Éxodo 17
17
Loc' ha' ta ton
1Spisil te pueblo yu'un te snich'nab Israel loq'uic bahel ta jochol taquin q'uinal Sin, c'unc'un behenic bahel hich te bin ut'il te smandar Jehová, c'oht spas scampamentohic ta Refidim, pero mayuc ha' ya yuch'ic tey a. 2Te pueblo hahch stijic ta c'op te Moisés, hich la yalic: ¡A'botcotic ha' yu'un ya cuch'cotic! la yutic.
¿Bin yu'un yac atijonic ta c'op? ¿Bin yu'un yac awilbeyic yo'tan te Jehová? xchi te Moisés.
3Te snich'nab Israel ay taquinti'il la ya'iyic tey a, hich hahch stijic ta c'op te Moisés, hich la yalbeyic: ¿Bin yu'un la aloq'uesotcotic tal ta Egipto yu'un yac amilotcotic ta taquinti'il soc cal-jnich'ancotic soc te jchambahlamcotic? la yutic.
4Ha yu'un te Moisés la yawtay te Jehová, hich la yal: ¿Bin ya jpas soc te pueblo ini? Jteb xanix ya sc'an ma ba ya sch'ojonic ta ton, xchi.
5Te Jehová la yalbe te Moisés: C'axan bahel ta stojol te pueblo soc ic'a bahel sjoquinat cha'oxtuhl te mamaletic yu'un Israel, soc ich'a bahel te anahbate' te la amaj a te muc'ul-ha'. 6Tey ya jtehc'an jba ta atojol ta muc'ul ton ta wits Horeb. Ya me amaj te ton, ya xloc' tal ha' tey a te ya yuch' te pueblo, xchi. Hich la spas te Moisés ta stojol te mamaletic yu'un Israel. 7La ya'be sbihilin Masah#17.7 Masah: la yilbe yo'tan, xchi. soc Meriba#17.7 Meriba: utamba, xchi. te lugar, yu'un tey la yut sbahic a te snich'nab Israel soc la yilbeyic yo'tan te Jehová c'alal la yalic: ¿Ay bal ta cohliltic te Jehová, o ma'uc? te xchihique.
La ya'beyic guerra Amalec
8Te Amalec tal ya'be guerra te Israel ta Refidim. 9Te Moisés la yalbe te Josué: Tsaha winiquetic, bahan a'beya guerra te Amalec. Pajel ho'on ya jtehc'an jba ta ba tsehl soc ya jtsacbe te snahbate' te Diose, xchi.
10Te Josué hich la spas te bin ut'il halbot yu'un te Moisés, la ya'be guerra te Amalec. Te Moisés, Aarón soc Hur mohic bahel ta ba tsehl. 11C'alal ya stoy sc'ab te Moisés, ya xhu' yu'un guerra te Israel; pero te c'alal ya scohtes sc'ab, ya xhu' yu'un te Amalec. 12Ya xluhb sc'ab te Moisés, ha yu'un la yich'ic tal ton, la ya'beyic shuhcan sba tey a; te Aarón soc te Hur la stsacbeyic sc'ab, tuhlultuhl ta jujujehch. Hich la yich' yip sc'ab a ha to c'alal mahl c'ahc'al. 13Hich te Josué la stsal ta espada te Amalec soc te pueblo yu'une.
14Te Jehová la yalbe te Moisés: Ts'ihbaya ta hun scuenta sna'ojibal, soc halbeya te Josué te ho'on ya jtup'be spisil sna'ojibal te Amalec ta ye'tal ch'ulchan, xchi.
15Te Moisés la spasbe scajtajib smahtan Dios, la ya'be sbihilin: Jehová-nisi,#17.15 Jehová-nisi: ha bandera cu'un te Jehová, xchi. 16yu'un hich la yal: Te bin ut'il la shach sc'ab ta scontrahinel te smuc'ul huctajib Jehová, te Jehová ya ya'be guerra te Amalec ta cajalcaj sts'umbal bahel, xchi.
Currently Selected:
Éxodo 17: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
