali. Ay sik taw nu dyay matulian gina Diyus gfili anya, lag wa nanfatuli. 19Anway dewa matulian ay yud, wa dawdaw mafanud takatanya. Taglabi nu mafanud, faningi tuwa Diyus at longan. 20Nu katanya, bawat am at sadi ugaliani kata tam Diyus gina bagu gfili ayu. 21Dewa o sik fanuguwan gina tam Fun bagu gfili emu, lag kabalu. Ay roro nu e fangalfasan tuwo laman di o gafanuguwanan, alfasi wan. 22Anway sik taw dewa sik fanuguwan gina tam Fun bagu gfili anya, katsi tam Fun Isus wa at nafalfas. Ay katanya yangay, sik taw dewa sik yud fanuguwan gina tam Fun bagu gfili anya, kanya katsi tam Fun Isus wa at fanuguwan. 23Diyus nasali dawdaw ayu. Ay nu katanya, lag am sigad nangafanuguwanan sas taw. 24Ku ngay fadugsay, ugaliani tuwa kata ebi gina Diyus gfili ayu.

At Longan sa at yud e Ufud ay sa sangay Burangday fag Mangena

25Sa baliwa at yud e ufud, kwe suguwan siginan tam Fun. Ay dewa katanya, anway sa tam Fun at fakafanyuun, katatuy ku amatanganan: 26anway sa at ngay mataka katsi, masine sik taw nu gfatunglus ban nus nga setaw at fagbulun ginanya. 27Nu e mangena wo, lag gubun. Ay nu dyay o e mangena, lag wa gsarap. 28Ay roro dewa o ndaduwa, katanya bundi asalanan. Ay anggan sik baguyna dewa ndaduwa, katanya bundi asalanan. Ay sik daduwa dumalan way ste swa daga fag ngay fagatakanun. Ay ku fakaumsigun di am dumalan kanya fag ngay mataka.

29Ku fagnalongun at masuwad te, makbang wan at fakatabuwan fag ngay menit. Anway katanya, sik taw at ke mangena fagbuluni kata nu gyud e mangena, 30ay sik taw takabalu kata nu gyud kabalu. Ay sik taw taguseganan kata yangay nu gyud guseganan. Ay sik taw at nafabul nus nge wain, kata yakman at yud e kwa. 31Ay sik taw at ke fagagbilugun ste swa daga fag ngay nanuranan, katai way yud e nanuranan. Anway ste fag daga fag ngay fagalabianun e fakatabuwan way.

32Ku fakaumsigun dangay am e nafanawaan. Sik taw nu gdi e mangena, at amatanganan sa tuwa gugat tam Fun at fagbulun, ay kaumsig tuwa nanfauseganan tam Fun. 33Ay sik taw at ke mangena, at amatanganan sa way at fagbulun ste swa daga laman gfaumsiganan at mangena. 34Nu katanya at amatanganan inkafud. Ay katanya yangay sa sangay mangena at yud e mangama, ay ate sik diyaga. Kanya nu gdi e ufud, at amatanganan sa tuwa tam Fun at fagbulun, ay kaumsig tuwa gfon at leleg sas Diyus. Ay roro at ke mangama, at amatanganan sa way at fagbulun ste swa daga laman gfaumsiganan at mangama.

35Ku fagnafoyungun sa ayu katanya, laman e fagmanabayanun tuwam. Ku fakaumsigun antuwa te, laman mabayan tuwa nu gbanwan am, ay masadi tuwa ay amatanganan nu gfaning am tam Fun.

36Sik baguwama nu gamatangan yay dawdaw sat famangenaan, anway sa at bilug at fakaumsigun ay nu gamatangan wa te, nangadaduwa wami, at masine adaduwai wan, kanya bunwa asalanan. 37Dewa katanya, nu gamatangan te, wa ban nangadaduwa sat famangenaan, anway maabaris tuwa at bilug at fakaumsigun, masine yangay katanya at fasadan. 38Nu katanya, masine way dewa nke ufud, ay glabi yay kamasine nu dway inke ufud.

39Sik mangena gfaudgufudan tuwa gugat at mangama kaduge yap ngay at mangama gleleg. Ay roro at mangama nu nkate wan, masine yangay gsarap at faduwan, sa nus nga sinu at fakaumsigun, nut sa tuwa sik tagafanud. 40Ay nu gamatangan aw, glabi yay kamasine nu dway gdog gsarap at faduwan. Dewa katanya, kanya ku amatanganan way sigad. Ay nu gamatangan aw, katanya yangay Diyus at Masine fag Falad tagsi angku at foyungan.

Currently Selected:

1 Kurintu 7: TAWEAST

Highlight

Copy

Compare