1 Kurintu 15
15
At Foyungan sa baliwas Isus nu Gdog Gleleg
1Ku ngay fadugsay, katsi gfaamatang kyay sa ayu at Masine fag Barita ku nafoyung sa ayu, ay fagfaningun anggan katsi. 2Siginan at Masine fag Barita umlangfe wam, nu mated tuwam fiya fiya sa ku foyungan. Nu dway katanya, wa matuyan ay fagafanudun.
3Ku nafoyung sa ayu kanya yangay at nafoyung sa angku, at tiba tungud fag foyungan: tam Fun Isus inkate laman nanfalangfe antam siginan tam ngay asalanan, kata at marirukan sis Diyus at longan. 4Ay e nalibing anya, ay sis fatuluk menit Diyus nafadog nafaleleg anya, kata yangay at marirukan sis Diyus at longan. 5Ay kanya nsure sas Pedru, ay at fadogan sat iba at Nasugu fag Labi Duwa. 6Ay bandi ataw insure yay fiya sa tam ngay fadugsay gina maful, glabi yay 500k taw. At ngayu sanya gleleg yay. Ay tiba nkate wan. 7Ay kanya nsure yangay sas Santiagu ay anggan sas fagayu at Nasugu. 8Ay sis fakatabuwan, insure yangay sa angku. Kata aw at yud infasadan nu kasalug sas fagafanudun. 9Ay aw wan at tiba daga sas fagayu at Nasugu. Nu katanya, wa kasakan gfangayan angku te, at Nasugu, anway nafauri aw dawdaw Diyus at ngay taw.
10Ay dewa katanya, Diyus nafamanyun yay sa angku laman aw yangay at Nasugu. Ay di nfangulan at nafamanyun sa angku, anway nu gfagbulun aw glabi yay sa ku iba at ngay nafagbulun. Kanya fagayu bunwa siginan ku fagmabitsugun mandi, siginan tuwa Diyus at fanarabangun. 11Ku foyungan ay ku ngay ibama at foyungan sadi yay, ay gafanud am kata em foyungan.
At ngay Kinkate Gdog yay ban Gleleg
12Ay nu gfoyung tuwa ami te, tam Fun Isus gdog yay inleleg siginan at fagmateanan, taw ro tibak taw at fagnalongun te, wa ban gdog gleleg at kinkate? 13Nu matuyan wa fiya te, wa ban gdog gleleg, anggan ro tam Fun Isus wa nadog gleleg. 14Ay tam Fun Isus nu dway nadog gleleg, wa ro e masuwad em foyungan. Ay anggan ay fagafanudun we masuwad. 15-16Ay nu katanya way ro ami, sik takamuwagan way ami sa baliwas Diyus. Teway gfoyung ami te, Diyus gdog yay nafaleleg tam Fun Isus. Ay roro, at kinkate nu dway ban gdog gleleg, tam Fun Isus wa nadog gleleg. 17Ay nu dway ro nadog gleleg tam Fun Isus, ay fagafanudun we masuwad, anggan ay asalanan ya nafalyam, 18ay anggan at ngay tagafanud sa tam Fun Isus at kinkate, kanya sigon malyam wa ban. 19Tam fagsegun sa tam Fun Isus nu ste way fag leleg fagtvngvd, itam wa ban at mason nu mafanyu sas fagayu taw.
20Ay roro at matuyan, inleleg wa fiya tam Fun Isus, kanya sik famatuyanan sa sangay taw te, gdog yay ban gfaleleg at ngay kinkate. 21Ay siginan sadik taw fakateun indasug ste swa daga. Ay katanya yangay, siginan sadik taw dog yay ban umleleg at ngay matean. 22Teway nus nga setain ban fagayu taw nu mkate, anway sa tam aguyangan ebi Adan at nafagbulun, katanya yangay, fagayu umleleg yangay ban anway sa tam Fun Isus at nafagbulun. 23Ay fagayu e ngay lungud tuwa gina gdog gleleg, taguna at kinleleg tam Fun Isus, ay at fadogan, tam Fun Isus gina ban umdasug ste swa daga faleleg ban fagayu tagafanud sa anya. 24Ay umdasug ban at fakatabuwan fag ngay menit. Ay tam Fun Isus gina ban mabo fagayu fagmagurangan, ay fagayu fagmagurangun ay fagmadaragangun, mon wa ban sa at Tama, sas Diyus, at fagmagurangan. 25Anway tam Fun Isus nanmagurang ban, yap ngay fiya fiya mamin fagayu at ngay fabarangyan. 26Ay at fakatabuwan, tam Fun Isus at fagnanfabarangyanun fakateun. 27Marirukan sis Diyus at longan te,
“Diyus nafat sa wa tam Fun Isus at daga fagmadaragangun fagayu nus nge wain.” #15:27 Danyu 8:6.
At masuwad at longan te, “fagayu nus nge wain,” bunwa Diyus sigon. Anway kanya wan at nafat sas Fun Isus at daga fagmadaragangun fagayu. 28Ay fagayu nu si wa at Baguwama daga fagmadaragangun, kanya nafababaun tuwa sas Diyus at daga fagmadaragangun, laman Diyus wan at tagmagurang fagayu.
29Ay nu dway gdog gleleg at kinkate, tain ro sik taw at kinsurung sasad safa at fanambagun nu dway ban gdog umleleg at ngay matean? 30Faggugat em leleg sa way sad malimu. 31Ku ngay fadugsay, at matuyan e gafateun wa fiya angku kayu menit kayu menit. Ku fagnafoyungun sa ayu katanya, anway guseganan aktuwa dawdaw sa ayu, teway insadi watam sa tam Fun Isus. 32Gatakan aw iste sfulan Efesu teway ku fabarangyan kata sik malimu fag idu talun. Ay ku ngay fasadanan nu kata way ste fag ngay taw at naumsigan, wa ro e fanambagun. Ay nu matuyan way te, wa ban umleleg at ngay kinkate, amasine yap nu gfaning tam tuy fag longan te,
“Oni way ay inumi, teway labon balabag kate watam.”#15:32 Isayas 22:13.
33Lag am galukan ka fag longan. Anway sik mauri fag faudgufudan, gfalyam way at matuyan fag ugali. 34Fasineuni ay amatanganan sat matuyan, ay lag gdog gasalanan. Ku fagnalongun katanya, laman umkapla am sa ay amatanganan, teway am at tiba yam nasaful tam Diyus at ugali.
Tam Bilug nu Gdog yay Gleleg
35Nu ndain tibak taw minto ban te, “Tain ban nu gdog gfaleleg at ngay kinkate? Ay tain ban at bilug gina gdog inleleg?” 36Am at yud yay e fagsafulun! Nu natanum sik butul sas daga, wa ban tumugbung nu dway nalyam at lukba. Katanya yangay sik taw, nu dway inkate wa ban gdog gleleg. 37Ay nus nga setaw fag butul am natanum, fare ay tiba yak fantanum, nu natugbung wan, kanya nbali wan. 38Ay Diyus wan tagfe fun ka fag tanum, kata at fakaumsigun. Ay kanya fag ngay fantanum, wa kata at sadi nu natugbung wan.
39Ay anggan fagayu tagleleg ste swa daga, wa kata at sadi at faknul. Fagayu bilug wa kata at sadi, tenday sik taw, sik balan, sik manuk, ay anggan uyang. 40Saman wan tagsas banwa fag bilug ay ste swa daga fag bilug. Ay tagsas banwa fag bilug at fagmasineun saman yay ste swa daga fag bilug at fagmasineun. 41Saman way menit nu gdamlag ay magdanun. Ay saman yangay ngay galeme nu gdamlag, dewa te ka fag ngay galeme sadsamanan way nu gdamlag. 42Ay katanya yangay ban at kinkate nu gdog leleg. At nalibing fag bilug karuwas way, ay at nadog gleleg fag bilug wa ban karuwas faggugat ban. 43Ay at nalibing fag bilug dewa gyud masine ay dewa mafanalo, gina ban nadog gleleg at bilug masine tuwa ay mabitsug tuwa. 44At nalibing fag bilug, tagste way swa daga. Ay gina ban gdog nafaleleg at bilug fanbanwa wan, teway nu e bilug fandaga e bilug yangay fanbanwa. 45Kata at marirukan sis Diyus at longan te, “Taguna fag taw, Adan, Diyus naawat ay nafon anya at leleg tagste swa daga.”#15:45 Fagsigadan 2:7. Ay at fakatabuwan fag Adan, tam Fun Isus, sik falad tagfon leleg. 46Ay bunwa fanbanwa fag bilug at taguna. Fandaga fag bilug yay at taguna. Ay at fadogan fanbanwa wa fag bilug. 47At taguna fag taw siginan ways daga. Ay at faduwak taw siginans banwa. 48Ay at ngay taw tagsis daga, kata yangay at taguna fag taw siginans daga. Ay at ngay tagsis banwa, kata yangay tagsiginans banwa fag taw. 49Ebi fagayu tam kata yay tam ka fag taw tagste swa daga. Ay bandi ban kata yangay tam ka fag taw tagsas banwa.
50Ku ngay fadugsay, ku fagalongunun at masuwad te, tagste swa daga fag bilug wa mafaagbilug Diyus fagmagurangan taw. Tuy fag bilug takaruwas, wa masine gbul leleg at yud e fakatabuwan. 51Dungugani! Nanfoyung aw sa ayu sik masuksukan fag foyungan sas Diyus baliwa te, bundi tam fagayu at kumkate ban, ay dewa katanya, fagayu tam e tumubus yay tam bilug. 52Sik kadugayun sirut, kamafali sik liplip, ay gasfuwan gina taguyan fag budyung, gdog wa gfaleleg at ngay matean, ay mon ban sik bilug at yud karuwas. Ay itam at yud inkate mon yangay antam sik bagu fag leleg. 53Anway tam bilug at takaruwas umtubus yay at yud karuwas, ay tam bilug at takate umtubus yay at yud kate. 54Anway tam bilug at takaruwas nu ntubus wa at yud karuwas, ay tam bilug at takate nu ntubus wa at yud kate, umgurungan wan at Rirukan at nalong te,
“Fakateun, nalabawan wan; katsi long nababo wan.”#15:54 Isayas 25:8.
55“Fakateun, dada wan am fanbabo?
Dada wan am fagmadaragangun?”#15:55 Usea 13:14.
56Anway fakateun at fagmadaragangun asalanan, ay asalanan at fagmadaragangun siginans Muisis at Rirukan. 57Katsi guseganan watam sa tam Diyus, teway kanya nafat si antam at fanbabo, anway sa tam Fun Isus at nafagbulun.
58Nu katanya, ku fakesugun ku ngay fadugsay, katsi fatvngvdi ay amatanganan, ay lag fainbalian. Faggugat maseganamai sa tam Fun at fagbulun, anway nasaful wam te, ay fagbulun sa tam Fun e fanambagun wa ban fiya.
Currently Selected:
1 Kurintu 15: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
