Éxodo 26
26
Nahilpac' Templo
1Ya me apas te Nahilpac' Templo ta lajunlihc lino-pac' jalbil soc yax, chi'in-yax soc tsajal estambre, ya me apas soc querubinetic te buen t'ujbil pasbile, 2waxaqueb scha'winic (28) xuhc'ubil#26.2 12.5 metros snahtil te jujulihc, soc chaneb xuhc'ubil#26.2 2 metros sjamalil; pajal sp'isol te jujulihc. 3Ho'lihc pac' ya snuhp'ticlan sbahic ta ts'isel, hich nix te yan ho'lihc xane. 4Ya me awotsesbe syaxal xojbenal ta snahtil sti'il te slajibal pac' yu'un te sbahchahpal paq'ue. Hich nix yac apas ta snahtil sti'il te scha'chahpale. 5Lajuneb yoxwinic (50) xojbenal yac awotses ta sba lihquil pac'; soc lajuneb yoxwinic (50) xojbenal yac awotses ta snahtil sti'il te jlihc pac' te ay ta scha'chahpale. Nuhp'ulnuhp' ya xc'oht te xojbenale. 6Pasa lajuneb yoxwinic (50) ganchohetic ta oro te yac awac'ticlambe stsac sba scha'chahpal a, hich junax ya xc'oht a te Nahilpac' Templo.
7Soc ya me apas buluchlihc paq'uetic ta stsotsel tentsun yu'un smuhquil te Nahilpac' Templo. 8Te snahtil te jujulihc lajuneb scha'winic (30) xuhc'ubil,#26.8 13.5 metros soc chaneb xuhc'ubil sjamalil; junax sp'isol te buluchlihc. 9Parte xanup'ticlan ho'lihc pac', soc parte xanup'ticlan te waclihc xane. Te swaquebal pac' ya me apux tal ta sti'il te Nahilpac' Templo. 10Ya me awotses lajuneb yoxwinic (50) xojbenal ta snahtil sti'il te slajibal pac' yu'un te sbahchahpal, soc lajuneb yoxwinic (50) xojbenal ta snahtil sti'il te slajibal pac' yu'un te scha'chahpale. 11Soc pasa lajuneb yoxwinic (50) ganchohetic ta bronce te yac awotses ta xojbenaletic; ya me awac'ticlan stsac sba scha'chahpal scuenta yu'un junax ya xc'oht a te smahquile. 12Te j'ohlil jlihc te ya spas sobra ya xlihcaj cohel ta spat te Nahilpac' Templo. 13Te jun xuhc'ubil#26.13 45 centímetros te ya spas sobra ta jujun sti'il te paq'uetic ya me xlihcaj cohel ta jujujehch scuenta smahquil te Nahilpac' Templo. 14Soc ya me apasbe smuhquil te nahilpac' ta snuhculel tat tuminchij bombil ta tsaj, soc ta nuhculetic ta sba.
15Ya me aloq'ues tablahetic ta acacia-te' yu'un te Nahilpac' Templo te toj ya yich' tehc'anele. 16Te jujun tabla lajuneb xuhc'ubil#26.16 4.5 metros snahtil soc j'ohlil scheb xuhc'ubil#26.16 65 centímetros stahn. 17Ay chebcheb slawuxte'el ta jujun tabla, yu'un ya stsac sba soc a te yane. Hich me xapas spisil te tablahetic yu'un te Nahilpac' Templo. 18Pasa jtahb tablahetic ta stojol sur yu'un te Nahilpac' Templo. 19Pasa cha'winic (40) scajtajib ta plata ta ye'tal te jtahb tablahetic: chebcheb scajtajib yu'un te cheb slawuxte'el ta ye'tal te jujun tabla. 20Ta yan jehch te Nahilpac' Templo, ta stojol norte, ya me apas jtahb tablahetic 21soc cha'winic (40) scajtajib ta plata: chebcheb scajtajib ta ye'tal jujun tabla. 22Ta spat te Nahilpac' Templo, ta stojol banti ya xmahl c'ahc'al, pasa waqueb tablahetic. 23Soc cheb tablahetic yac apas yu'un te jujun xuhc ta spat te Nahilpac' Templo; 24ya me slac' sbahic ta ye'tal c'alal ta toyol ta banti ya x'och te sch'ocowile. Hich nix te yan cheb tablahetic; hich ay te schebal xuhc. 25Ha yu'un ay waxaqueb tablahetic soc ay waclajuneb (16) scajtajib ta plata; chebcheb scajtajib ta ye'tal te jujun tabla.
26Ya me apasbe ho'ch'ix sc'atal-te'el ta acacia-te' yu'un te tablahetic ta jehch te Nahilpac' Templo, 27ho'ch'ix sc'atal-te'el yu'un te tablahetic ta yan jehch te Nahilpac' Templo, soc ho'ch'ix ste'el yu'un te tablahetic ta spat, ta stojol smahlib c'ahc'al. 28Te sc'atal-te'el te ya xc'ax ta ohlil yu'un te tablahetic ya xc'oht ta jujun sti'il. 29Ya me apots ta oro te tablahetic soc ya me apasbe sch'ocowil ta oro te banti ya sohl te sc'atal-te'el, soc ya me apots ta oro te sc'atal-te'ele. 30Ya me achahpan te Nahilpac' Templo hich te bin ut'il a'botat awil ta wits.
31Ya me apas jlihc tsalul pac' ta yax, chi'in-yax soc tsajal estambre soc lequil ts'otbil lino. T'ujbil me ya yich' ch'alel ta ts'isel ta querubinetic. 32Ya me ajohc'an soc ganchohetic pasbil ta oro ta chaneb yoyal pasbilic ta acacia-te' soc potsbilic ta oro te ayic ta scajtajib pasbilic ta plata. 33Ya me ajohc'an te tsalul pac' ta ye'tal te ganchohetic. Ta yutil te pac' ya me awac' te scaxahul Testigo-c'op. Hich te tsalul pac' ya yac' te jtsahl ya xc'oht te Ch'ul Awilal soc jtsahl ya xc'oht te Mero Ch'ul Awilal. 34Ya me awac' te yawil stahel perdón ta sba te scaxahul Testigo-c'op te ay ta Mero Ch'ul Awilal. 35Ta fuera yu'un te tsalul pac', ta stojol norte, ya me awac' te mesa, soc ya me awac' te scajtajib c'ahc' ta stojol sur te snuhp'usitayej sba soc te mesa.
36Ya me apas pac' ta yax, chi'in-yax soc tsajal estambre soc lequil ts'otbil lino scuenta sti'il te Nahilpac' Templo, ha ya'tel te mach'a ya sna' sts'isel. 37Pasbeya ho'eb yoyal ta acacia-te', ya me apots ta oro soc te sganchohile; soc ya me apasbe ho'eb scajtajib ta uhltesbil bronce.
Currently Selected:
Éxodo 26: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
