2 Akorinti 1

1PAULO, mpostolo wa Kristo Yesu mchipangwilo cha Mlungu, na Timoti mkwasu, ku eklezya ya Mlungu ya pa Korinti, pamo na asanto ŵonse ali mu Akaya monse: 2Chawanzi kwanu na mtendere kufumila kwa Mlungu Ausu wasu na Asikuru Yesu Kristo.

3Nalumbiwe Mlungu na Awisi a Asikuru wasu Yesu Kristo, Wata wa vifundo na Mlungu wa mamyalaliko ŵonse; 4wamene otimyalalika mmatamano ŵasu ŵonse, kuti tikumomyalalika aŵo ali mmatamano ŵonse, kwa mamyalaliko atumyalalikiwa naŵo seo seka na Mlungu. 5Pakuti nga ni mazuzyo a Kristo mwakutipakira seo, tetyo na mamyalaliko ŵasu soti ni mwakupakira mwa Kristo. 6Kati tikatamanishiwa niko kommyalalikani mweo nompuzumusyani; kati tikamyalalikiwa niko kommyalalikani, kutang'a mkupilila mazuzyo amene ŵala atutamana naŵo nase kumo. 7Chigomezyo chasu cha kuli mweo ni chokosa, patuziŵa kuti nga ni mmukumanira na mazuzyo, tetyo na mamyalaliko soti. 8Pakuti situpangwa mpululile, akwasu, zyotamana kwasu kwitiponera mu Asiya, zyakuti titepa kwene kantu, kupula mtenzele na mpamvu, ni petitaya chigomezyo chukanga chakuŵa na moyo: 9inde, seo seka tenze nokonwa kwa ku imfwa muli seo, tisalitamya seka, sembe Mlungu oŵausya akufwa. 10Etipuzumusya mkufwa kukuru kotetyo, soti azopuzumusya: utuchetekera kuti akutipuzumusye soti, 11mkayavyana nase namwe kumo posenga kwanu, kuti kwa chisomo chipewa kuli seo kwa anyinji ayamike anyinji pa mitu yasu.

12Pakuti kulimekera kwasu ni uku, untoni wa chikumbutima chasu, wakuti mu utuŵa na mkusalipazya kwa Mlungu, nte mnzeru zya mmuŵili, sembe mchawanzi cha Mlungu, tenze na mayendero ŵasu pa charo, ngakongako kuli mweo. 13Pakuti situmlemberani vimbi sembe vumupenda novizomera soti, na vunugomezya muze movizomera mpaka kunsilililo: 14nga ni soti mmwitizomerera seo patonto, kuti nise cholitamyira chanu, umo mweo soti mmulili chasu, msiku la Asikuru wasu Yesu.

15Mchigomezyo ichi nilingilatu kumzilani kale, kuti muŵe na chimwemwe chakaŵiri, 16nopita panu pakuya ku Makedoniya, nowera ku Makedoniya nomzilani mweo, nopelekezyewa namwe polwendo wangu wa ku Yudaya. 17Teti penilingilatu teti, kansi nichitomwaru? kano vunulingilatu, kansi nuvilingilatu mwa muŵili, kuti pali neo paŵe inde inde na yai yai? 18Sembe umo Mlungu mwalili wochetekereka, malizu ŵasu a kuli mweo nte inde na yai. 19Chikomo Mwana wa Mlungu, Yesu Kristo, wamene eŵirizyiwa nase muli mweo, na neo na Silvano na Timoti, ntenze inde na yai, sembe mwa yeve muli inde. 20Pakuti chukanga vipango vya Mlungu ni vinyinji, mwa yeve muli inde: tetyo soti mwa yeve muli Amen, ku mchinzi wa Mlungu muli seo. 21Lomba uyo otitang'isya seo pamo namwe mwa Kristo notizoleka ni Mlungu; 22wamene soti etikomapo malaka notipa chikole cha Mzimu mmitima yasu.

23Sembe neo numuita Mlungu kuŵa ntoni pa moyo wangu, yakuti kumchitirani lusungu ni pinileka kuza ku Korinti. 24Nte kuti tulikuzya pa mvwano wanu, lomba nise ŵoyavyana na chimwemwe chanu: pakuti mukoselatu na mvwano.

Currently Selected:

2 Akorinti 1: MA23

Highlight

Copy