1 कुरिन्थियो 4

मासीहान प्रेरित

1माणुहे आमूह मसीहान दास एणेन बोगवानान रहस्यान कारभारी होमजणू. 2ओवतो न्याहरी कारभारी वात देखाती कि तो विश्वास योग्य जुवी. 3पुण मारो नजरोम हि जुलुम आत्या वात हि कि तुमूह केव्ही माणहान कूण न्याय केरणार माहु पारखुनारू, पुण मी स्वताह पारखणे नाहं. 4काहाकाय मारा मोन माहु काल्लोबी वातून दोषी ठेरावीन नाहं, पुण यान मी निर्दोष ठेरावीन नाहं काहाकाय माहु चौकशी केरणार प्रभु हि, 5तान केरता जो ताहवोर प्रभु आविह नाहं, वेलान पेलूच काल्लूच वातून न्याय एय नाहं; तेवी आंधाराम लिकाईल वातू उजालाम देखाळूहु, एने मोनान पुसिलो उघड केरुहू, तेवी बोगवाना फायरीन आखान वाहवा केरनेमाय आवी. 6हे बायहो, मी आवो वातू तुमरीकेरता मारकेरता अप्पुलोसान चर्चा वार्तान रुपाम केरील हि, तान केरता कि तुमूह आमरे पोररीन हे शिक्जीव कि लेखणारा ओगाण जाहू मा, एने एकाच पक्षामाय एने दिहरान विरोधामाय गर्व केरूह मा. 7काहाक्य तुमरीम एने बिहरा कूण भेद करने? एने तारहेर्यो काय हि जे तू दिहरापुररीन जुळा विते नाहं? एने ताहेरया तू दिहरापुररीन जुळील तर इही गर्व का करने जोहलो काय जुळील नाहं.

8तुमूह तर तृप्त एय गीया हि, तुमूह श्रीमंत एय गीयो हि, तुमूह आमु नसताना राज्य किरील; पुण इही हाजो एय गीयो हि कि तुमूह राज्य केरतीन रेतालान आमु पुण तुवाहेर्यो रेयीन राज्य किरील हि. 9मारो लक्षाम बोगवानान आमु प्रेरितांन ओलखानेच ओवतो ओहला मान्हाकेरीन ठेरायेल हि, ज्यान मोरणेन आज्ञा एय गीयी हि; काहाकाय आमु जगा वोले स्वर्गदूत एने माणहान केरीन तमाशा ठरिनिल्यो हि. 10आमु मसीहान केरीन मूर्ख हि, पुण तुमूह ख्रीस्तात बुद्धिमान हि; आमु अशक्त हि पुण तुमूह बलवंत हि तुमूह मानपान मेलविला पुण आमु अपमान एतो. 11आमु आवो टायमापोरउर बुखल्या एने तिहल्या एने उगडी हि, एने ठोसकात्लू खाणे हेते एने बाहेर-बाहेर फिरणे: 12एने आपणाच आताकेरिन मेहनत केरथू. माणहे आमूह वाईट केणु, एने आमु ताह आशीर्वाद आपथु, ते वेखडणु केरणू; आमु ते सहन करने. 13ते आमरी निंदा केरणू, आमु विनंती करने. आमु आजवोर जगान गाळ एने आखा वस्तूंचे पापडू सारकोस एय गीयो हेते.

चेतावणी

14मी तुमूह लाजवाडणे केरणेन केरता लेखथु नाहं, पुण आपणो प्रिय सोरो समजून तुमूह हिक करने. 15काहाकाय ख्रीस्तात तुमरो शिकाडणारे दहा हजार पुण रेणा हि, तेभी पुण तुमरो आबुक जादा नाहं तान केरता कि मसीह यीशु माय सुवार्तान द्वारे मी तुमरो आबुक एनो. 16तान केरता मी तुमूह विनंती करने कि मारो सारकोस वागणू केरू. 17तानकेरीन मी तीमुथियुसाहला जो प्रभु माय मारो प्रिय एने विश्वास योग्य सोरो हि, केरीन तुमरेहे-यो मोकल्य हि तो तुमूह मसीहात मारी वागणू इआवीह केरीन आपण्यू जोहलो प्रत्येक जागीपोर प्रत्येक कलीसिया माय हिक आपथु. 18काही तर इही फुग गीया हि, जीहीकाय मी तुमरीफाय आवणेज नाहं. 19पुण प्रभुन ईच्छा रेंय तर मी जल्दीस आवूह, एने ता फुगील वातुहू नाहं, पुण तान सामर्थ्यान जाण लेह. 20काहाकाय बोगवानान राज्य वातीमाय नाहं पुण सामर्थ्या माय हि. 21तुमूह काय जुवी? काय होटी लीन तुमरेहे-यो आवहू, केव्ही प्रेम एने नम्रतान आत्मा लीन आवहू?

Currently Selected:

1 कुरिन्थियो 4: NLXNT

Highlight

Copy

Compare