1 Kurintu 14

Sik Foyungan sa at Masine fag Falad at Famanyun

1Ugati tuwa nu gyafatsiun am ayu fakafanyuun. Ay ugati yangay nu gyafatsiun am ayu at Masine fag Falad at ngay famanyun. Ay kaugat wan nu gfamoyung am Diyus at longan. 2Sik taw tagelongan sa tibak fanlong at yud nasaful, at fasulitanan bunwa taw, sa ways Diyus, teway we taw nasaful ka fag fanlong at masuwad. Ka fag taw gelongan at yud katogdungug fag fanlong, teway at Masine fag Falad gtarabang anya. 3Ay roro tagfoyung Diyus at longan, kanya gfasaful sa sangay taw laman fatarabang, ay umtvngvd at fagafanudun, ay manga umtvngvd at amatanganan. 4Ay sik taw tagelongan sa tibak fanlong at yud nasaful, at fagfatvngvdun sa way anya mandi. Ay roro sik taw tagfoyung Diyus at longan, kanya gfatvngvd tuwa ngay taw tagafanud. 5Kaumsig kway nu sumaful am gelongan sa tibak fanlong ay fagyudun gsaful. Ay roro, ku fakaumsigun fiya fiya nanfamoyung tuwam Diyus at fanlong, anway sik tagfoyung Diyus at longan amasine yap sa sik tagelongan sa tibak fanlong ay fagyudun gsaful. Ay nu an di ro gfayamag at fagalongunun, gfatvngvd tuwa ngay tagafanud.

6Ku ngay fadugsay, go e fanambagun ro sa ayu nu nasanya aw, ay nangelongan aw sa tibak fanlong ay yud nasaful? Yaya. At ke fanambagun, nu nafoyung aktuwa sa ayu foyungan siginans Diyus. Tenday, sik fagsafulun. Ay manga sik foyungan. Ay ate sik foyungan at masuwad.

Sik Fafaskudanan sas Famaawangan baliwa

7Sik famaawangan at yud gleleg kata plauta ay alpa, nu dway kasaful at fagfaawangun at masuwad, setain ro at nadungug nu sumaful te, takanya fag danyu at fagfaawangun? 8Ay sa sik tagbudyung nu dway nafayamagun nu gbudyung, tain ro ngay tagfabarangyan nu sumaful te, famasadani wan sas fagfabarangyanan? 9Ay katanya yangay anggan am, tain ro ngay tagafanud nu tumogdungug am longan nu tibak fanlong way? Wa ngap ro nasaful at masuwad, ay kata way ro o gfasulitanan sas tagmara. 10Ngayuk fanlong sas fagdaul daga, ay fagayu fanlong e masuwad tuwa. 11Ay nu gsudan way ami gyud gsadsafulan em fanlong, wa ro e masuwad em elongan. 12Anway kaumsig tuwam dawdaw gyabulun at Masine fag Falad ngay famanyun, ugatani tuwa buli ka fag ngay famanyun laman gfatvngvd tuwam at ngay tagafanud.

13Ay nu katanya, sik taw tagelongan sa tibak fanlong at yud nasaful, darangini tuwa te, laman gsaful tuwa gfayamag at masuwad. 14Ay nu gdarangin kwa sa tibak fanlong ku yud nasaful, tagsi angku fag falad gdarangin wa fiya, ay roro ku amatanganan wa nasaful at masuwad. 15Nu katanya, tain ku balyavtan? Dumarangin aw ay dumanyu sa tagsi angku fag falad, dewa aw gyud nasaful at masuwad. Ay dumarangin kyangay fiya ay dumanyu, laman sumaful aw at masuwad. 16Ay nu nanfauseganan o sas Diyus nu sa tagsi way emu fag falad, at yud way kasaful fag fanlong, tain ro tibak taw mafabalus te, “Katanyai tuwa” nu dway nasaful am fagalongun at masuwad. 17Ay dewa masine am fagusegananun sas Diyus, nu dway nasaful am fagalongun at masuwad, dia mafafatvngvd am iba. 18Guseganan aw sa tam Diyus, anway mafafaelongan aw sa tibak fanlong ku yud nasaful, ay nalabi akyay ayu. 19Dewa katanya, nu si was fagngayuwan taw, amasine yap sa angku nu sumaful tuwam ku foyungan dewa limak tunglus longan wadi. Dewa ngap ro 10,000k tunglus longan nu dway ngap ro am e nasaful, we masuwad.

20Ku ngay fadugsay, nu gamatangan am dangai kata sik sisiyan. Ay galay sas asalanan, katai ngenge at yud e nasafulan sas asalanan. Ay roro sa baliwa nu gfantogdungug am, nu gamatangan am katai tuwa sik magurang. 21Marirukan sis Diyus at longan te:

“Tam Fun nalong te,

‘Nanfoyung ban aw tuy fag ngay taw. Ay nansugu ban aw sik ngay takamoyung tagsadsamanan at ngay fanlong ay siginan tibak talun.

Ay dewa katanya, ka fag ngay taw wa gdungugan angku.’ ”#14:21 Isayas 28:11-12.

22Nu katanya, tagelongan sa tibak fanlong at yud nasaful, sik fagsafulan way sat yud gafanud fag ngay taw, ay bunwa sat ngay tagafanud. Ay at fagfoyungun nu antuwa Diyus at longan sik fagsafulan sat ngay tagafanud ay bunwa sat yud gafanud. 23Ay nu katanya, gina am maful fagayu sis bale fakafulan, ay fagayu gelongan am sa tibak fanlong ay yud nasaful, ay sik taw at yud gafanud nu nasakbo, go di ro manga gamatangan te, fagayu taw iste we amatanganan? 24Ay roro fagayu am nu gfoyung tuwam Diyus at longan, ay e sik yud gafanud indasug sanya, ay wa gsaful ay fagbulun, ka fag taw sumaful te, kanya sik tagasalanan. 25Ay ka fag taw sumaful at amatanganan at masuksukan. Nu katanya, kanya kabalu sat ngay nafagbulun mauri, ay sumeg sas Diyus te, gufud wa fiya ayu.

Nu Gseg Diyus

26Ku ngay fadugsay, katatuyi ay fagbulun at masine gina am gadal: tibak taw tagdanyu, ay tiba tagfoyung, ay tiba tagfayamag Diyus at longan, ay tiba tagelongan sa tibak fanlong at yud nasaful, ay tiba fayamagi at longan at masuwad. Fagayu kanya, fagbuluni masine laman gfatvngvd tuwa fagayu tagafanud. 27Ay nu e gfoyung sa tibak fanlong at yud nasaful, at masine duwa ay ate tuluk taglong yakman tagungbusanan, ay e gfayamagi tuwa at ngay nalong. 28Ay nu dway e taw mafafayamag at masuwad, at masine lag nangelongan si sad simban. Kanya yakman sesadi at nanfasulitanan Diyus. 29Ay nu e duwa ay ate tuluk tagelongan, at tiba dungugani way, go matuyan tuwa at elongan. 30Ay ginanya, at ngay malunggung nu e kaumsig gfoyung Diyus at longan, at masine tagelongan taguna malunggungi yap. 31Masine tuwa dewa am fagayu tagfoyung Diyus at longan nu gungbusanan tuwam, laman at ngay tagdungugan sumaful tuwa ay foyungan, ay gfatvngvd tuwa at ngay amatanganan. 32Sik takamoyung Diyus at longan, gsaful tuwa mabaris, 33anway tam Diyus bundi sik tagfamaaringangan taw, sik tagfanabayan tuwa.

Ay katanyai tuwa fagayu tagafanud at ugali. 34Ngay mangena, maragangani way si sad simban, anway sik mangena wa masine nu gelongan. Ani way fababauni sat mangama, kata at marirukan sis Diyus at longan. 35Ay sik mangena nu e fakaumsigun nangasaful, intoi yap sat mangama gina ndasug sat bale. Anway mapla way nu sik mangena way tagelongan si sad simban.

36Go gayup am te, taguna Diyus at longan siginan wa ayu? Ay go am way fagtvngvd at fagfoyungan? 37Ay nus nga sinu si ayu tagamatangan te, kanya Diyus at taglong ay ate si wa anya at Masine fag Falad, ka fag taw asafuli tuwa nangus te, ku ngay nariruk sa ayu, Diyus wa at longan. 38Ay nus nga sinu at yud gamatangan ku longan, lag yangay gamatangan anya.

39Ku ngay fadugsay, nu katanya, aumsigi tuwa nanfamoyung Diyus at longan. Ay lag gsalag dewa sik taw gelongan sa tibak fanlong at yud nasaful. 40Ay fagayu ay fagbulun, fasineuni sa tagtungul fag balyavtan.

Currently Selected:

1 Kurintu 14: TAWEAST

Highlight

Copy

Compare