یونگچیسچانّی دوس 2

اِفسُس سی عبادت خانہ لا جُولون۔

1اِفسُس سی نانّگا یودکھانّی عبادت خانہے فرشتا ایبو ڈیس۔

ای لونبو لاگپا یاسپے نانّگا سکارما ردون کھورتے سیرّی اود ستاگس ردونّی ٹوا ڈولین یودکھانّی چھوگسنے این۔ 2کھیوجے کاگسپوے سکابسلا سونڈوس ثانٹے یانگ سنینگروس نیامپو لاس چوچیسگون نگا گیوسیود۔ کھیوجے می نگانپاگون تھاگ ماتھوبکھانبوانگ، نگا گیوسیود، کاگونّی حضرت عیسیٰ سی رسُول این زیرّاد اِین نانگ مانوگ۔ کھیوجے ستاگچاد چوستے تیگون زون اینکھانبو شیستے اینوگ۔ 3کھیوجے نگے پھیا زودپا نیامپو باردو کھورین یانگ نگا پھانگ ماپھانّگا نگے گیابنے ڈولس۔

4اِین نانگ کھیوجاگونّی نگا گوما تسوگسّی چامسپا میچوچیسّی پھیا نگے کھیوجواگونّی گیابگالّا سکیون کالّاد۔ 5کھیوجاگون ما تھونپونے بودتے اینکھانبو ایدتو چوس۔ گیودپا چوسشیگ، یانگ سنگونما تسوگسلا لاسگون چوشیگ۔ کالتیس گیودپا ماچونا، نگا یونگستے کھیوجاگونّی ود ستاگس پو عبادت خانہے ٹوے ناسّے کانے تھیناین۔ 6اِین نانگ کھیوجاگونّی نِیکُلس پاگونّی لاس نگانپاگونلا ناپھراد چوروگ، نگیانگ تیبوا ناپھراد چواد، تے لاسپوا ستودپا تھوبچیسّی اوسپا اینوگ۔

7نامچوگ یودکھانگونّی نیونشیگ۔ خُدے رُوح بوے عبادت خانہ گونلا مولکھانگون نیونشیگ۔ گیالکھا تھوبکھانگونلا خُدے تشاسّی نانّگا سکیکھانّی، ثوگی لچانگمے شینگتوگ زاچیسلا تھوبتانگ نگے تانگین۔

سمیرنا عبادت خانہ لا جُولون۔

8ای ایگیبو سمیرنے نانّگا یودکھان عبادت خانہے فرشتا ڈیس۔

ای لونبو ٹانگپو تانگ ستینگجوگ اینکھان یانگ شیتے میدپین اِین نانگ تا داگسا سونپو یودکھانبوے چھوگسنے این۔ 9کھیوجاگونلا ردوگنگال تانگ ردوگپو یودکھانبو نگا گیوسیود، اِین نانگ رُوحانی تھوگنے کھیوجاگون چھوگپو دوگ۔ کھورانگّونلا یہُودی پا زیرکھانگونّی، کھیوجاگونّی سچودپے سکورلا نگانپا زیرکھانبوانگ نگا گیوسیود۔ کھونگون خُدے مانپا، شیطانی عبادت خانہ اینوگ۔ 10کھیوجاگونلا ردوگنگال تھونگچیسچانبوا ماجیگسشیگ۔ نگے زیرّاد، ردودّی گوبے کھیوجاگونّی ایمان ستاگچاد چوچیسّی پھیا کھیوجا تسونکھانگی نانّگا کاگاین، یانگ کھیوجا، جاگما رچُو تشوگپا ناگس ستانین۔ شیچیس یودنانگ کالتیس کھیوجاگون ایمانی نانّگا ستانپو دوگنا، نگے کھیوجاگونلا تھامیدپے میتشیے تاج پو تانگین۔

11نامچھوگ یودکھانگونّی نیونشیگ، خُدے رُوح بوے عبادت خانہ گونلا مولکھانبو نیونشیگ۔ گیالکھا تھوبکھانگونلا شیچیس نیسپا زیرکھانّی تھامیدپے چھادپا پھوگچیسّی تھونّگومس مییونگ۔

پیرگامومّی عبادت خانہ لا جُولون۔

12ای ایگیبو پیرگامومّی عبادت خانہے فرشتا ڈیس۔

ای لونبو، کھا نییسچانّی رایَ نونپو اینکھانبوے چھوگسنے این۔ 13کھیوجا دُوگستے یودسے ناسّا شیطانی ٹھیسّی ساکیاد اینکھانبو نگا گیوسیود۔ شیطانی وانگثولکھان کھیوجے گیالسے نانّگا نگے ایمان چانّی گواہ انتیپاس سادتیانگ، کھیوجاگونّی نگیکا ایمان یودکھانبو پھانگ ماپھانگس۔

14اِین نانگ نگا کھیوجے گیابگالّا سکیون کالچیس کھاچیگ یود۔ کھیوجے، پیغمبر بَلعامی لابجا تانگکھان ٹوپا کھاچیگی گیابگال چوا میروگ۔ بَلعامی گیالپو بالاگّا بنی اِسرائیل پاگونلا سکونڈا چھودپا پھولکھانّی زانگون زاچیس تانگ لوسڈیل نگانپا چوچوگستے دِیگپے نانّگا گیل چوگچیسپو لابس۔ 15تینّا تسوگسلا، کھیوجاگونّی ٹوا نِیکُلس پاگونّی لابکھانّی لام نگانپیکا ڈولکھان ریگّانگ یودتے اینوگ۔ 16گیودپا چوسشیگ، تے مانّا نگا گیوگسپا کھیوجاگونّیکا یونگستے نگے کھے نانگنے بینگکھانّی رایَ نیامپو تیگونّی گیابگالّا نولاین۔

17نامچھوگ یودکھانگونّی نیونشیگ، خُدے رُوح بوے عبادت خانہ گونلا مولکھانگون نیونشیگ۔ گیالکھا تھوبکھانگونلا نگے سانگوے تاگی تانگ مینگ سوما سکوسکھانّی ردوا کارپو تانگین، تینّا ردوا تھوبکھانبوا مانپا یانگ سوانگ تے مینگبو میشیس۔

تھواتِیرہ عبادت خانہ لا جُولون۔

18ای ایگیبو تھواتِیرہ عبادت خانہے فرشتا ڈیس۔

ای لونبو، خُدےبوژا کابوے میگون میلجاب ژوگس یانگ کانگپاگون، لاگلاگ راگان ژوگس یودکھانبوے چھوگسنے این۔ 19کھیوجاگونّی چیسپا، ایمان، جابستوگ چوچیس، یانگ سنینگروس نیامپو لاس چوکھانگون نگا گیوسیود، کاگون کھیوجاگونّی داگسا سنگونّی سانگ مانّگا چوین یودتے اینوگ۔

20اِین نانگ نگا کھیوجاگونّی گیابگالّا سکیون کالچیس ریگّانگ یود۔ کھیوجاگونّی پیغمبر این زیرکھانّی بومو ییزیبیلّی گیابگال چوا میروگ۔ کھورانگی لابجا گیُودتے، کھوے نگے ژابستوگپاگونلا لوسڈیل نگانپا چوچیس تانگ سکونڈا چھودپا پھولکھانگون زاچیس لابستے، دِیگپے چھوگسلا ٹھیدتے کھیردوگ۔ 21نگے تے بوموبوا گیودپا چوچیسّی سکابس تانگسپین، اِین نانگ کھوا گیودپا چونیین میدوگپین۔ 22تینّابویپھیا نگے تے بوموبوا زُومو یونگچوگاین، یانگ کالتیس تے بومو نیامپو لوسڈیل چوکھانگونّی گیودپا ماچونا، کھونگونانگ ثانٹے ناگھسباردو تھونگین ۔ 23نگے تے بوموے لوبٹوگس گونلا چھادپا تانگستے شیچوگاین۔ تینے نگا، سنینگ تانگ سامبا گُونلا ستاگچاد چوکھان یانگ تشانگمالا رانگرانگی لاسّی نانگجین ڈاسبو تانگکھان اینکھانبو عبادت خانہ گونّی ہاگو تھوبین۔ 24اِین نانگ تھواتِیرہ عبادت خانہے نانّگا ییزیبیلّی لابجاگونّی لامیکا ماڈولکھان یانگ، شیطانی سانگوے لابجا این زیرکھانّی تھونّگومس ماچھا لوستے یودکھانگونلا نگے ای سانگ مانّگا چوچیسلا زیرّامید، 25کا بو نگا یونگیونگ تشوگپا نگیکا ایمان ستانپو بور۔

26ستینگجوگ تشوگپا نگے لابجا کھانیانکھانگونلا گیالکھا تھوبین۔ نگے تیگونلا میرگیود تشانگمیکا وانگچھا تانگین۔

27”تیگونّی لچاگسّی بیرگا نیامپو وانگثولتے

دزاما تسوگسلا تومپاتومپے نانّگا چاگاین“#2‏:27 زابور شوقبُوئ 2‏۔ 9

28کھونگونلا تینّا تسوگسّی وانگچھا تھوبین کازوگی نگا، نگارانگی یابّی کانے تھوبتے این۔ نگے تیگونلا ناملانگسّی سکارمانگ تانگین۔ 29نامچھوگ یودکھانگونّی نیونشیگ، خُدے رُوح بوے عبادت خانہ گونلا مولکھانگون نیونشیگ۔

Currently Selected:

یونگچیسچانّی دوس 2: LBJNT

Highlight

Copy

Compare