یونگچیسچانّی دوس 5
5
ثیلکھانّی شوقبُو تانگ لوگو۔
1نگے تے ژوگسٹھیسّیکا جُوگستے یودکھانّی چھاگ یاسپے نانّگا، ثیلکھانّی شوقبُو گیابدون نییسکویکا ڈیسکھان تانگ تھیتسے ردون گیابستے یودکھانبو تھونگ۔ 2یانگ نگے فرشتا جیگسپو جیگی سکاد چھینموے نانّگا مولین تشور، ”ای ثیلکھانّی شوقبُوئ تھیتسیگون چاگستے پھیچیسّی اوسپا سو این؟“ 3اِین نانگ نامکھا، یا دُنیائیکا دُوگکھان، یا سے یوگا یودکھان سوجیگّانگ تے شوقبُو بو پھے یا ستا مانیان۔ 4نگا ثانٹے نگوسپین چیازیرنا سوجیگّانگ، تے شوقبُو پھیچیس، یا سیلچیسّی اوسپا مابینگ۔ 5تینے اُسکیونگونی ٹونے چیگی نگا مولس، سیمسیر مازاد ”ہلتوس یہُودیہ قومِنگ نا اِنمی سِنگے، گیالپو داؤد ّی اولاد، گیالکھا ک تھوبکھان، کھونگ نی تھیتسے ردونکو چاگستے شوقبُو پھیچیسّی اوسپاچانبو جُوگستے اینوگ“
6تینے نگا سادتے یودکھان تسوگسّی لوگوجیگ تھونگ، کھونگ تے سروک یودکھان ژیکو تانگ اُسکیونگ 24 تھانے سکورتے یودکھانّی جُوگسٹھیسّی لدُونلا جانگستے دوگ۔ تے لوگوبوا راچو ردون تانگ میگ ردون دوگ، کا بو خُدے دُنیا گانگپوے نانّگا کالا زادکھانّی رُوح ردونبو اینوگ۔ 7تے لوگوبو سکیودتے ژوگسٹھیسّیکا ژوگسکھانّی چھاگ یاسپانے، تے ثیلکھانّی شوقبُو بو لینس۔ 8کھونگی شوقبُو بو کھونگرانگی چھاگّا نامسّاچیگ، سروک یودکھان ژیکو تانگ اُسکیونگ 24 گُونی لوگوی لدُونلا سجدہ تانگس ۔ یانگ کھونگ تشانگمے لاگا تارچانّی رولمو یانگ سپوس سکانگسکھانّی سیرّی گورمو ریگ دوگ، تے سپوسگون خُدے میگونّی دُعا گُون اینوگ۔ 9تیگونّی لو سوماجیگ تانگس،
نیرانگ، تے ثیلکھانّی شوقبُو بو لینتے
تھیتسیگون چاگچیسّی اوسپا اینوگ۔
چیاجونا نیرانگ ڈونگستے،
نیرانگی سکو ٹھاق رینلا شالّا زادتے،
ریگس تشانگما، سکادریگس تشانگما تانگ،
گیالکھاگ تشانگمے میرگیودگونّے
خُدے پھیا میگون نیوا زادتے اینوگ۔
10نیرانگی تے میگون نگاتانگونّی
خُدا جابشی چوچیسّی پھیا،
گیالثید تانگ اِمام گُون چوا زادس۔
یانگ تیگونّی دُنیائیکا وانگثولین۔
11تینے نگے ستاچیگ، فرشتا ستونگٹاگ ٹیٹاگ مانگپوے سکاد تشور، تیگونّی ژوگسٹھیس، سروک یودکھان ژیکو تانگ اُسکیونگ 24 گُونلا تھانے سکورتے دوگپین۔ 12سکاد چھینموے نانّگا تیگونّی لو تانگدوگپین،
”تے سادکھانّی لوگوبوا وانگ، نور، شیسرابس، شید،
سیوا، سپال تانگ ستودپا تھوبچیسّی اوسپا این۔“
13تینے نگے نامکھا، دُنیا، سے یوگا یودکھان تانگ،
گیاتشوے نانّگا یودکھانّی ثوگچان تشانگمے،
”ژوگسٹھیسّیکا جُوگسکھان تانگ لوگوا ستودپا، سیوا،
سپال تانگ وانگ گُون تُوسگیُونّے گیُون تھوبشیگ“
زیرین لو تانگین تشور۔
14تینے تے سروک یودکھان ژیکوے جْوس ”امین، “ یانگ تے اُسکیونگونی چھاگپھولاین کھونگونلا چولس۔
Currently Selected:
یونگچیسچانّی دوس 5: LBJNT
Highlight
Copy
Compare
Share
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
