रोमियो 11
11
इस्राएल पोर बोगवानान दया
1ज्यानकेरता मी केथु, काय बोगवान आपणा माणहाह सोड दियील हि? केधीच नाह; मी भी ते इस्राएली हि; अब्राहामान कुलामायने एने बिन्यामीन वंशामाय वालो हि. 2बोगवान आपणो ता माणहाह टाकील नाहं, ज्याह तास पेलूच समजीलुजे हुवे, काय तुमूह मालूम नाहं का पवित्र शास्त्र एलियान विषयातमाय काय केतेह, का ते इस्राएलचने विरोधामाय बोगवानान पुर रीन विनंती केरणू? 3“हे प्रभु, तास तारो भविष्यवक्तायाना जीवे मारील, एने तारो वेदीह पाडीन टाकाए; ने मीच एखालो वोचील हि, एने ते मारो पुण जीव लेणेन केरता दिखिह हि.” 4पुण बोगवानानापूररीन ताह काय उत्तर जुडील, “मी आपणे केरता सात हजार माणहे मिलील हि तान केरता बाल्मुर्तीला मांडा टेकलू नाहं.” 5हाजो आवो रीतीमाय आवो टाइम पुण कृपा माय निवडीप्रमाणे काही माणहे बाकी हि. 6जर हे कृपान हि, तर कर्मांनी नाहं; नापून कृपा पोशा कृपा रेणी नाहं.
7तान केरता परिणाम काय एय गीयो? हे का इस्राएल ज्यान होदमाय लेणे, तो ताह जुडना नाहं; पुण निवाडीलाह जुडना, एने बाकीन कठोर एय गीयो. 8जीही लेखील हि, “बोगवान ताह आज दिह ताहवोर हाजो निंदिमाय आत्मा टाकीन आपील हि, एने इही डोला आपील जे देखील नाहं एने इही कान जे होंबलेह नाहं.”
9एने दाविद का ते, तान मेज एने ताह फांस एने सापळा अडखळण एने प्रतिफोल इही होवो.
10तान डोलापूर आंधारो आवु म्हणजे ते देखणार नाहं, एने तू दाडीन तान वाढीला डोगालीन मेलूह.
11ते मी केथु काय, इस्राएल ज्यान केरीन पाप केरील, का ता पोड जाती? केधीच नाह, पुण तान पोडनेन कारण ईर्ष्या निर्माण ला केरता तान चूकीन वजसे अन्यजात्यूह उद्धार म्हणजे सुटकारू जुडनू, का ताह जलन एय 12ऐवी तान अपराध ज्यो जगान धन एय गीयोह एने तान कोमी ला ज्यो जर अन्य जात्यून धन बोण गीयोह, ते तान बोरनो ताहरीन तान भरपुरी कोलिक तेभी एय.
अन्य जातीन उद्धार: कलम केरणेन उदाहरण
13मी तुमूह अन्य जात्यून माणहाह जीवात केथु. जीही का मी अन्य जात्यून केरीन प्रेरित हि, ते मी आपणी सेवान बोडाई केरथू, 14म्हणजे कायताहा रीतीमाय मी आपणो जातीन माणहामाय ईर्ष्या उत्पन्न केरीन उद्धार केतेके तारावे. 15अन ताहेरया तान त्याग एनो तेवी जगान मेल एनो काय ताह स्वीकार केरणेन केरीन मुरील मायरीन जीवतालू उठिल बरोबर नाहं एय? 16ताहेरया भेट चा पेल्लो भाग पवित्र ठरल्या तर पुरो मळलेला पुण पवित्र हि; एने ताहेरया मूला जर पवित्र ठेरणू, तर डालखा पुण पवित्र ठेरणार.
17पुण जर काही डालखा तोडीन टाकाएने तू रानटी जैतून येतो तामायरीन तान जागे कलम रूपे लागाडया गीयो एने जैतुनान मुलाचा भागीदार एनो. 18तर फादोफो बढाई केरूह मां एने जर तुमूह बढाई मारणार तर होमजू का सोराह नाहं तर मूल तुवाह होमातालु. 19पोशा तू केनार, डालखा तान केरता तोडीन टाकाका मारा कलम लागिल. 20हाजो हि ते तर अविश्वासान कारणाने तोडणे गीयी पुण तू विश्वासानी रेणे तान केरता घमंडी एय मां पुण बिणेन बाळग. 21काहाकाय जर बोगवानान मुळीच डालखा राखिल् नाहं तर तुवाह पुण सोडीणार नाहं. 22तान केरता बोगवानान कृपा एने द्या देखू जे पोडीन गीया तामाय रिही का, नाहं तर तू पुण काटील जाहू. 23ते पुण जर अविश्वासी माय नाहं रेणा तर कलम रूप लागाड़ने आवती कारण बोगवानान ताह पोशा कलम ताह आवती. 24केरू जर तू जैतुननी, जे मुलामरेन रानटी झाड हि काटील गीयो तर हे जे तान मुळच्याच डालखा हेते आपणाच जैतुनमाय काय नाहं कलम लागाड़ने आवती.
आखा इस्राएलान ने उद्धार
25बाहाक मिलिन काही इही होवो का तुमूह आपणो स्वताह शहाणे होमजू नाहा तान केरता मारी ईच्छा नाहं का तुमूह आवो कुणीनकेरता एजानल्यो रिजी का जेवीवोर अने दिहरी जातीन माणहे पुरो रीतीमाय प्रवेश जाण केरीन लेहु, ताहउर इस्राएल चा एक भाग ओहलाच केठीन रेहू. 26एने आवो रीतीमाय पुरो इस्राएल उद्धार पावनारू, इही लेखील हि, मुक्ती आपणार सियोनातून आविलकाय पापी ला याकूबापुररीन सेटो केरुहू. 27तान हेरी मारो जोस वाचा एय का ताहेरया का तान पापोहो सेटो केरीन आपण्यू. 28सुवार्तान नात्र्यो ता तुमरीकेरता ता बोगवानान, जे वैरी हेते पुण निवडितआवीगियो नात्र्यो वेगुडायो प्रिय हि. 29कारण बोगवानान कृपा दान, हादाडणो से पासाण नाह एत. 30काहा जोहलो तुमूह पेल्ला बोगवानान आज्ञा मानना नाहं पुण ऐवी तान आज्ञा मानणारान तुमरे पोर दया एनी. 31तेह्लेच तास पुण ऐवी आज्ञा का जाईल नाहं का तुमरे पोर जी दया एता हि तान तां पोर द्या होवो. 32काहा बोगवानआखाहुच आज्ञा भांगाच्या स्वाधीन केरीन मिलील हे ता आखापूर दया केरावी.
बोगवानान स्तुती
33अरेरे! बोगवानान संपती एने वृद्धी एने ज्ञान हि कोलाक अगाध हेते! तान विचार कोलाक गहन, एने तान सिडिक कोलाक अगम्य हेते!
34“प्रभुन बुद्धीह मोन कोणीही मालूम हि? एने तान मंत्री कूण एतो? 35काहा कूण ताह पेल्ला ताह काही आपील हि ज्यान ताह फेड केरीन आपील जाहू?”
36काहा ताफायरीन एने ताणुच द्वारे, एने तान केरता आखा काही हि तान महिमा पिडीन पिडी एवो: आमेन.
Currently Selected:
रोमियो 11: NLXNT
Highlight
Copy
Compare
Share
Want to have your highlights saved across all your devices? Sign up or sign in
Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.
