रोमियो 12

बोगवानान सेवान जीवन

1ज्यानकेरता हे बायहो, मी तुमरीकेरता बोगवानान दया एर आपील विनंती करने कि आपणो शरीराह जीवतालू एने, पवित्र बोगवानान ग्रहणीय बलीदान केरीन चेढाऊ. जिच तुमरी अध्यात्मिक सेवा हि. 2आवो जगाच्या ओहलो जरूप बोणावूहु मा; पुण आपणो मोनान नोवोकेरिन जी जीव रुपांतर एहू द्या, ज्यासे तुमूह बोगवानान हाजो, एने ग्रहणीय एने सिद्ध ईच्छा महामुंदू होमजाडीन लेतेन रीवू.

3काहाकाय कि मी ता कृपादानाच्या कारणाने जे माहु जुडील हि, तुमरे मायरीन प्रत्येक जाणाह किथे, कि आपणो योग्य ते पेक्षा होवटो स्वताह माणुह मा; पुण जीही बोगवानान आखाह विश्वासान परिनामाणानुसार वाटीन आपील हि, तोहोलोच सुबुद्धी हेरी आपुहू होमजू. 4केरणू कि जाणे आमरा शरीराह मोकता अवयव हेते, एने आखा अवयवाचे एकुच काम नाह; 5तोहोलोच आमु मोक्तास जन हेरो, मसीहा माय एक शरीर एने प्रत्येक जन एकमेकान अवयव हेते. 6ताहेरया कि ता कृपादानाच्या नुसार जे आमूह आपील गीया हेते आमूह बाती बातीन वरदान जुडील हेते, तर ज्याह भविष्यवाणी केरणेन वरदान जुडील रेंय, तान ते विश्वासान परिनामाणानुसार भविष्यवाणी केरावी; 7ज्याह सेवा केरणेन वरदान जुडील रेंय, तान सेवा लागिन रिजी; ज्याह हिकाडणे वरदान जुडील रेंय, तान शिक्षण आपणे माय लागिन रिजी; 8ज्याह सुवार्ता केरणेन वरदान जुडील हेते, तान सुवार्ता केणेम लागणारच रिजी; एने दान आपणारा ते उत्साहने आपणे, एने जो दया करने तान ते आनंद केरावी.

9प्रेम निष्कपट रेणू जुवी; बाक्ताह रीन सेटा रेवू; हाजाला कामाह लेटकीन रीवू. 10बाहाक प्रेमाच्या बारामाय खेरो प्रेम देखाडा; तुमी प्रत्येक जन एक दिहरान आदराने आपणापेक्षा थोर मानू. 11आस्थेविषयी मंद रेहू मा; आत्मा माय उत्सुक ओहलो; प्रभुही सेवा केरतीन रीवू. 12आशान विषयामाय, आनंदमाय; संकटामाय विषयामाय, हिम्मत मेलू प्रार्थनान विषयामाय, स्थिर रेय 13पवित्र माणहान गरजा पुरो केरू पावणाय केरणेम लागिन रीवू.

14तुमूह त्रास आपणारा आशीर्वाद द्या, आशीर्वादच द्या हाराप आपुह मा. 15आनंद केरणारा हेरी आनंद केरुपून शोक केरनाराहेरी शोक केरू. 16आपसामाय एकचीत ओहलो मोठा मोठा वातुपोर मोन लागाडीन मुक्या मा तर गरीब माणहाहे-यो संगती मेलू स्वताह शहाणे होमजू मा. 17कायनेहाजो बद्दल वाईट ओहलो कुणान फेड केरूह मा आखा माणहान दृष्टीने जे हाजी ते केरणेकेरिन लक्ष्य मेलू. 18शक्य तर आखा माणहा हेऱ्यो तुमरेफायरीन एय तोलोक मिलिन रीवू. 19हे प्रिय आपणु बोदलो मा, लावू पुण बोगवान राह रागान अवसर आपु काहाकाय शास्त्रामाय लिखील हि काय बोदलु लेणेन मारो कामही बोगवान किथी मिज बोदलु लेह. 20आवो उलटो जर तारो शत्रु फुकलागीही रेंय तर ताह जेवण आप एने तिह्ल्यो रेंय तर पाणी आप कारण इही कोलाकेरिन तू तान मुंडीपोर आरो रास केरही. 21चुकीने जीकल्यू जाहू, मां, तेवी हाजोहाय चुकीई जिकिने.

Currently Selected:

रोमियो 12: NLXNT

Highlight

Copy

Compare