2 Akorinti 3

1KANSI tuukulula kulilumba? kansi tuzingwirako, nga ni ŵambi, tulata totilumba kuli mweo kano kufumila kwanu. 2Mwe nimwe kalata kasu, kalulembewemo mmitima yasu, koziŵikwa nopendewa na ŵantu ŵonse, 3pamuŵoneshewa pasweta kuti nimwe kalata ka Kristo, kotumikiliwa na seo, kosalembewa na mfimfya, sembe na Mzimu wa Mlungu wamoyo; nte pa myala yopampantala, sembe popampantala pa mitima ya nvama. 4Kumchetekera Mlungu koteti tiri nako mwa Kristo: 5nte kuti tulikumanizya mwa seo seka kufwa kantu kofumila mwa seo seka, sembe chikumanizyo chasu chufumila kwa Mlungu. 6Wamene soti etikumanizyira kuŵa atumiki a mapangano alomba: si a malembo sembe a mzimu: pakuti malembo opaya, sembe mzimu ukupa moyo. 7Kati utumiki wa imfwa, wilembewa noŵaziwa pa myala, wichiza mu mchinzi (tetyo ŵana a Israeli ni paliyokumofunamizya pa chinso cha Musa chikomo chozila kwa chinso chake, kuzila kwamene kula kwenzofumyiwa), 8nga utumiki wa mzimu kansi nteuti uzoŵe na mchinzi ngawo? 9Kati utumiki wokonwesya ni wa mchinzi, kwenekwene utumiki wa chilungamo upuzyamo mu mchinzi. 10Pakuti lezee icho chichishiwa cha mchinzi chiliye mchinzi pali ichi, chikomo cha mchinzi ula wopulamo. 11Pakuti kati icho chufumyiwa chikaŵa na mchinzi, ngakongako icho chusala chikuŵa na mchinzi.

12Teti patikuŵa na chigomezyo choteti, tulaŵira kwa mkanka ukuru, 13nase ntese nga ni Musa, elivwinikila chinso ŵana a Israeli asafunamizya pansilililo pa icho chenzofumyiwa: 14sembe mitima yaŵo iyumishiwa: pakuti mpaka na lero lino pakupendewa mapangano akale mvwinikilo yamene iyo ikali yosavunukuliwa; yamene ifumyiwa mwa Kristo. 15Lomba mpaka na lero, pali ponse Musa pakupendewa, mvwinikilo yunkalilila pa mitima yaŵo. 16Sembe pali ponse muntu akamyarukira Asikuru, mvwinikilo ni pafumyiwa. 17Lomba Asikuru ni Mzimu uyo: soti pali Mzimu wa Asikuru ni pali wanoŵene. 18Sembe seo sonse, na chinso chovunukuliwa powezya nga ni chirora mchinzi wa Asikuru, tusangushiwa mchimvwirimvwiri chamene, ku mchinzi na ku mchinzi, nga ni mwa Asikuru Mzimu.

Currently Selected:

2 Akorinti 3: MA23

Highlight

Copy