1 Kurintu 12

At Masine fag Falad at Nafon fag Fagbulun

1Ku ngay fadugsay, katsi kaumsig aw nanfoyung sa ayu at Masine fag Falad at nafon fag fagbulun. 2Nasaful wam te, ebi gina am yud gafanud, e naguyudan ayu laman sumeg am sa sangay tawtawan at yud gelongan. 3Nu katanya, glong aw sa ayu te, nus nga sinu fag taw nu si tuwa anya Diyus at Masine fag Falad, kanya wa ro glong te, “Fagumfauriun Isus.” Ay wa ro yangay e glong te, “Tam Isus tam Fun,” nu dway at Masine fag Falad nafaamatanganan anya.

4E fagmafabulun tam gsadsamanan. Ay dewa katanya, sadi wayk Masine fag Falad tagfon kanya fagayu. 5Wa kata at sadi tam Fun at nafon fag fagmafabulun. Ay dewa katanya, sadi wayk Fun. 6Gsadsamanan way Diyus nafon antam fag fagbulun. Ay dewa katanya, sadi wayk Diyus tagfon antam katanya fag ngay fagbulun.

7Ay at Masine fag Falad si wa sadi sadik taw, laman fagayu at taw e fanambagun. 8Sa tibak taw at Masine fag Falad at famanyun sa anya, sik fagsafulun gfoyung sa baliwas Diyus fag ngay fagsafulun, ay sa tibak taw, sik fagsafulun gsaful kanya at masuwad. 9Ay sa tibak taw at Masine fag Falad at famanyun sa anya, sik matvngvd fag fagafanudun. Ay sa tibak taw, mafafiya at ke daylan. 10Ay sa tibak taw, gsaful gfasure at madulawan fag ngay fagbulun. Ay sa tibak taw, gsaful gfoyung Diyus at longan. Ay sa tibak taw, gsaful te, go daginan ka fag fagmadaragangun, go siginans Diyus ay go siginans mafurat fag falad. Ay sa tibak taw, mafafaelongan sa tibak fanlong at yud nasaful. Ay sa tibak taw, gsaful mafafayamag ka fag fanlong at masuwad. 11Dewa kayunya, sadi wayk Masine fag Falad at nafamanyun, ay nafafafud sa sangay taw kata at fakaumsigun.

Sik ngay Afud Tam sa Sadik Bilug

12Sik taw at bilug dewa sadi, ngayu tuwa at afud. Ay dewa ngayuk afud, fagayu kasadi way sa sadik bilug. Katanya yangay at fafaskudanan sa tam Fun Isus at bilug. 13Fagayu tam, dewa taw Udyu ay taw Gresiya, dewa sik fanuguwan ay sik yud fanuguwan, insurung watam laman umsadi tam sa sadik bilug. Ay fagayu tagsi antam sadi wayk Masine fag Falad.

14Sik taw bilug ngayu tuwa at afud, di sadik afud. 15Sik darafa nu nalong te, “Dakwa sik daluwap, nu katanya, dakwa sik afud bilug.” Dewa nalong katanya, kanya sik afud yay bilug. 16Ay talinga nu nalong yangay te, “Dakwa sik mata, nu katanya, dakwa sik afud bilug.” Dewa nalong katanya, kanya sik afud yay bilug. 17Fagdaul bilug nu tanan wa ro mata, tain ro nu dumungug? Ay fagdaul bilug nu tanan wa ro talinga, tain ro nu gayuk? 18At matuyan, Diyus nafat si sik taw at bilug at afud, nus nganday at fakaumsigun mandi. 19Ay fagayu nu sik afud way ro, go kangayan yay ro te, sik bilug? 20At matuyan, sik bilug, ngayu tuwa at afud.

21Nu katanya, wa masine at mata nu glong sat daluwap te, “Kwe masuwad sa emu.” Ay wa masine at alfuyu nu glong sat darafa te, “Kwe masuwad sa emu.” 22Ay roro kanya fag ngay afud tagsi tam bilug at yud magong, kanya tuwa ngap karo at ke fanambagun. 23Ay kanya fag ngay afud tam nayupan te, wa bangan e fanambagun masine, kanya tuwa ngap karo tam fagimaluun fiya fiya. Ay si tam naplan fag ngay afud bilug, gfafalyu tuwa tam fiya fiya. 24Ay sa tibak afud at masine, wa tam gfasineun wan. Tam Diyus gfasine si tam bilug at yud bangan masine laman kaugat yay nu masine, 25laman tam bilug at ngay afud di ginkafudan, antuwa kedkesugan. 26Ay nu e nasaitan way sik afud bilug, fagayu afud kasait wan. Ay nu e gfauseganan tuwa sik afud bilug, fagayu afud guseganan tuwa.

27Katsi am wan tam Fun Isus at bilug. Ay bawat at sadi am, sik afud wam sa tam Fun Isus at bilug. 28Ay tuy fag bilug, at masuwad, Diyus bale. Ay tam Diyus nafili at ngay tagfagbulun sat bale. Taguna at nafili, at ngay Nasugu. Ay at faduwa, at ngay taglong, ay at fatulu, ngay takamoyung. Ay nafili yangay tagfagbulun at ngay madulawan fag ngay fagbulun, ay ngay tagfafiya at ke daylan, ay ngay tagfantarabang, ay ngay tagfangguna, ay ngay tagelongan sa tibak fanlong at yud nasaful. 29Go sangay fagayu taw at Nasugu? Ay go sangay fagayu taw Diyus at taglong ay takamoyung? Ay go sangay fagayu taw at ke fagmadaragangun gfagbulun at ngay madulawan? 30Ay go sangay fagayu taw tagfafiya at ke daylan? Ay go sangay fagayu taw tagelongan sa tibak fanlong at yud nasaful? Ay go sangay fagayu taw mafafayamag ka fag ngay fanlong at masuwad? 31Faugati yap nu gyabulun am at tiba tungud fag fagbulun. Ay katsi nanfoyung aw ayu sik ugali taglabi tiba nu masine.

Currently Selected:

1 Kurintu 12: TAWEAST

Highlight

Copy

Compare