2 Akorinti 2

1LOMBA nichiti mu mtima mwangu, Sinimzilani soti kondandaula. 2Pakuti kati nikazomndandaulisyani, nga ni ŵani anganitemwesye, sembe uyo ondandaulishiwa na neo? 3Nane nilemba chamene ichi, kano nikazofwika ningazondandaula na aŵo owamila kunitemwesya, panumchetekerani monse kuti chimwemwe changu ni chanu monse. 4Pakuti mmazuzyo anyinji na mchipika cha mu mtima nimlemberani na misozi inyinji; nte kuti mndandaulishiwe, sembe kuti muziŵe chintemwa chinili nacho kwene kantu kuli mweo.

5Sembe kati ali wonse endandaulisya, ntenindandaulisya neo, sembe patonto (ningasindilizye ngako) mweo monse. 6Kumkumanira wotetyo kulanga uku kwichitiwa na anyinji; 7kuti ngakongako mumlekelele nompuzisya, wotetyo angamerewe nondandaula kwake kukuru. 8Teti ni panumpapatirani kumkosyera chintemwa chanu. 9Pakuti chikomo ichi soti ni penilemba kuti niziŵe kuzomereka kwanu, kano nimwe ŵomvwila mvyonse. 10Lomba umulekelela kantu, nane kumo: pakuti chinilekelela neo soti, kati nilekelela kantu, chikomo cha mweo ni penichita tetyo pa menso pa Kristo, 11Satana asatichenjerera: patuziŵa vyochenjezi wake.

12Lomba penichiza ku Trowa kwa evangelo ya Kristo, na pa mulyango pepezuliwa kwangu mwa Asikuru, 13niliyotekelezya mu mzimu wangu, pakuti sinimfwana Tito mkwasu: sembe nikalailane naŵo niimapo kuya ku Makedoniya. 14Sembe Mlungu nalumbiwe, otitangulila mkuyanga mwa Kristo mperampera, nomvwisya muli seo mnunko wa maziŵilo ŵake mmalo monse. 15Pakuti se nise mnunko uweme wa Kristo, kwa Mlungu, muli aŵo opuzumushiwa, na mwa aŵo ochenekeka; 16kwa ŵala mnunko wa imfwa ku imfwa, kwa ayake ni mnunko wa moyo ku moyo. Ni ŵani angolikumanizya ivi? 17Chikomo se ntese nga ni anyinji ŵala, ŵolisasya lizu la Mlungu: sembe nga ni kosalipazya, sembe nga ni a Mlungu, ni mtulaŵirira mwa Kristo pa menso pa Mlungu.

Currently Selected:

2 Akorinti 2: MA23

Highlight

Copy