2 कुरिन्थियो 2

1मी आपणो मोनाम हे ठेराव्यू एता कि पोशा तुमरेहे-यो दुख आपणेन आवूह नाहं. 2काहाकाय जर मी तुमूह दुखी केरुहू, तर माहु आनंद आपणारा कूण रेहू, फक्त तोज ज्याह मी निराश किरील? 3एने मी हि वात तान केरता लिखील कि कां इही एणेन मां कि मी आविलपोर, याफायरीन माहु आनंद जुळणे जुवी ताफायरीन मी निराश एहू; कराण माहु तुमूह आवो आखा वातून बुरहू हि कि जो मारो आनंद हि, तोच तुमूहहु आखान पुण हि. 4मोठला संकटाम एने मोनान काम केरीन आहवा काडील तुमूह लेखत्लू एता, तान केरता नाहं कि तुमूह निराश एने जुवी पुण तान केरता कि तुमूह मोठला प्रेमाह होमजाडीन लेणेन जुवी जे मारा तुमरे पोर हि.

अपराधीह क्षमा

5जर कूण निराश किरील हि, तर माहूच नाहं पुण (ताहेऱ्यो जादा वाईट केरुहू नाहं) काही तर तुमूहहु आखा पुण निराश किरील. 6ओहला मान्हाकेरीन हे शिक्षण जे बायाक हेर्यो पुष्कळांना आपील हि, जादा हि. 7तान केरता ज्यापुररीन हाजो हे हि कि तान अपराध क्षमा केरू एने शान्ति आपदिवू, एणेन मां कि ओहला व्यक्तीनी उंजू जादा नाराजमाय पोडीन जाहू. 8आवो काइजाताहा मी तुमूह विनंती करने कि ताह आपणो प्रेमान खात्री दया. 9काहाकाय मी तान केरता पुण लेखील एता कि तुमूह पारखिल्यु लेहु कि तुमूह मारो आखा वातू मानणु तियार हि कि नाहं. 10ज्यान कुणान तुमूह क्षमा केरणू ताह मी पुण क्षमा करने, काहाकाय मी पुण जे काही क्षमा किरील हि, जर किरील रेंय, तर तानकेरीन मसीहाजागी एईन क्षमा किरील हि. 11कि शैतानोहो आमऱ्येपुररीन धावा चालणेन मां, काहाकाय आमु तान युक्तीपासून एजानल्यो नासोतो.

त्रोआस माय पौलुसान निराशा

12जेहीकाय मी मसीहान सुवार्ता केणेंन त्रोआस माय आवूह, एने प्रभुने मारकेरीन एक बायणो उगाडनो, 13तर मारो मोना माय चैन जुडी नाहं, तान केरता नाहं कि मी आपणो बायाक तीतुस ला देखील नाहं; तान केरता कि ताफायरीन खोबीर लीन मी मासेदोनिया निकलीन गीयो.

मसीह माय विजय उत्सव

14पुण बोगवान धन्यवादीत ओहलो, जो मसीहा माय आखाभूखी आमूह विजय उत्सवात लीन फिरणे, एने आपणो ज्ञानाचा हाजोगेंध आमरेफायरीन प्रत्येक जागे वेरायो. 15काहाकाय आमु बोगवानान आहने उद्धार मिलवील एने नाश एने काय दुयजनाहेर्यो मसीहा हाजोगेंध हेते. 16दिहिरानकेरता तर मोरणेन निमितान मोरील गेंध, एने कोलाक जान जीवनान निमित्ताने जीवनान हाजोगेंध. हाजो आवो वातून योग्य कूण हि? 17काहाकाय आमु ता आखानहोस नासोतो, जे बोगवानान वचनामाय मिस्र केरणू; पुण मोनान खेरो पणाने एने बोगवाना फायरीन मसीहान आवगिया होमजाडीन मसीहा माय बोलेहे.

Currently Selected:

2 कुरिन्थियो 2: NLXNT

Highlight

Copy

Compare