1 Kurintu 5

Faurianan sa Tagasalanan

1E nadungug aw te, am at sadi gasalanan way am, glabi yay sat yud gafanud at asalanan, anway at baguwama natsa at tina. 2Ay dewa katanya, gfalabi yay am sa ay amatanganan. Ay roro satu abalui way. Ay nu e gfagbulun way katanya fag asalanan, ayani wan siginan ay fagmafulan.

3-5Dewa ku bilug yud sanya, ku amatanganan sanya tuwa. Sa tam Fun Isus at ngayan, nafatuyan akwa fiya te, kanya fag taw sik tagasalanan wa fiya. Nu katanya, gina am maful, amatangani te, ku falad maful yangay ayu sanya. Ay ayani wan ka fag taw laman Satanas wan tagmagurang anya ay laman umfauri wan at bilug, ay at falad long umlangfe tuwa nu mdasug ban tam Fun at menit. Fagbuluni katanya anway tam Fun Isus nafon antam fagmadaragangun.

6Nu gfalabi way am ay longan, katanya wa masine. Go yam nasaful tuy fag fafaskudanan te, “Sik famadaul tinafay dewa alay sirut, mafafadaul way fagdaul tinafay. Go kin?” 7Nu katanya, ukasi wan ka fag famadaul tinafay, at masuwad, at dan ay ugali, laman ay ugali bagu wan. Fakatanyaun, inbagu wan ay ugali, teway nafon wa sa antam tam Fun Isus kata sik anyun fag tupa gina sis fagmafulun sa baliwa Tagfabarita nu Glangfe. 8Nu katanya, nangamatangan tuwa tam gugat kanya fag fagmafulun. Ay di kata at dan fag famadaul tinafay, at masuwad, tam dan fag ugali. Ay katsi nangugali watam sat masine ay sat matuyan.

9Ebi nariruk akwa sa ayu te, lag gfaygaluwan sa takamayun fag ngay taw. 10Ku longan at masuwad antuwa te, lag gfaygaluwan ste swa daga fag ngay takamayun, ay tagfangesug, ay at takamul, ay anggan at tagseg tawtawan. Anway nu gdi am gfaygaluwan takatanya fag ngay taw, kata wam naubun ste swa daga. 11Ku nalong aro te, lag gfaygaluwan sik taw taglong te, gafanud aw, ay roro kamayun way, ay gfangesug ay igseg tawtawan, ay gfalingun tiba, ay ginum fangaranug, ay anggan kamul. Lag am gfangon gfasfuwan takatanya fag ngay taw. 12-13Bunwa aw at taglong sat yud gafanud fag ngay taw te, “E asalanan way am.” Diyus way fagtvngvd at taglong sa anya te, “E asalanan way am.” Ay roro am wa mandi tagamatangan sa baliwa ay fadugsay te, go matuyan at fagbulun ay go yaya. Anway marirukan sis Diyus at longan te,

“Ayani wan ka fag ngay taw mauri si ayu.”#5:12-13 Diyuterunumyu 13:5; 17:7; 19:19; 21:21; 22:21,24; 24:7.

Currently Selected:

1 Kurintu 5: TAWEAST

Highlight

Copy

Compare