1 Kurintu 13

At Taglabi Fagayu Fakafanyuun

1Dewa aw gsaful gelongan sas fagayu taw at fanlongan ay anggan sa sangay tagfabarita at fanlongan, nu dakway gfangafanyu, kata kway ro sik biya fag aling at meglis nu gawang yud e masuwad. 2Ay dewa aw e fagsafulun kamoyung, ay dewa aw e fagsafulun gtogdungug at mafalyu fag ngay longan, ay dewa matvngvd ku fagafanudun gsak aw mafafalin sik muyud, nu dakway gfangafanyu, kata kway ngap yud e fanambagun. 3Ay dewa ro aw nafon fagayu ku nanuranan, ay manga dewa ro aw nafon ku bilug laman nanbatas, nu dakway gfangafanyu, we fanambagun sa angku.

4Sik taw tagfangafanyu, mabaris tuwa, ay malukme tuwa, ay di gfangalabian, ay di gfandaragang ay ate gfalabi at longan, 5ay di mauri at ugali, ay di gmandianan, ay di gfangalimata, ay di gamatangan mauri sa tiba, 6ay di kaumsig sat mauri, at fakaumsigun sa tuwa at masine. 7Kanya maasungatan tuwa gugat, ay gafanud tuwa gugat, ay e fagsegun tuwa gugat, ay gbaris tuwa gugat.

8E fakatabuwan way ban nu gfoyung Diyus at longan, ay anggan nu gelongan sa tibak fanlong at yud nasaful, ay katanya yangay sa baliwa nu gfayamag fagsafulun sa baliwas Diyus. Ay roro fakafanyuun wa ban e fakatabuwan. 9Anway tam ngay fagsafulun katsi ya kasakan, ay manga nu gfoyung tam Diyus at longan ya kasakan. 10Ay gina ban fagayu umkasakan, malyam wa ban at yud kasakan.

11Ebi gina aw sik sisiyan, nu gelongan aw, ay nu gamatangan aw, ay nu gfamalusan aw kata yay sik sisiyan. Ay nu ndaul akwan, naubun akwan kata sisiyan at ugali. 12Anway katsi nu glag tam, mafayasan yay, kata nu nalinggat tam sa sik balanban. Ay bandi lumag wa ban tam fiya anya fasalubangan. Ay katsi tam nasaful ya fagayu. Ay fagayu ban sumaful yay tam, kata tam Fun nu nasaful antam. 13Tuy fag tulu at yud malyam. At fasadi, fagafanudun, ay at faduwa, fagsegun, ay at fatulu, fakafanyuun. Ay at taglabi at duwa, fakafanyuun.

Currently Selected:

1 Kurintu 13: TAWEAST

Highlight

Copy

Compare