Éxodo 18
18
Jetro tal yula'tay Moisés
1Te Jetro, te sacerdote yu'un Madián soc ha snihal-mamal Moisés, la ya'iy spisil te bintic pasbot yu'un Dios te Moisés soc Israel te pueblo yu'un, soc te bin ut'il Jehová la sloq'ues tal Israel ta Egipto. 2Te Jetro te snihal-mamal Moisés, la yic' ochel ta sna te Séfora te yihnam Moisés te c'alal ticonot bahel yu'un Moisés 3soc te cheb yalatac: Gersón#18.3 Ilawil nota ta 2.22. sbihil te jtuhle, yu'un la yal te Moisés: Jbehyemon ta yan q'uinal, xchi; 4Eliezer#18.4 Eliezer: Dios ya scoltayon, xchi. sbihil te yane, yu'un la yal: Te Dios yu'un te jtat la scoltayon soc la yac'on ta libre ta espada yu'un faraón, xchi.
5Te Jetro te snihal-mamal Moisés, soc te snich'nab soc te yihnam Moisés, talic ta banti ay Moisés ta jochol taquin q'uinal te banti spasoj scampamento ta nopol wits yu'un Dios. 6La sticon bahel c'op ta stojol Moisés: Ho'on te Jetro te anihalmamal, tal quilat soc te awihnam soc te cheb yalatac, xchi.
7Te Moisés baht sta tal te snihal-mamal, la snijan sba ta stojol soc la yuhts'uy. La sjoc'obe sbahic bin yilelic, soc ochic bahel ta nahilpac'. 8Te Moisés la yalbe ya'iy te snihal-mamal spisil te bintic la spas Jehová ta stojol faraón soc te egipciohetic scuenta sc'uxultayel te Israel, soc spisil te swocolic te c'oht ta pasel ta be soc bin ut'il coltayotic yu'un Jehová.
9Te Jetro mero tse'el yo'tan yu'un te bin lec la spas Jehová ta stojol Israel, te la scoltay loq'uel ta sc'ab te egipciohetique. 10Hich la yal te Jetro: Bayel me yutsil sc'oblal te Jehová te la scoltayex loq'uel tal ta sc'ab te egipciohetic soc ta sc'ab faraón, te la yac' ta libre te pueblo ta sc'ab te egipciohetique. 11Yo'tic la jna'ix te c'ax hich muc' a te Jehová te bin ut'il spisil te diosetic, te hich la spasbe te mach'atic la yuts'inic te Israel ta scuenta stoybahilic, xchi.
12Te Jetro te snihal-mamal Moisés la ya'be scohtol chic'bil mahtaniletic soc milbil mahtaniletic te Diose. Te Aarón soc spisil te mamaletic yu'un Israel tal sjoquinic ta we'el te snihal-mamal Moisés ta stojol te Diose.
Moisés la sle juecetic
13Ta yan c'ahc'al te Moisés la shuhcan sba ta schahpanel te ants-winiquetic. Teq'uelic ta stojol Moisés ta sab c'alal ta tibiltic. 14C'alal la yil te snihal-mamal Moisés spisil te bin yac ta spasbeyel te pueblo, hich la yal: ¿Bin a te yacat ta spasel soc te pueblo? ¿Bin yu'un te atuquel huculat ta schahpanel, soc spisil te pueblo tec'ajtic ta atojol ta sab c'alal ta tibiltic? xchi.
15Te Moisés hich la sjac'be te snihal-mamal: Como ya xtalic ta jtojol yu'un ay bin ya sjoc'obeyic te Diose. 16Te c'alal ay c'opetic yu'unic, ya xtalic ta jtojol; ya jchahpan ta schebalic soc ya calbe ya'iyic te bin ya yal te mandariletic yu'un te Diose, xchi.
17Ha yu'un te snihal-mamal Moisés hich la yal: Ma lecuc te bin yac apas. 18Ya xluhbat yu'un soc te pueblo te sjoquinejat; como te a'tel c'ax al yac awa'iy, ma xhu' awu'un spasel ta atuquel. 19A'iya awa'iy yo'tic te bin ya calbat, ay bin ya ca'bat ana', soc ya me sjoquinat te Diose. Ha'at yac atehc'an aba ta c'op ta stojol Dios ta scuenta te pueblo, soc ha'at yac awalbe Dios te c'opetic yu'unique. 20A'beya snopic te mandariletic, soc a'beya sna'ic banti behil ya sc'an ya xbehenic soc te bin ya sc'an ya spasic. 21Soc tsaha winiquetic ta yohlil te pueblo te toj yo'tanic, te xi'ojic te Diose, ha winiquetic te smelelil ya xc'opojic, te ya yihlayic te bin ma stojiluc ta tahel; a'beya ta stojol te pueblo scuenta jcuentahinwanejetic yu'un lajunwinic yoxbahc' (1,000), yu'un ho'winic (100), yu'un lajuneb yoxwinic (50) soc yu'un lajuntuhl (10). 22Ha'ic ac'a schahpanic te pueblo ta spisil ora te banti ma ba tulan sc'oblal. Yan te banti tulan te c'ope, ya yich'ic tal ta atojol. Hich ya xpehc'aj yalal a te ihcatsil ay ta acuenta, ha'ic ya scoltayat ta spasel te a'tele. 23Teme hich yac apas, soc teme hich ya spasat ta mandar te Diose, yac acoltay aba a, soc spisil te pueblo ini lamal q'uinal ya ya'iyic te ya suhtic bahel ta snahic, xchi.
24Te Moisés la yich'be ta cuenta te sc'op te snihal-mamal, la spas spisil te bin halbot yu'une. 25La stsa ta yohlil spisil Israel winiquetic te toj yo'tanique. La ya'be ta stojol te pueblo scuenta jcuentahinwanejetic yu'un lajunwinic yoxbahc' (1,000), yu'un ho'winic (100), yu'un lajuneb yoxwinic (50), soc yu'un lajuntuhl (10). 26Ha'ic la ya'iyic chahpanwanej ta spisil ora te banti ma ba tulan sc'oblal. Yan te banti chuhcul te c'op, la yich'ic tal ta stojol Moisés. 27Patil te Moisés la spatbe bahel yo'tan te snihal-mamal, hich baht ta slumal.
Currently Selected:
Éxodo 18: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
