1 Kurintu 3

Diyus at ngay Fanuguwan

1Ku ngay fadugsay, ebi kwa mafafasulitanan ayu kata sa sik taw at ke Masine fag Falad. Nu katanya, bilang sik ngay taw tagfaning at bilug at fakaumsigun, ay at masisiyanan yay at fagafanudun sa tam Fun Isus, 2ku foyungan ayu kata yay sik susu bilug, ay bunya sik matigas fag ngay fakonun, anway yam mafafabul at mafalyu fag ngay fagalongunun, ay anggan katsi yam mafafabul. 3Teway gfaning yay am ay bilug at fakaumsigun. Ay gfangalabian yay am ay garingangan. Takatanya gfasaful yay am te, gfaning yay am ste swa daga fag ngay taw at ugali. 4Fagalay am glong te, “Aw, igfaning akwa Pablu.” Ay am at sadi glong yay am te, “Aw, igfaning akwa Apulus.” Katanya ay fagbulun, gfaning yay am ste swa daga at ugali. Go kin? 5Sinu sangay Apulus? Ay sinu kway sangay? Ami, Diyus way ami at fanuguwan laman ban gafanud tuwam sa em foyungan. Ay gfagbulun way ami tam Fun at fon emi fag fagbulun.

Sik Fafaskudanan, Am wan Diyus at Gamasun

6Aw wan tagtanum ay Apulus tagfarugme, ay Diyus wan at tagfarabung. 7Ay at mafanud fiya fiya, Diyus tuwa tagfarabung, ay bundi tagtanum ay at tagfarugme. 8At natanum ay at nafarugme gsud way sik tagfagbulun. Ay kanya gsud ban mul at nalufuyan katvngvd at nafagbulun. 9Ami wan tagtarabangan bilang Diyus at tagfagbulun sat fagbulun baliwa. Ay kata yangay am Diyus at gamasun, ay kata yangay am at bale. 10Ay aw, at tagsaful fiya fiya, takawat ngay turuk at fagfatungkudan katvngvd tam Diyus nafon angku fag fagsafulun. Ay tibak taw tagfatunglus kawat ka fag bale. Ay nu katanya, maadani tuwa fagayu takawat bale. 11Fakatanyaun, we taw mafaawat tibak fagfatungkudan, dasday at maawatan wan. Ay ka fag fagfatungkudan tam Isus wan, Diyus at nafili fag Fun.

12Ay tibak taw nu kawat sanya fag fagfatungkudan, at fangawat antuwa at ngay masine ay at mafanud fag ngay batu kata gintu ay pilak. Ay at tiba at fangawat anwadi kayu, ay at kinyango fag ngay don, ay nagutan. 13Ay gina ban Diyus at menit umdasug, umsure wa ban fiya fagayu taw at nafagbulun teway nanfaskud ban sas afuy. 14Ay at ngay naawat nu gdi kalabe, ka fag takawat fabul ban at nalufuyan. 15Ay roro at ngay naawat nu kalabe way, ka fag takawat wa ban e nalufuyan. Dewa katanya, umlangfe tuwa, ay teway kata way sik taw at nalfas siginan sad afuy at yud e ubanan at fagnuwan.

16Go sangay wam gsaful te, am wan Diyus bale, ay at Masine fag Falad tagbanwan si ayu? 17Nus nga sinu at rumasras Diyus bale, Diyus gfauri ban anya, teway Diyus bale mafilian. Ay kanya fag bale we tiba, am wan.

18Lag gfanluk ay balyu. Nus nga sinu fag taw tagamatangan te, e fagsafulun aw kata ste fag daga at fagsafulun, at masine kanya ubuni wan takatanya fag amatanganan, laman umke fagsafulun tuwam sas Diyus. 19Teway Diyus gsaful wa te, ste fag daga at fagsafulun we masuwad. Kata at marirukan sis Diyus at longan te, “Diyus iggamat ngay masafulan at amatanganan sat nafamuwagan.”#3:19 Ub 5:13. 20Marirukan yangay sis Diyus at longan te, “Tam Fun gsaful te, sik taw at masafulan nu gfanlonganan we fanambagun.”#3:20 Danyu 94:11. 21Ay nu katanya, lag gfandaragang ay iba at nafagbulun, teway tam Diyus nafon wa sa ayu fagayu, laman sa ay fagmasineun. 22Aw, ay Apulus, ay Pedru, ami fagayu gtarabang way ami ayu. Dewa fagdaul daga, dewa faglelegun ay fakateun, dewa katsi ay dewa katsi ban, kanya fagayu si wa ayu. 23Ay am wan tam Fun Isus at taw, ay tam Fun Isus Diyus at baguwama.

Currently Selected:

1 Kurintu 3: TAWEAST

Highlight

Copy

Compare