1 Kurintu 2

Pablu at Foyungan sas Isus at Naatean baliwa

1Ku ngay fadugsay, ebi gina aw nasanya sa ayu laman nanfoyung at masuksukan fag foyungan sas Diyus baliwa, dakwa naelongan at mafalyu ay masafulan fag ngay longan. 2Anway ku fasadan fiya fiya nanfoyung aktuwa sa ayu sa baliwa tam Fun Isus ay anggan at naatean sas salibagan kayu. 3Nalo aw sanya sa ayu mafanalo ay malimuwanan dawdaw. 4Ay gina aw nafoyung ayu, dakwa nalong at masine fag ngay longan kata taw at fagsafulun laman ggewan ayu. Ay roro, at Masine fag Falad tuwa tagfatuyan ku foyungan siginan at fagmadaragangun. 5Nu katanya tuwa, sik taw at fagafanudun bunwa siginan at fagsafulun, siginan tuwa Diyus at fagmadaragangun.

Diyus at Masine fag Falad at Fagfoyungun

6Ay dewa katanya, gfoyung tuwami sa at taglugo wan fag ngay tagafanud, ay em foyungan fag fagsafulun wa ste ginan fag daga fag fagsafulun, ay wa siginan sangay tagmagurang ste swa daga. Ka fag ngay tagmagurang umfaurianan ban. 7Ay ku longan fag fagsafulun, siginan tuwas Diyus fagsafulun at fag suksukun ebi. Kanya at nafamasadan sa antam gina bagu kawat fagdaul daga. 8Ay ka fag fagsafulun nus di sadik fun ste swa daga we nasaful, anway nu nasaful di, wa ro natuktuk tam Fun sas salibagan kayu. 9Marirukan sis Diyus at longan te,

“We taw batang nalag, ay nadungug, ay namatangan nus nge wain Diyus at nafamasadan sa sangay taw takesug anya.”#2:9 Isayas 64:4.

10Diyus nafasaful wa sa antam at nafamasadan siginan at Masine fag Falad. Anway at Masine fag Falad nasaful wan fagayu anggan Diyus at amatanganan at mafalyu. 11Sik taw wa nasaful at tiba at amatanganan. Kanya way fag taw tagsaful mandi at amatanganan. Katanya yangay, we taw nasaful Diyus at amatanganan nu bunway at Masine fag Falad mandi. 12Diyus wa at Masine fag Falad tagsi antam ngay tagafanud, bunwa tagste swa daga fag falad. Nu katanya, sumaful wa tam Diyus at nafon antam fag ngay famanyun. 13Em foyungan siginan tuwa at Masine fag Falad at nafaamatanganan emi fag longan, ay bundi siginans taw at mamatanganan fag longan. Gfoyung ami Diyus at longan sa sangay taw at ke Masine fag Falad. 14Sik taw at yud e Masine fag Falad wa kaumsig Diyus at longan tagsiginan at Masine fag Falad, anway gamatangan way te, we masuwad. Ay kanya wa nasaful at masuwad, anway ka fag fagsafulun at sumaful kayu way at ke Masine fag Falad. 15Ay sik taw nu e Masine fag Falad tuwa, gsaful tuwa te, go e masuwad, ay go yaya. Ay sik taw nu dway e Masine Fag Falad wa gsaful te, go e masuwad, ay go yaya. 16Marirukan sis Diyus at longan te,

“Sinu tagsaful tam Fun at amatanganan?

Ay sinu ya ro at mafafangatulun anya?”#2:16 Isayas 40:13.

Ay roro, tam amatanganan kata yangay tam Fun Isus at amatanganan.

Currently Selected:

1 Kurintu 2: TAWEAST

Highlight

Copy

Compare