1 Kurintu 4

Tam Fun Isus At ngay Nasugu fag ngay Taw at Fagbulun

1Katatuyi ay amatanganan sa emi te, ami tam Fun Isus at fanuguwan tagfoyung at masuksukan fag foyungan sas Diyus baliwa. 2Ay at masine sik tagfoyung antuwa mafanfaning. 3Masine way sa angku dewa am gamatangan te, ku fagbulun mauri way, ay anggan tibak taw katanya yangay at amatanganan. Aw, dakdi e namatangan ku fagbulun mandi at mauri. 4Nu tengap masine tuwa ku amatanganan te, dakdi e asalanan. Diyus wadi at mafafalong te, go ku fagbulun matuyan tuwa, ay go e asalanan kway. 5Nu katanya, lag yap gsarap sik taw at asalanan nu dyay indasug sit kasakan fag lungud. Fanyai yap Isus nu kadasug. Gina ban ndasug, gfasure wa ban fagayu taw at ke suksukan ay at ke fatuganan. Ay ginanya ban fag lungud, fagayu taw mul wa ban Diyus at famauseganan nus nga setaw at nafagbulun.

6Ku ngay fadugsay, aw ay Apulus ay fagfaningan laman e fanambagun tuwam, ay sumaful am at masuwad tuy fag fafaskudanan te, “Lag glabi nus nga setaw at marirukan sis Diyus at longan.” Nu katanya, lag am gfandaragang ay nanlong te, at sadi glabi yay sat tiba. 7Taw ay faglabiun ay iba? Nataw tagsi ayu at yud siginans Diyus? Fagayu ngap nu siginan way anya, taw ro ay fagfalabiun kata nu am wan tagagbilug fagayu?

8Nu gfasad am fagayu ay nayudanan si wa ayu, ay gamatangan wam te, mabalan wam, ay gmagurang wam sis Diyus at fagmagurangan taw gina yud ami sanya. Masine satu nu gmagurang wam laman gmagurang yangay ami gfasfuwan ayu. 9Nu gamatangan aw, ami fag ngay Nasugu sa sangay taw, kata way ami tiba daga fag taw, at mafamasadan at fagnanfateun ay fagayu taw sas fagdaul daga ay ngay tagfabarita at faglinggatun. 10Anway ami tam Fun Isus at taw kata way ami at yud e nasafulan. Ay nu gfasad am kata wam sik ngay taw at ke fagsafulun, teway si wam tam Fun Isus. Mafanalo way ami, ay nu gfasad am, mabitsug wam. Ngay taw galang tuwa ayu, ay ami, gafalingunan way ami. 11Anggan katsi kalunus ay kadanum way ami, ay wa ngayu em balukas ay kalimata way emi, ay wami e bale. 12Gfangugat tuwami nu gfagbulun laman e fakonun tuwami. Nu e gfalingun emi, igfamanyun ami anya. Ay nu e gfauri emi, gbaris tuwami. 13Fagalay e gelongan sa emi baliwa, malukme tuwa nu gbalus ami. Ay anggan katsi, kata way ami sik naglimatan ste swa daga.

14Ku fagnarirukun bunwa te, nanfaplan aw ayu, antuwa te, laman gfaamatang aw ayu, ku fakesugun ku ngay sisiyan. 15Anway dewa ngayu ay takamoyung sa baliwas tagafanud at ugali, sadi tuwa ay tama sas fagafanudun. Sa tam Fun Isus baliwa, aw wan ay tama, anway nafoyung aw ayu at Masine fag Barita. 16Nu katanya, matvngvd nu glong aw ayu te, faningi ku ugali. 17Fakatanyaun, nasugu aw Timutiyu sa ayu, ku fakesugun ku unga at matuyan sa tam Fun. Ay kanya gfaamatang ban ayu ku ugali sa baliwa tam Fun Isus. Katanya yangay ku foyungan sa sangay simban nus nganday.

18Ay am tiba gfalabi wam teway gamatangan am te, kwa ban kafoli sanya. 19Ay roro tam Fun nu kaumsig, katsi ban daw tv, kafoli kyay ban sanya, ay nanlinggat aw ka fag ngay taw tagfalabi nu gelongan. 20Anway gsaful tuwa tam nu Diyus tuwa tagmagurang sik taw siginan at ngay fagbulun, bundi si at longan fagtvngvd. 21Ay katsi, nataw ay fakaumsigun? Go kadasug ban aw madotaman, ay ate kadasug aw malukme ay e fakafanyuun?

Currently Selected:

1 Kurintu 4: TAWEAST

Highlight

Copy

Compare