गलतियो पत्र 1

अभिवादन

1पौलुस जो नाह माणहा फायरीन एने नाह माणहान द्वारा, पुण यीशु मसीह द्वारा एने बोगवान आबाक द्वारा, जो मोरील मायरीन जीवतालू, इनू तान प्रेरित हि. 2एने आखा बाहाक वूखेर रीन, जां मारहे-या हेते, गलतियो कलीसियान नावे:

3बोगवान आबुक एने आमारो प्रभु यीशु मसीह ज्याफायरीन तुमूह कृपा एने शान्ति जुडते रेंय. 4तो स्वताह आमरा पापान केरता आप देयील, म्हणजे आमरो बोगवान एने आबाकने ईच्छा प्रमाणे आमूह ज्या वर्तमानान वाईट संसारामाय सोडावी. 5तान बोडाई एने महिमा पिडीन पिडी एने जुवी. आमेन.

दिहरो काल्लोच सुसमाचार

6माहु आश्चर्य लागीह का जो तुमूह मसीहान कृपा माय हादाडील ताफायरीन तुमूह ओलाक माय जेल्दी फिरीन एने दिहरान हाजी सुवार्तान केरीन वोलने लागिल हि. 7पुण तो दिहरो हाजी खोबर जिच नाहं: पुण ती वात ओहली हि का कोलाक इही हि ते तुमूह बिईन आपणु, एने यीशु मसीहान सुवार्ता बिगडावनार प्रयत्न केरणू. 8जर आमु, केव्ही स्वर्गामाय रीन दूत पुण आवो सुवर्तेला सोडीन जे आमु तुमूह कियील हि, ताह सोडीन दिहिरी सुवार्ता तुमूह केनार हि, तर ते श्रापित होय. 9जीही आमु देखील केयीन चुकील हि, तोहोलो आमु पोशा सांतो कि आवो सुवार्ताह सोडीन ज्याह तुमूह होवकेते हि, जर कूण दिहरो हाजूसदेश केनार हि, तर तो श्रापित होय. 10ऐवी मी काय माणहा होमजाळीन किवा बोगवानान? काय मी माणहा संतुष्ट केरणेन ईच्छा करने? जर मी ऐवी ताहवोर माहु च संतुष्ट केरतीन रेणू येतो तर मसीहान दास रेणू नसते.

पौलुस किहिक प्रेरित बोणील

11हे बायहो, मी तुमूह केयीन आपथु कि जी सुवार्ता मी कियील हि, ती माणहान नाहं. 12काहाकाय तो माहु माणहा फायरीन नाहं पोचनो, एने नाह माहु हिकाडील, पुण यीशु मसीहान प्रकटी कर्णान वजसे जुडील हि. 13यहूदिया मतानुसार जो मारो पेल वागणूक एती तान बारामाय तुमूह होमलील हेते का मी बोगवानान कलीसियान माय जुलुम सताव केरतालो एने नाश केरतालु. 14मारो जुलुम जातीनी जे मारहारखो एता, यहूदी मतात जुलुम वोळतेच चालना एता एने आपणो पूर्वजान परंपराकेरता जादा धुन माय एता. 15पुण बोगवानान ईच्छा एनी, तो मार आईकने पेटामायुच माहु थोबाडील एने तान कृपासे हाद लीदु, 16ताहेरया ईच्छा एनी कि कुणबी आपणो सोरा प्रकट केरुहू कि मी दिहरी जातीन माय तान सुवार्ता पोरचार केरूह, तेवी मी माहा केव्ही रक्तान वजेसे सिडिक दर्शन लीईल नाहं. 17एने यरूशलेमत पुण गीयो नाहाताहेरी जा मार ओगाण प्रेरित एता, पुण चालूच अरबाह निकलीन जाईल एने तारीन दमिष्क ला फिरीन आवूह.

18ओवतो तीन वऱ्योमाय मी कैफाला मिलने केरता यरूशलेमाम गीयो, एने तान आहने पंधरा दिह रेणू. 19पुण प्रभुन बाहाक याकूबाला सोडीन दिहीरा प्रेरितांमधून एकास पुण मिलील नाहं. 20ज्या वातू मी तुमूह लेखातुलू, देखू, बोगवानान उपस्थित होमजाडीन किथे ते ठेगणे नाहं. 21यानबादमाय मी सिरीया एने किलकीयाच्या प्रदेशाम आवा. 22पुण यहूदीयान कलीसियान जी मसीहा माय एती, पुण मार मूय ते केविज देखील नाह एता; 23पुण ज्यो होंबेलताली का जो पेल आमूह दोमतालो, तो ऐवी ताच धेर्मान विश्वास हाजी सुवार्तान पोरचार होमलाडने, जाह पोयले तो नाश केरतालो. 24एने मार विषयामाय मी बोगवानान महिमा केरताली.

Currently Selected:

गलतियो पत्र 1: NLXNT

Highlight

Copy

Compare