یونگچیسچانّی دوس 3

سردیسی عبادت خانہ لا جُولون۔

1ای ایگیبو سردیسی عبادت خانہے فرشتا ڈیس۔

ای لونبو، خُدے رُوح ردون تانگ سکارما ردونّیکا وانگ یودکھانّی چھوگسنے این۔ کھیوجاگونّی چوکھان تشانگما نگا گیوسیود، جانماگونّی کھیوجا ایمانی نانّگا سونپو اینکھان تھیانانگ، رُوحانی تھوگنے کھیوجاگون شیتے اینوگ۔ 2نییدنے لونگشیگ، کھیوجاگونّی نانّگا لوستے یودکھانّی ایمان شیکییسچانبو ستانپو چوشیگ۔ نگے تھونگچیسلا کھیوجے لاس چوکھانگون، نگے خُدے تھوگستھادچیسّی تشاد ڈانڈا لیب ماتھوبتوگ۔ 3ایدتو چوشیگ، کھیوجاگونلا تھوبتے یانگ تشورتے اینکھانّی لابجابویکا لاگلین چوس، یانگ گیودپا چوس۔ کالتیس کھیوجاگون نیید ماتشادنا، نگا ہونمیدلا کونما تسوگسلا کھیوجا چھادپا چادّا یونگین، اِین نانگ تیتوسپو کھیوجا گیُوس میچھا۔

4چیاینّانگ، کھیوجے سردیس نانّگا تارُوانگ کھونگرانگونّی کوسلاگّا لاس نگانپے ٹیما پھوگ ماچوگکھانّی می نیونگونجیگ دوگ۔ تیگون کوسلاگ کارپو گونتے نگا نیامپو ڈولین ، چیازیرنا تیگون تے سیوے اوسپا اینوگ۔ 5گیالکھا تھوبکھانگونلانگ شان چانّی کوسلاگ کارپوبو سکوناین۔ نگے کھونگونی مینگبو تھامیدپے میتشیے شوقبُوئ نانگنے ماشیگّا نگارانگی یاب تانگ کھونگی فرشتاگونّی لدُونلا یگون نگے این زیرتے شادین۔ 6نامچھوگ یودکھانگونّی نیونشیگ، خُدے رُوح بوے عبادت خانہ گونلا مولکھانگون نیونشیگ۔

فِلدلفیہ پے عبادت خانہ لا جُولون۔

7ای ایگیبو فِلدلفیہ پے عبادت خانہے فرشتا ڈیس۔

ای لونبو ہلژخمہ تانگ لدینبا اینکھانبوے چھوگسنے این، کابوے لاگا گیالپو داؤد ّی گیالثیدّی کولیگپو یود۔ نگے پھیکھانگون سوانگ چوگ مینیان، یانگ چوگکھانگون سوانگ پھیمینیان۔ 8نگا کھیوجے لاسگون گیوسیود۔ ستوس، نگے کھیوجے لدُونلا گھوجیگ پھیستے یود، کا بو سوانگ چوگ مینیان۔ کھیوجاگون شیدمید اِین نانگ تارُوانگ نگے لابجاگونلا لاگلین چوستے نگیکا ایمان چوامید مازیرکھانبوانگ نگا گیوسیود۔ 9ستوسشیگ، خُدے می این زیرکھانّی یہُودی پاگون زونجان اینوگ، کھونگون خُدے مانپا، شیطانی عبادت خانہ نے اینوگ۔ نگے کھونگونلا کھیوجاگونّی کانگپیکا گییلتے کھیوجاگون نگے چیسپا چوکھانّی میگون این زیرچوگاین۔ 10زودپا نیامپو کھیوجاگونّی ردوگنگال گُون کھورتے نگے کا تانگکھانگون نیان پاسانگ، نگے کھیوجاگون تے تشودلتے توسپوے نانگنے سکیوبین، کا بو دُنیا گانگپوے ایمان میدکھان تشانگما، تشودلتاچیسلا یونگین۔

11نگا ما گیوگسپا یونگین؛ کھیوجاگونّی تاج پو سوجیگیانگ کوگستے کھیر مینیانچیسلا رانگی ایمان بو ثانٹے زومستے بورشیگ۔ 12گیالکھا تھوبکھانگون خُدے بیت المقدِس سی نانّگا کا ژوگس گیورین، یانگ کھونگون تینانگنے مانے بینگستے چھا میگوس۔ نگے خُدے تشان یانگ خُدے گیالسا، یروشالیم سومے مینگبو تیگونّیکا ڈین، کا بو نامکھانے نگے خُدانے بابسشیس اینوگ۔ نگے کھونگّونّیکا نگارانگی مینگ سومابوانگ ڈین۔ 13نامچھوگ یودکھانگونّی نیونشیگ، خُدے رُوح بوے عبادت خانہ گونلا مولکھانگون نیونشیگ۔

لودیکیہ پے عبادت خانہ لا جُولون۔

14ای ایگیبو لودیکیہ پے عبادت خانہے فرشتا ڈیس۔

ای لونبو نگا امین زیرکھان، یانگنا خُدے وعدہ گون ڈوبچوگکھانّی چھوگسنے این۔ نگا نی خُدے ایمان چان تانگ ٹانگپو گواہ بو این، یانگ نگا گیُودتے خُدے چیتشانگما چوا زادتے این۔ 15نگا کھیوجے لاسگونّی سکور گیوسیود، رُوحانی تھوگنے کھیوجاگون تشانتے یا ٹانگمو میدوگ۔ نگے کھیوجاگون تشانتے یا ٹانگمو چیگ چیگ پو اینچیسّی دودپا چواد۔ 16کھیوجاگون مالامولے اینچیسپوے (تشانتے یا ٹانگمو میدکھان) نگے کھیوجاگون نگارانگی کھانے سکیوگاین۔ 17کھیوجے زیرّانوگ، ”نگا چھوگپو این، نگے نور مانگپو ساگستے یود پاسانگ، نگا چانگ گھوسدوم مید، “ اِین نانگ کھیوجاگون ناگسچان ناسلوگی نانّگا، دِیگپا ریگ، جارا تانگ، لجیرنیال اینکھانبو گیُوس میدپا اینوگ۔ 18نگے کھیوجاگونلا کھادا تانّگاد، خُدے سکوندونلا کھیوجاگون لدینبا چھوگپو گیورچیسّی پھیا نگے کانے میے نانّگا لاگمو چوکھانّی سیرپو نیوس۔ رانگ لجیرنیالّا لوستے ٹھیلبا میچھاچیسّی پھیا، شان چانّی راس کارپو گونچیسلا یانگ تھونگ تھوبچیسّی پھیا میگی نانّگا لوگچیسّی سمانبو نگے کانے نیوسشیگ۔

19نگے یاشا چوکھانگونلا کھاسکییستے سکیونّگاد۔ تینّابویپھیا کھیوجاگونّی دِیگپاگونلا سنینگی تھیلنے گیودپا چوشیگ۔ 20ستوسشیگ، نگا گھویکا دُوگستے گھو ردونگین یود۔ کالتیس نگے سکاد تشورتے سوجیگی گھو پھینا، نگا نانگکوگا یونگستے کھو نیامپو زاچیس زین یانگ کھو نگا نیامپو۔

21گیالکھا تھوبکھانگونلا نگارانگ نیامپو نگے ٹھیسّیکا دوگچیسّی سیوا تانگین، کازوگی نگا گیالکھا تھوبتے نگے یابّی ژوگسٹھیسّیکا کھونگ نیامپو دُوگستے یود۔ 22نامچھوگ یودکھانگونّی نیونشیگ، خُدے رُوح بوے عبادت خانہ گونلا مولکھانگون نیونشیگ۔

Currently Selected:

یونگچیسچانّی دوس 3: LBJNT

Highlight

Copy

Compare