1 Kurintu 11

1Nu katanya, faningi angku, kata nu gfaning aw tam Fun Isus.

At ngay Mangena at Ugali sas Diyus Bale

2Guseganan aw sa ayu anway faggugat gamatangan tuwam angku. Ay gfaning tuwam ku ngay foyungan. 3Kaumsig aw nu sumaful am te, fagayu mangama, tam Fun Isus wan at fun. Ay fagayu mangena, at mangama wan at fun. Ay tam Diyus wan tam Fun Isus at fun. 4Sik mangama gina gdarangin ay ate gina gfoyung Diyus at longan nu e fantabun way sat alfuyu, gfaplan way sat Fun. 5Ay sik mangena gina gdarangin ay ate gina gfoyung Diyus at longan nu dway e fantabun sat alfuyu, gfaplan way at mangama. Kanya kata wa nu nafalanu at alfuyu. 6Ay sik mangena nu dway ngap igtabun at alfuyu, falanui wa ngap. Ay nu kapla way nu malanu at alfuyu, tabuni tuwa. 7Ay roro sa sik mangama, lag e fantabun sat alfuyu, anway kanya at fanfalag sa at tiba, Diyus at ugali ay anggan at fagmasineun. Ay sik mangena kanya wan tagfauseganan at mangama. 8Anway ebi taguna fag mangama wa siginan sik mangena, fangkabat mangena siginan way mangama. 9Ay Diyus wa naawat sik mangama laman sas mangena, antuwa te, naawat mangena laman sas mangama. 10Nu katanya, sik mangena tabuni tuwa at alfuyu laman anggan ngay tagfabarita lumag te, at mangama tuwa tagmagurang at mangena. 11Ay dewa katanya, anway insadi watam sa tam Fun, mangama ay mangena di gmandianan. 12Anway ebi taguna fag mangena siginan way sik mangama. Ay katsi fag ngay mangama siginan yangay sik mangena. Ay fagayu siginan yays Diyus.

13Am wan tagfili te, go masine sik mangena dewa gyud e fantabun sat alfuyu gina gdarangin sas Diyus kaduge maful at tiba? 14Sik mangama masine nu mafungkuk tuwa at buk, teway mapla way sik mangama nu ngaba way at buk. 15Ay sik mangena nu ngaba tuwa at buk, katanya gfaumsiganan tuwa anya. Anway Diyus wan at nafon anya at buk laman at fantabun alfuyu. 16Nu e taw kaumsig gfabadbaboan sanya baliwa, katanya wan em ugali, ay anggan fagayu Diyus at ngay taw at ugali.

At Yud Masine fag Fagbulun sas Isus At Yafun

17Katsi ku fagnanfoyungun sa ayu, dakwa nanfauseganan ayu, anway gina am maful, fangkabat masine ay fagbulun mafurat way. 18At taguna ku nadungug, gina am maful, ginkafudan way am, ay gafanud aw bangan sa ku nadungug katanya. 19Kin, nu katanya wan at masine, laman umtuyan am te, seyu am at tagfaning fiya fiya sa tam Diyus.

20Ay kaduge am maful gina am ganangonun tam Fun Isus at yafun, wa gtungul ay fagbulun katanya. 21Teway gina am fiya fiya nanfangon wam gfadfanyaan. Nu katanya, tibak taw inkapsug wan ay kasigung, ay tibak taw kalunus yay. 22Go sangay wam e bale mandi laman sanya way nu kon am ay ginum? Nu kanya way ay fagbulun gfalingun way am Diyus at ngay taw. Go tain ya ro katsi ku longan sa ayu? Go guseganan aw sa ayu? Sek yaya! Kwa guseganan ayu.

Isus At Yafun

(Mat. 26:26-29; Mar. 14:22-25; Lukas 22:14-20)

23Katatuy ku nadungug siginan tam Fun, ay gfoyung kyangay sa ayu: Kaduge e nanfoyung anya fag yabi sat mauri fag taw, tam Fun Isus nabul sik tinafay, 24ay nafauseganan sas Diyus ay nalong te, “Tuy fag tinafay ku bilug wan, nafon aw sa ayu. Buli ay oni wan, sik fagamatanganun ban sa angku.” 25Ay katanya yangay nu ntabu wa nu kon, Isus nabul sik taya at ke safa, ay nalong te, “Tuy fag safa at masuwad, sik bagu fag fatuyanan sas Diyus ay sas taw, ku taguk at nafatvngvd. Buli ay inumi wan. Ay nus nge ginain ban nu ginum am, sik fagamatanganun sa angku.” 26Anway nus nga ginain ban nu kon am katatuy fag tinafay ay nu ginum am katatuy fag safa, gfalag am sa ay iba tam Fun at naatean anggan kanya umdasug.

27Ay nus nga sinu ban takon tam Fun Isus at yafun fag tinafay ay taginum fag safa ginanya, nu dway masine at fagbulun ay at amatanganan, kanya e asalanan way sa tam Fun at bilug ay sa at taguk. 28Nu katanya, bagu am nangon ay nanginum, amatangani yap mandi ay ugali. Ay nu ntabu wan, oni ka fag tinafay ay inumi ka fag safa. 29Anway nus nga sinu at naon ay at nainum nu dway nasaful tam Fun at bilug at masuwad, katanya gfasa way anya sas faurianan. 30Katanya at fanlonganan fagngayuun si ayu at momuy at bilug, ay tagadaylan, ay tiba nkate wan. 31Ay roro nu gamatangan tuwa tam mandi antam, di mdasug faurianan sa antam. 32Ay nu tam Fun wan tagsarap tam asalanan, kanya e famegan wa fiya sa antam, laman di ban tam umfaurianan gfasfuwan ste swa daga fag ngay taw.

33Nu katanya, ku ngay fadugsay, gina am maful laman nangon tam Fun Isus at yafun, fadfanyaani tuwa. 34Ay sik taw nu kalunus, sat balei yap nu kon, laman tam Fun di gfegan ayu anway sa ay ngay fagbulun gina am maful. Ay sa baliwa tiba ay fagbulun, gfasine kyay ban gina aw umdasug sanya.

Currently Selected:

1 Kurintu 11: TAWEAST

Highlight

Copy

Compare