2 कुरिन्थियो 11

पौलुस एने जुठा प्रेरित

1जर तुमूह मारी जारिक मूर्खपणा सहन केरीन लीईल हि तर कोलाक हाजो एय गीयो हि; होव, मारा सहन केरीन ली. 2काहाकाय मी तुमरेबाराम बोगवानान धुन लागाळ रेणे, तानकेरीन मी एकुच एदम्या हेरी तुमरी मांगणी लागडी हि, का तुमूह पवित्र कुवारीन होस मसीहाह होपबोगवानान. 3पुण मी बिणे का जोहलो गेयळेक हुसाररी से हवाला फासाडील एता, तोहोलोच तुमरो मोनान ता शरणतेने एने पवित्रतेने जे मसीहाहेर्यो एणेन जुवी कां, भ्रष्ट किरील जाहू नाहा. 4जर कूण तान आहने आवीन कूण दिहीरा यीशुन पोरचार केरुहू, ज्यान पोरचार आमु किरील नाहाताहा कूण दिहीराह आत्मा तुमु जुडी, जो पेल्लो जुडना नाह एतो; एने उंजू दिहिरी सुवार्ता होमलणार जीला तुमूह पेल्ला मानणनये नाह एता, तर ताह तुमूह सहन केरीन लेनो. 5मी तर होमजाडणु हि कि मी काल्लोबी वातून वोडेवोडे प्रेरिताहून थोडो नाहं हि. 6जर वास्तवामाय हिकणे हि, तेभी पुण ज्ञानामाय नाहं. आमु ज्याह प्रत्येक वातून आखा प्ररकारान तुमरीकेरता प्रकट किरील हि.

7काय यामाय मी काही पाप किरील कि मी तुमूह बोगवानान सुवार्ता लीन होमलावीन; एने स्वताह बुंदे किरील कि उचो एणेन जुवी? 8मी दिहीरा कलीसियान माय लुटील, म्हणजे मी ताफायरीन मंजुरी लीईल म्हणजे तुमरी सेवा केरूह. 9एने ताहेरया मी तुवाहेर्यो एतो एने माहु थोडो एनी, तर मी कुणीपूर हि वोज टाकील, नाहं कारण बायाक मासेदोनिया आवीन मारी गिरीज पुरो केरील; एने मी प्रत्येक वातून स्वताह तुमरे पोर वोज बोणणेन रोकील, एने थोबाडीन रेहू. 10जर मसीहान खेरोपणा मारामाय हि तर अखया देशाम कुनुस माहु आवो गर्वापासून उभराखील नाहं. 11काहा? काय मी तान केरता मी तुमूह प्रेम केरतीन नाहं? बोगवानान हे मालूम हि कि मी प्रेम करने.

12पुण जे मी करने, तोज केरतीन रेईन कि जे माणहे संधी होद्णु ताह मी संधी सापडे आपण्यू, नाहीम्हणजे ज्या वातून ते गर्व केरणू, तामाय ते आमरेहोस एणेन जुवी. 13कारण इही माणहे ठेगणे प्रेरित, एने हुदील काम केरणारा, एने मसीहान प्रेरितांचा रूप देरणारे हेते. 14हि काही आश्चर्याची वात नाहं कारण शैतान स्वताह पुण ज्योतीमय स्वर्गदूताचा रूप पेरणु करने. 15तान केरता जर तान दास पुण धार्मिक सेवाकेरणाराह रूप लेय, तर काही मटली वात नाहं, पुण तान शेवेट तान कामापुररीन एय.

प्रेरितान रूपामाय पौलुसान दुख बोगणो

16मी पोशा किथु, कि कूण माहु मूर्ख होमजू; नाहा नापून मूर्ख होमजाडीन मारा सहन केरीन ली, म्हणजे जारिक मी पुण गर्व केरूह सेकु. 17आवो बेधडक डामर्यो जे काही मी किथे, ते प्रभुन आज्ञेने नाहं पुण होमजू मूर्ख पणानेच किथे. 18जेहीकाय जास्तीहोस माणहे शरीराप्रमाणे गर्व केरणू, तर मी पुण गर्व केरुहू. 19तुमूह तर समजदार एईन आनंदमाय गांडा सहन केरीन लेनो. 20काहाकाय जेहीकाय तुमूह कूण दास बोनाडीन लेनो, केव्ही खाइन जाथू, केव्ही फ्साविल्यो लेणे केव्ही स्वताह मोठा बोनाडीन लेणे, केव्ही तुमरो मुयापूर थापड देय, तर तुमूह सहन केरीन लेनो. 21मारा केणे अनादरान रितीवरच हि, होमजू आमु जानकेरता अशक्तासारखे एता.

पुण ज्या कायताहा वातून कूण हिमंत केरतीन मी गांडाह किथे, तर मी पुण हिमंत करने. 22काय ते इब्रानी हेते? मी पुण हि. काय तोज इस्राएल हेते? मी पुण हि. काय तोज अब्राहामान वंश हेते? मी पुण हि. 23काय तोज मसीहान दास हेते मी गाडोनहोस किथे मी ताउगेरीन ओगाण हि! जादा मेहनत केरणेम; पोशा पोशा कैद होनारो; फटकाखान्यू; टायमाटायमापोर मोरणेन केरता. 24पाच वेळा मी यहूद्यांन आथान एकोणचाळीस फरके खाले. 25तीन वेळा मी बेत खाले; एक वेळा मारपुर डीगुडदी केरणेम आवा; तीन वेळा जहाज, जीपोर मी चीढील एतो, तुटगियो गीयी; एक रातदीही मी समुद्रा माय काडीन. 26मी वेल टाइम जात्र; नदी दुखनेमाय; डाकुंन जेखम; आपणो जातीन जखमानहोस; डोगोओ जखमामाय; समुद्राम जखमामाय; झुठो बायाकामाय दिहरी जातीन जखमामाय रेणू. 27मेहनत एने मेहनतीमाय टायमाटायमापूर; जागेहे रेणू; बुखो तिहलागीलहि; वेळ टाइम उपास केरनेमाय; जडामाय; उगाडामाय रेणें; 28एने दिहीरा वातूह सोडीन ज्यान वर्णन मी केरतीन नाहं, आखा कलीसियाची चिंता मी प्रत्येक एक दिह माहु दाबिल हि. 29कुणीन अशक्त पणाने मी अशक्त एता नाहं? कूण ठोकर खाइताहा मारो जीव दुखिल नाहं?

30जर गर्व केरणेन जरुरी हि, तर मी आपणो अशक्त पणान वातुपोर गर्व केरुहू. 31प्रभु यीशुन बोगवान एने आबुक जो कायम धन्यवादीत हि, मालूम हि कि मी ठेगणे बोलीह नाहं. 32दमिष्कमाय हाथीतास राजापरत जो बळवो एतो, माहु देरणे केरता दामिश्काच्या नगरापोर जागतालो बोहाडील एतो, 33एने मी टोपलामाय बोहाडीन खिडकीमायरीन आथापुररीन उतरीन गीयो, एने तान हातामायरीन वाचीन गीयो.

Currently Selected:

2 कुरिन्थियो 11: NLXNT

Highlight

Copy

Compare