Ruma 16

Sik Mangena at Ngayan Febi Galoun sas Fulan Ruma

1Ku ngay fadugsay, katsi ste fag fulan, e ufud ami sik mangena, at ngayan Febi. Ay kanya galoun wan sa ayu. Gina ban am igtap tuy ku rirukan, tam usena sanya wa si ayu. Ay kanya ngaro tam usena, nu gbanwan, sis fulan Senkrea. Ay kanya sik tagfagbulun yangay tam Diyus fagbulun, igtarabang at ngay tagafanud sanya fag fulan.

2Nu katanya, glong aw ayu te, masinei tuwa ay fagbulun sa tam usena Febi, teway kanya kata yangay ayu, tam Diyus yangay at taw. Sik tagafanud yangay sa tam Fun. Ay nus nga setaw at nayudanan, kaduge sanya si ayu, foni tuwa anya. Teway kanya tam usena, mafantarabang dawdaw. Ay aw wa ngani at sadi at natarabang.

Pablu at Fagalongunun sa sik ngay Taw Ruma Ayuwayu

3Foyungi tuwa sa ku ngay fagwes sanya, tagbanwan si ay fulan, te, dakdi kalyam anya. Ay anggan sanya si ayu tibak taw, deyud aw batang glag at mata, gamatang aktuwa anya, teway guseganan aw tam iba nafamansulit sa ayu baliwa.

At duwa ngaro ku fagwes sanya, sik daduwa, Prisila ay Akila. Ebi kanya fag daduwa gufud tuwa gugat angku nu kamoyung ami tam Fun Isus sa sangay taw. 4Ay ebi sik sayginan, gina e gafateun dawdaw angku, kanya fag daduwa nafalangfe angku. Dewa te, tagafateun angku, gafateun yangay kanya fag daduwa, roro kanya tuwa at nafalangfe angku. Nu katanya, guseganan aw dawdaw sanya fag daduwa at nafagbulun. Ay anggan at ngay taw yud Udyu tagafanud sa tam Isus, guseganan yangay ayuwayu.

5Ay nadungug aw te, katsi e gadal tuwa sanya fag daduwa bale. Ay longi sat ngay tagadal sanya te, “Deyud aw batang glag ayu, dakdi kalyam ayu.”

Ay longi yangay sa ku fagwes Ipinitu, te dakdi kalyam anya. Kanya wan taguna tagafanud sa tam Fun Isus sis talun Asia.

6Ay longi yangay sa tam usena Maria, te dakdi kalyam anya. Kanya gugatan tuwa nu gfagbulun Diyus fagbulun sanya si ayu.

7Ay longi yangay sa tam usama Anruniku ay sa tam usena Yunya, te dakdi kalyam anya. Kanya fag duwa, sik taw Udyu yangay kata angku. Ay madaragang tuwa nu kamoyung. Igfadasug tuwa tam Fun Isus foyungan sa sangay taw sa tibak talun. Ay naguna tuwa angku nu gafanud sa tam Fun Isus. Ay ebi sik kadugayun, ami fagtulu, naudgufudan ami sad sungsungan, teway tanan ami insungsung.

8Ay longi yangay sa ku sama Amliyatu, te dakdi kalyam anya. Ami ku sama, igfagwesanan tuwami, teway kanya ku sama, tam Fun Isus yangay at taw.

9Ay anggan sa tam usama Urbanu, longi yangay te, dakdi kalyam anya. Kanya sik tagfagbulun yangay tam Fun Isus fagbulun, kata antam tiba.

Ay anggan sa ku fagwes Istaku, longi yangay katanya.

10Ay anggan tam usama Apilis, longi yangay katanya. Kanya ngaro tam usama, ebi nadalan daw sik mataka. Ay dewa katanya di nfoli. Igfaning tuwa gugat tam Fun Isus.

Ay longi yangay sa tam ngay fadugsay siginans Aristubulu at bale fag ngay taw, te, “Dakdi kalyam ayu.”

11Anggan sa tam usama, Irudyun, longi yangay katanya. Kanya sik taw Udyu yangay kata angku.

Ay anggan sa tam ngay fadugsay siginans Narkisu bale fag ngay taw, longi yangay, te, “Dakdi kalyam ayu.”

12Longi yangay sas duwena, Rufena ay Rufusa, te, “Dakdi kalyam ayu.” Kanya tam duwena, gugatan tuwa nu gfagbulun tam Fun at fagbulun.

Ay anggan sa tam usena Pirsis, longi yangay katanya. Kanya ebi naugatan tuwa dawdaw nu gfagbulun tam Fun at fagbulun.

13Ay longi yangay sa ku sama Rufus, te, dakdi kalyam anya. Sama, useganani tuwa dawdaw, teway tam Diyus nafili tuwa emu. Ay anggan sam mina, longi yangay, te, dakdi kalyam anya. Kanya ebi igfatvngvdun dawdaw angku, katvngvd nu gimalu at unga.

14Anggan tam ngay ibama, Asungritu, Filegun, Ermes, Patrubas, Ermas, kanya fagayu longi yangay, te, dakdi kalyam anya fagayu. Anggan at ngay ufud fagayu, tam ngay fadugsay, kanya sigon dakdi kalyam.

15Anggan tam usama Filulugu, ay tam usena Yulya, ay tam usama Neryu ay at fadugsay yangay sik ina, ay tam usama Ulumpas, kanya fagayu longi te dakdi kalyam. Anggan at ufud fagayu, tam Diyus at ngay taw, kanya sigon dakdi kalyam.

16Ay katsi, glong aw ayu te, am fagayu sanyas Ruma tagafanud sa tam Fun Isus, gina am naladlagan, falagani tuwa ay sadi te, kafanyu tuwam gugat anya.

Ay anggan tam ngay fadugsay siginan sangay fulan ayuwayu, igfadasug yangay at fagalongun sa ayu, te, “Anggan ami, di ami kalyam ayu.”

Sik Famatagak te, “Lag Galukan at Mauri fag ngay Takamoyung”

17Ku ngay fadugsay, labon sanya si ayu, tibak taw, igfalyam way ay fagmasadiun. Katanya fag ngay taw igfoyung dawdaw ayu sik ngay foyungan. Ay roro at ngay foyungan, saman way ebi at kindasug sa ayu fag foyungan, ay igfasuwayan way nu gafanud am sa tam Fun Isus. Ay nu e taw way katanya si ayu, matagakani tuwa. Ay lag nanfaygaluwan.

18Teway katanya fag taw, bunwa tam Fun Isus at fagfaningun. At fagfaningun at fakaumsigun way mandi. Ay teway katanya fag ngay taw, maumsig dawdaw nu kamoyung. Igfoyung at ngay taw fakaumsigun igdungug. Ay at ngay taw nu gdungugan gugat, at yud matvngvd nu gamatangan sa tam Diyus baliwa galukan wan.

19Ay dewa aw glong katanya sa ayu, roro ngap nu gamatangan aw, igsaful tuwam igfili at matuyan. Madyay dewas nganday fag fulan, kadungug tuwa te, matvngvd tuwa nu an am igfaning tam Diyus. Ay nu katanya guseganan aw dawdaw sa ayu. Ay dewa katanya, namatangan aw te, lumong kyay sirut sik famatagak sa ayu, te lag faygaluwan at mauri fag ngay takamoyung, laman di am umke nasafulan sat mauri baliwa. Laman ay fagsafulun, sa tuwa at masine baliwa.

20Tam Diyus wan tagfanabayan tam ngay amatanganan. Nu katanya, lag kalukme. Teway bandi sik menit, mabo watam fiya Satanas, teway tam Diyus wan tagfon antam tam fanbabo.

Ay tam Fun Isus wan tagtarabang ayu.

Pablu at ngay Ufud

21Ay nu ste aw gugat fag fulan, e ngay ufud aktuwa. Ay kanya sigon kaumsig at ngayan nu marirukan ste fag rirukan, laman ro sumaful am te, kanya sigon, guseganan tuwa at nadungug siginan ayu baliwa.

At sadi ngaro ku ufud iste, tam usama Timutiyu. Kanya, anyangay sik tagfoyung Diyus fanlongan kata angku. Ay tiba ku ufud, Lusyu, Asun, ay Susipatru. Kanya fag tulu, sik ngay taw Udyu yangay kata angku.

22Ay angku ngaro ku ngayan, Tersyu. Ku fagbulun, an aw igfalu tam usama Pablu nu kawat at rirukan. Kanya gelongan ababa at ngay amatanganan, ay aw igriruk aw at ngay elongan. Aro ginan ay natap fag ngay longan ayuwayu, aw at nariruk. Ay glong aw ayu te, anggan aw guseganan kyangay ayu, teway tam Fun Isus yangay am at taw.

23Ay katsi aw yangay Pablu tagelongan iste. Glong aw te, iste fag bale, at ke bale, tam usama Gayu. Ay nu gtiyug aw, iste wan. Ay anggan nu gadal ami tam Diyus fanlongan, iste yangay fag bale.

Ay at sadi ya ngaro iste ku ufud, tam usama Erastus. Kanya wan tagsandig gubyarnu singku iste fag fulan. Ay at sadi ya ku ufud, tam fadugsay Kortu.

Kayunya wan ku ufud iste at ngay ngayan. Ay kanya fagayu, guseganan tuwa at nadungug siginan ayu baliwa.

24Tam Fun Isus, tam Fagsegan, kanya falag nangus nu kafanyu ayu. Kin, katanyai wa fiya.

Useganani sa tam Diyus at Nafadasugan Antam at Masine fag Barita

25-26Itam fagayu, fauseganani dawdaw tam Diyus. Teway kanya wan tagfatvngvd tam amatanganan, te laman gafanud tuwa tam sat Masine fag Barita. Ebi ataw taguna, tam Diyus ya nafayamagun kanya fag Barita. Masuksukan yay bangan sas taw amatanganan. Ay nu katsi wa si antam, tam Diyus nafayamagun wan. Ay igsugu wa te, “Foyungi at Masine fag Barita sa sangay taw. Longi te, katsi tam Diyus nafagurungan wan sik ngay fatuyanan ayuwayu, at marirukan ebi ginan sit fanlongan.” Katanya tam Diyus suguwan sa antam. Ay katsi ngani aw, igfoyung kwa fiya at Masine fag Barita. Igfoyung aw sa tam Fun Isus baliwa.

Ay tam Diyus fasadan, fagnasuguun antam te, famoyungi, laman ro dewas nganda ginan fag fulan taw, sumaful tuwa gafanud sa tam Fun Isus. Ay nu gafanud wan, sumaful yangay ban gfaning sa tam Diyus at fakaumsigun.

27Katvngvd wa anya, tam Diyus at nafagbulun sa antam. Nu katanya, itam fauseganani anya, faggugat faggugat ban. Teway kanya wan at matuyan fag Fagsegan. Ay kanya wan at masafulan. Ay kanya wan at nasugu tam Fun Isus laman falangfe antam. Kin, fauseganani wa fiya anya. Ste way kabat ku rirukan.

Currently Selected:

Ruma 16: TAWEAST

Highlight

Compare

Copy