गलतियो पत्र 2

दिहरा प्रेरिता द्वारा पौलुसाह मान्यता

1चोवदा वर्षा ओवतो बरनाबस हेरी पोशा यरूशलेम गीयो, एने तीतुस हा पुण हेरी लेईन गीयो. 2मारा जाणू बोगवानान प्रगटी कियील प्रमाणे एय गीयो; एने जी सुवार्ता मी दिहरी जातीयान माय पोरचार करने, मी ताह केईन आपील, पुण एखलुज ताह जाणू जे मोठा होमजाडणे एता ते, काहाकाय इही होवो कि मारो ज्या समयान एने पासाणल्यो दोव्डणो व्यर्थ ठराय. 3पुण तीतुस भी जो मार हेऱ्यो इतू एने तो यूनानी हि, खतना केरणे केरता भाग पाडील नाह. 4पुण जो जुठा बायहोन कारण सर एनो जा चोराये रिग जायील एता, कि ती स्वतंत्रता जी महिमा यीशु माय आपुह जुडील हि, जान लीन आपुह दास बोणावी. 5एक वेल तान आमु तान अधीन एनो नाहं, जानकेरता कि सुवार्ता ची खेरोपणा तुमूहहु माय बोणावीन रेंय. 6ओवतो ते माणहे जे होमजाडीन लेती (ते केवी पुण ओहलो खतना याहेर्यो कायीच काम नाहं; बोगवान पक्षपात करत नाहं) ताहे-या जे काही समजील जात एता, माहु कायीच नाहं प्राप्त एय गीयो. 7पुण ज्ञान व्यतिरिक्त ताहेरया तास देखील कि जोहलो केरिनलीईल माणहा केरता सुवार्तेचे काम पतरसाला ताह देखाडील, तोहोलोच खतनान केरणाराह माहु दिहरी जातीन सुवार्ता होमलने ता होपील. 8कारण तान केरता पतरसाची खतना केरील गीया मुळे प्रेरितान कार्य वोदीह प्रभाव हातेच केरीन लीईल, तास मारो हेरी पुण दिहरी जातीयान माय प्रभावशाली कार्य केरीन लीईल, 9एने ताहेरया तास ते कृपा दान जे माहु जुडील, ओलखिन लीईल जो याकूब, एने कैफा, एने यूहन्ना जे मोडली खांबे मानना जात एता, माहु एने बरनाबसला संगतीचा जेवल्यो आथ आपील कि आमु दिहरी जातीयां माय जाणे एने ता खतना किरील माय जाणे; 10फक्त ज्यो कियील का आमु गरीबान जाणीन, एने ज्या कामाह केरणेन मी भी विचार केरतालु.

पौलुस द्वारा पतरसान विरोध

11पुण ताहेरया कैफा अन्ताकियान आवा, तर मी तान मुयापूर तान सामना किरील, कारण तो दोषी ठेरेल एतो. 12ज्यानकेरता कि याकूबा फायरीन काही माणहे आवणारा पेल्ला तो दिहरी जातीयां हेरी खाणे एतो, पुण ताहेरया ते आवा तर खतना किरील माणहाह बियीन तो माघार लीईल एने आलेग गीयो. 13एने ताहेर्या बाकी यहूदी भी कपट किरील, न्यावोर का बरनाबस भी तान कपट माय पोड गीयू. 14पुण तेवी मी देखू कि ते सुवार्ताच्या खेरो पणाने वागणे नाह एता, तर मी आखा ओगाण कैफाला कियील, “जेवी तू यहूदी असून तू दिहरी जातीयां सारकोस वागणे हि एने यहूद्यान सारकोस नाहं तर तू दिहरी जातीमाय यहूद्यान सारकोस चालणे का लागाडणे?”

विश्वासान द्वारा धर्मी ठहरणू

15आमु तर जन्मा जागेरो यहूदी हेते, एने पापी दिहरी जातीयान मायरीन नाहं. 16तेभी पुण हे होमजाडीन कि माणुह शास्त्रामाय कामानी नाहं, पुण केवळ यीशु ख्रीस्तावर विश्वास करीन द्वारे खेरो ठेरेल हि, आमु पुण यीशु मसीहा उपेर विश्वास किरील कि आमु शास्त्रामाय कृत्यांनी नाहं, बोगवानापोर विश्वास मेकील कारणाने खेरो ठेरहू; कारण कि व्यवस्था कृत्य कुणबी माणुह प्राणी धार्मिक ठेरणार नाहं. 17आमु जे मसीहा माय खेरो ठेरहू इच्छिमाय, केध्दीह तुमुच पापी निकेलना तर काय यीशु मसीह पापाहा दास हि? केदिमेदी नाहं! 18काहाकाय जे काही मी बुंदे पाडील केध्दीह ताह पोशा बोणावूह, तर ताह अपराधी ठेरिनेल. 19मी तर व्यवस्था द्वारे व्यवस्था केरता मोरीन जाईल कि बोगवान केरता जीवहु. 20मी मसीहा हेरी क्रुसांपोर सोडवियू गीयो एतो, ऐवी मी जीवतालू रेणू नाहं, पुण मसीह कुणबी जीवतालो रेंय; एने मी शरीराम जीवतालू हि तर कारण ता विश्वासाआ मुळे जो बोगवानान सोरान प्रेम केरील, एने मारो केरता जीवाह आपील आपुह. 21मी बोगवानान कृपाह वाया ठेरावीन नाहं; कारण केध्दीह व्यवस्था द्वारे धार्मिकता वोदीह, तर मसीहा चे मरण वाया एय गीयो हि.

Currently Selected:

गलतियो पत्र 2: NLXNT

Highlight

Copy

Compare