1 Kurintu 6

Duwak Tagafanud nu Garingangan way

1Am at sadi nu e nalimatan am ay fadugsay, lag nanfoyung anya sa at yud tagafanud fag tagbuknga. At masine, sai tuwa tagafanud fag tagbuknga. 2Go wam nasaful te, taguyan ban fag ngay menit, Diyus wa at ngay taw at nanlong ban sa sangay taw ste swa daga at fagbulun te, go masine ay go mauri? Ay nu mafafalong tuwam katanya, taw way ay fagyudun mafafalong katsi ay iba at fagbulun dewa alay? 3Ay go wam nasaful te, itam yangay ban at nanlong sa sangay Diyus at ngay tagfabarita te, go masine ay go mauri at fagbulun? Ay nu katanya tuwa tam, mafafasine way ro tam dewa katsi ste swa daga fag fagbulun. 4Ay nu e aringangan am, taw ro ay fagnanfoyungun sa sangay taw at yud maful sas Diyus at ngay taw? 5Ku fagnalongun katanya laman kapla tuwam takatanya ay fagbulun. Go sangay we taw gsaful gfasine tagafanud ngay aringangan? 6Ay am tagdugsayan sas fagafanudun gsudan am gfodfoyungan ay fagmauriun, ay nu gfoyung am sa way at yud gafanud.

7At matuyan, nu gfabadbaboan way am ay iba, katanya nalabawan wam. Taw ro ay fagyudun gsungatan gbaris sa sangay tagfagbulun mauri ay sangay tagfanluk ayu? 8Ay roro mangaro am yay tagfagbulun at mauri ay tagfanluk. Ay nu gfagbulun am katanya, sa wa ay fadugsay sas fagafanudun.

9Go wam nasaful te, at ngay mauri wa ban umful sas Diyus at fagmagurangan taw? Lag am galukan. Anway faggugat ban tagfagbulun mauri wa umful sas Diyus at fagmagurangan: tagseg tawtawan, takamayun, ay takamayun sa tibak ama ay tibak ina. 10Ay takamul, ay tagfangesug, ay taginum fangaranug, ay tagfalingun tiba, ay anggan takamasing at iba. 11Ebi katanya am, am tiba ay fagbulun. Ay roro katsi nafalyam wan ay ngay asalanan, ay nafasaman ayu laman at taw, ay nafatuyan ayu te, matuyan wam, anway sa tam Fun Isus ay sas Diyus at Masine fag Falad.

Ay Bilug wan Diyus Bale

12Ay e lumong te, “Masine kway long gfagbulun nus nga setaw.” Gurungan wa fiya kanya, ay roro bunwa fagayu at masine sa ayu. Ay dewa aw masine gfagbulun fagayu, dakwa nangafanuguwanan sa takatanya fag fagbulun.

13Ay e lumong yangay te, “Sik fakonun at fanambagun laman gfapsug ungdan, ay ungdan at fanambagun laman fagsuwadan fakonun.” Gurungan wa fiya kanya. Ay roro sik menit Diyus rumasras wa ban fagduwa. Tam bilug at masuwad bundi sas fakamayunun fag ngay mauri, sa tuwa nu nanfon tam tam bilug sas Diyus, ay tam Diyus wan tagfatvngvdun tam bilug. 14Diyus nafaleleg tam Fun Isus. Ay at fagmadaragangun mafafaleleg yangay ban tam bilug.

15Go wam nasaful te, itam wa fag ngay tagafanud, tam Fun Isus at bilug sik afud? Katanya at fanlonganan tam fagyudun gfagbulun sa sik fakamayunan fag mangena. 16Go wam nasaful te, sik mangama nu natsa wa sik mangena tagfabili at bilug, at bilug kata wa insadi? Anway marirukan sis Diyus at longan te, “Kanya fag duwa nsadi wan.”#6:16 Fagsigadan 2:24. 17Ay nu nsadi tuwa tam sa tam Fun, masadi wa tam sat Masine fag Falad.

18Nu katanya, saruyi wan takamayun fag taw. Ay tibak asalanan di gtaip at bilug. Ay roro sik taw takamayun gfe asalanan way sat bilug mandi. 19Go wam nasaful te, ay bilug wan at Masine fag Falad at bale, at nafat si ayu tagsiginans Diyus? Nu katanya, bunwa am tagagbilug ay bilug. 20Diyus nasali dawdaw ayu, laman at taw. Ay nu katanya, ugaliani sat masine laman nanfauseganan am ay Diyus.

Currently Selected:

1 Kurintu 6: TAWEAST

Highlight

Copy

Compare