یونگچیسچانّی دوس 4
4
زیرّجیدچانّی خُدے ژالزیگس۔
1تیبوے ستینگنے نگے نامکھے نانّگا پھیستے یودکھانّی گھوجیگ تھونگ، یانگ سنگونلا تشورکھانّی تونگ تسوگسّی سکادپوے نگا، ”کیینلا یونگ، نگے کھیورانّگا ستینگنے جونگّوشیسچانگون ستانین“ مولّاراگ۔ 2تینّامالّا خُدے رُوح نگیکا بابستے نگے نامکھے نانّگا ژوگسٹھیسّیکا جُوگستے یودکھانبو تھونگ۔ 3تیکا جُوگستے یودکھانبو ما لدانگشان۔ رینچان یو تانگ چھورو ژوگس دوگ، یانگ تے ژوگسٹھیسپو، ردوا رینچان لجانگکھو ژوگس لدانگشان زاچھوتھونگی سکورتے دوگ۔ 4تے ژوگسٹھیسپو یانگ ٹھیس 24 سکورتے دوگ، تیگونّیکا اُسکیونگ 24 جُوگستے یودکھانگونّی نامزا شان چان کارپو یانگ، کھونگونی گویکا سیرّی تاج نامستے تھونگ۔ 5یانگ تے ژوگسٹھیسپوے کانے سکاملاگی اوت تانگ ڈوگلدیرکھانّی سکادگون بینگدوگ۔ جُوگسٹھیسّی لدُونلا نگادچان بارین یودکھانّی مارمے ردونّانگ دوگ، کاگون خُدے رُوح ردونبو جُوگستے اینوگ۔ 6یانگ تیبوے لدُونلا شیل زیرکھانی گیاتشو ژوکشیگ دوگ، کا لام بو سالپو ٹھاسالسال تھونگدوگ۔
تے جوگسٹھیس پوا سروک یودکھان ژیی سکورتے دوگ، تیگونّی گیابدون نیسکو میگی گنگستے دوگ۔ 7تے سروک یودکھان دانگپوبو سینگّے ژوگس، نیسپابو بیتوژوگس، سومپابوے لدونگبو می ژوگس، یانگ جیپابو ورکھانّی لاگ ژوگس دوگ۔ 8سروک یودکھان ژیکوا شوگپا ڈوگڈوگ دوگ، تے شوگپاگونّی ستاگیوگ تشانگما میگی گنگستے دوگ۔ یانگ تشاننین میدپا چھادمیدلا تیگونّی جُوروگ،
”ہلژخمہ، ہلژخمہ، ہلژخمہ
مسیح خُدے کھیود چان این۔
سنگونلا جُوگستے یودکھان، داگسانگ جُوگستے،
یانگ سکیودچیسچان این۔“
9نام سروک یودکھانگونّی ژوگسٹھیسّیکا جُوگسکھان کا بو تُوسگیُونّے گیُون جوگسانوگ کھونّگا ستودپا، سیوا تانگ، شُکر پھول زانے، 10اُسکیونگ 24 بُوی ژوگسٹھیسّیکا جُوگستے یودکھان کا بو تُوسگیُونّے گیُون جوگسانوگ کھونگی لدُونلا چھاگپھولاین کھونّگا چولس۔ کھونگونی رانگرانگی تاج پو جُوگسٹھیسّی لدُونلا بورتے مولس،
11”نگاجے مسیح تانگ نگاجے خُدے،
نیرانگ نی سپال، سیوا تانگ وانگ تھوبچیسّی اوسپا،
چیازیرنا نیرانگی چیتشانگما چوا زادتے
نیرانگی تھوگّونگس نانگجین
تیگون سونپو ناسشوگّا زادس۔“
Currently Selected:
یونگچیسچانّی دوس 4: LBJNT
Highlight
Copy
Compare
Share
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
