1 Kurintu 1

1Aw, Pablu. Tam Diyus nafili wa angku laman tam Fun Isus at Nasugu at sadi. Ami duwa tam fadugsay Sustenes, 2griruk ami sa ayu, Diyus at ngay taw sis fulan Kurintu. Tam Diyus nafili wa ayu anway insadi wam sa tam Fun Isus. Nafili wa ayu laman at ngay taw gasfuwan fagayu tagseg sa tam Fun Isus, dewa nus nganday fag talun. Kanya at Fun sas fagayu.

3Igdarangin aw sa tam Diyus tam Tama ay sa tam Fun Isus te, famanyuni ay fanabayani ayu.

Sik Fagusegananun sas Diyus

4Faggugat guseganan aw sas Diyus teway kanya nafamanyun ayu, anway insadi tuwam sa tam Fun Isus. 5Sa ay naasadian sa tam Fun Isus, Diyus nafaugat yay ay fagsafulun, ay ay fagsafulun nu gelongan, ay ay fagsafulun nus nge wain. 6Anway katanya, nasaful am te, em ngay foyungan matuyan tuwa sa baliwa tam Fun Isus. 7Ay katanya tuway, di am e fagayudanun siginan at Masine fag Falad at nafamanyun, kaduge am igfanya tam Fun Isus nu kafoli. 8Kanya gfatvngvdun gugat ay fagafanudun anggan sas fakatabuwan, laman di am umke asalanan anggan tam Fun Isus umdasug. 9Matuyan tuwa tam Diyus at nafili ayu laman umsadi am sat Baguwama, tam Fun Isus.

Fagayu Tagafanud Masadii tuwa

10Ku ngay fadugsay, matvngvd nu nalong aw sa ayu sa tam Fun Isus at ngayan te, fagayu am masadii tuwa laman di e gfasadsamanan ay amatanganan. Masadii tuwa sa ay amatanganan ay sa ay fasadanan. 11Ku fagnalongun katanya, e nafoyung angku siginans Kluwe at bale te, garingangan way am unu. 12Katatuy ku fagalongunun sa ayu te, am at tiba glong am te, “Ku fagfaningun sa tuwas Pablu.” At tiba glong te, “Ku fagfaningun sa tuwas Apulus.” Ay tiba glong te, “Sa tuwas Pedru.” Ay tiba glong te, “Sa tuwa tam Fun Isus.”

13Go sangay tam Fun Isus inkafud? Ay go sangay aw, Pablu, at kintuktuk sas salibagan kayu laman sa ayu? Ay go sangay sa ku fagmadaragangun nu kasurung am? 14Guseganan aw sas Diyus di aw e nafasurung dasday Krispu ay Gayus. 15Nu katanya, we mafafalong te, insurung am sa ku fagmadaragangun. 16E kin, nafasurung kyangay mangaro Estefanas fag bale at ngay taw. Saman kayunya, kwe namatang ku nafasurung. 17Anway tam Fun Isus fagnasuguun angku bunwa te, nanfasurung aw taw. At suguwan angku antuwa te, nanfoyung aw at Masine fag Barita. Ay ku foyungan bundi siginan at ngay taw at fagsafulun, laman di malyam tam Fun Isus at fagmadaragangun at naatean sas salibagan kayu.

Diyus at Fagmadaragangun ay at Fagsafulun Tam Fun Isus wan

18At foyungan sa baliwa tam Fun Isus at naatean sas salibagan kayu, sa takafaurianan fag ngay taw, we masuwad, fanlamangan way. Ay roro sa sangay kinlangfe, kanya fag foyungan Diyus wa at fagmadaragangun. 19Anway marirukan sis Diyus at longan te,

“Nanfalyam akwa ban at masafulan fag ngay taw at fagsafulun.”#1:19 Isayas 29:14.

20Tain katsi at fanambagun at masafulan fag taw, ay at tagfoyung Muisis at Suguwan, ay at tagfabadbaboan katsi fag lungud? Diyus nafalag wa te, ste swa daga fag fagsafulun we fanambagun. 21Anway sas Diyus at fagsafulun, wa nkumsig taw nu sumaful anya siginan ste swa daga fag fagsafulun. Diyus at fakaumsigun gfalangfe tuwa at ngay taw tagafanud sa at Masine fag Barita at foyungan, dewa tibak taw nu gfasad fanlamangan way.

22Taw Udyu wa gafanud yap ngay nalag at madulawan fag fagbulun. Ay taw Gresiya gfadlabian at foyungan sit fagsafulun. 23Ay emi, em foyungan sa tuwa tam Fun Isus at kintuktuk sas salibagan kayu. Ka fag foyungan kata way sik famataid sa sangay taw Udyu. Ay kata way sik fanlamangan sa sangay taw at yud Udyu. 24Ay roro sas Diyus at nafili fag ngay taw, dewa taw Udyu ay dewa taw Gresiya, kanya gafanud wa fiya te, tam Fun Isus wan tagfasure sa sangay taw Diyus at fagmadaragangun ay at fagsafulun. 25Ngay taw nu glong we fanambagun Diyus at fasadan nu gfalangfe ngay taw. Dewa katanya, kanya fag fasadan glabi yay taw fagsafulun. Ay ngay taw nu glong Diyus mafanalo way madyay Isus inkate way, takatanya fag amatanganan glabi yay taw fagmabitsugun.

26Ku ngay fadugsay, amatangani te, “Tain am ebi gina Diyus bagu nafili ayu?” Wa ngayu si ayu at masafulan tagste swa daga, ay wa ngayu at madaragang tagsiginan takadungug fag fulan taw. 27Ay roro Diyus nafili ste swa daga at yud way masafulan fag ngay taw, laman gfaplan ste swa daga at masafulan fag ngay taw. Ay Diyus nafili ste swa daga at yud madaragang fag ngay taw, laman gfaplan ste swa daga at madaragang fag ngay taw. 28Ay Diyus nafili ste swa daga at ngay taw at yud katvngvd tiba ay gafalingunan, ay anggan kata way sa sik yud e masuwad, laman at ke masuwad ste swa daga, wa ban e masuwad. 29Nu katanya, we taw gfalabi at longan sas Diyus at akbang. 30Anway sa anya, si wa tam Isus, at nafasure sa antam fag fagsafulun. Siginan anya Diyus natap antam te, matuyan, nafasaman laman sa anya, ay nabul siginan asalanan. 31Kata at marirukan sis Diyus at longan te,

“Nus nga sinu takaumsig nanfalabi tiba, tam Fun yakman at fagbulun at fagfalabiun.”#1:31 Eremyas 9:24.

Currently Selected:

1 Kurintu 1: TAWEAST

Highlight

Copy

Compare