چھاگلاسگون 21

حضرت پولُس یروشالیمّا سکیودس۔

1اِفسُس پے اُسکیونگونلا ستینگجوگی سلام زیرتے نگاجا ٹُھوزینگی نانّگا کوس (زیربی جزیرہ) لا سونگپین۔ ستینگماجاگپو رُدس (زیربی جزیرہ) لا لیب، یانگ تے ستینگنے پترؔہ ڈونگکھیرلا۔ 2تیرو نگاجا گُونلا پھونیشیا یولجونگسلا چھاکھانّی ٹُھوزینگ جیگ تھوبپا نگاجا تینّگا جونتے سونگپین۔ 3ٹُھوزینگی کانے نگاجے کُپُرؔس تھونگ یانگ نگاجا تے تشولینگ یوما چھوگسلا بورتے سیرییا چھوگسلا سونگپین۔ صُور گیالسا چالاگ پھابگوشیس یودپا ٹُھوزینگبو تیرو بورس۔ 4نگاجانگ ٹُھوزینگنے بابستے ایمان چانگون تسالپا تھوبتے لوبٹوگون نیامپو جاگپو ردون دوگسپین۔ ہلژخمہ رُوح گیُودتے کھونگونی حضرت پولُس لا یروشالیمّا میسکیودچیسلا جُووا پھولس۔ 5جاگما ردونّی ستینگنے نگاجا ٹُھوزینگا جونا چھاچیگ، ناما تانگ ٹھوگو تھیستے عبادت خانہ گانگپو گیالسانے بینگتے نگاجا لامچوگالا گیاتشوے تھاما تشوگپا یونگس۔ تیکا نگاجا تشانگمے پِیکدونگ ژُوگستے دُعا چوسپین۔ 6کھونگونلا ستینگجوگی سلام جوستے نگاجا گُون ٹُھوزینگا جونس، یانگ کھونگون رانگرانگی کھانگپا لوگستے سونگ۔

7صُور نے نگاجا پَتُلمِیس گیالسا لیب، تیرو مسیحے فونو گونلا تُھوگا سونگتے کھونگون نیامپو جاگچیگ دُوگسپین۔ 8ستینگماجاگپو تیکانے بینگتے نگاجا گُون قَیصرؔیہ گیالسا لیب، تیرو فِلپُس، گاموےناتسُول شادکھانّی کھانگپا نگاجا دُوگس، کھو یروشالیمّی نانّگا عبادت خانہ لا جابستوگ جُوالا لدامسکھان ردونّی ٹونے چیگ اینپین۔ 9کھوا ناما ماچوکھانّی بومو جی یودپین، کاگونلا لونگستان شادچیسّی کھیود تھوبتے یودپین۔

10نگاجا تیرو دُوگستے جاگ کھاچیگ چھاچیگ، یہُودیہ نے اگبُس زیرکھانّی پیغمبر جیک سکیودس۔ 11نگاجے لدُونلا سکیودتے حضرت پولُسی سکیراگسپو نیامپو کھورانگی کونگلاگون لدامستے لونگستان سالس، ”ہلژخمہ رُوح بوے مولدوگ، یروشالیمّی نانّگا یہُودی پے اُسکیونگونی ای سکیراگسی داگپوبو اِیتسوگسلا لدامستے یہُودی مانکھان گُونی لاگا ستادین۔“

12تیبو تشورّاچیگ، نگاجا تانگ تیرو یودکھانّی میگونّی حضرت پولُس لا جُوجُو یروشالیمّا ماسکیود جُوستے جُووا پھولپین۔ 13اِین نانگ حضرت پولُسی مولس، ”کھیوجا چیا نُگوین، نگے سیمس چھاگچوگاد؟ نگا یروشالیمّی نانّگا حضرت عیسیٰ مسیح مِنتخسی پھیا لچاگتھاگا لدامچیس ماتشاد شیچیسلانگ ڈالڈیگ این۔“ 14نگاجے جُوواگون کھونگی مینیانچیس ہاگواچیگ، نگاجے جُووا پھولچیس پھانگستے زیرس، ”مسیح تھوگ گونگس ڈُوبشیگ۔“

15تے ستینگنے نگاجے بیسّی پھیا ڈالڈیگ چوستے یروشالیم چھوگسلا چھاچیس گوزوگ۔ 16قَیصرؔیہ یودکھانّی لوبٹوگس کھاچیگّانگ نگاجا نیامپو یونگس۔ کھونگونی نگاجا کُپُرؔس پا مَنَاسوؔن نی کھانگپا دوگالا کھیرس، کھو توس مانگپوے سنگونلا حضرت عیسیٰ سی لوبٹوگس گیورتے اینپین۔

حضرت پولُس یروشالیمّا سکیودس۔

17نگاجا گُون یروشالیمّا لیبّاچیگ، مسیحاپے فونو گونّی ما تھادپو نیامپو گاسُوس جُوس۔ 18تھورے زوگپو حضرت پولُس تانگ نگاجا گُون یعقُوبؔ ا تُھوگا سونگپین، تیرو شریعتی اُسکیونگ تشانگما دزومستے دوگپین۔ 19حضرت پولُسی کھونگ تشانگمالا سلام جُوستے خُدے کھونگ گیُودتے یہُودی مانکھان گُونی ٹوا چھاگلاس زادکھانگونّی سکور کھونگونلا جیبسال شادّا زادس۔

20تیگون تشورّاچیگ کھونگونی خُدا ستودپا پھولس، تینے حضرت پولُس لا مولس، ”چیسپے فونو ستوسّانگ، یہُودی پا ستونگ مانگپوجیگی ایمان کھیونگس، یانگ کھونگ تشانگمے حضرت مُوسیٰؔ سی شریعت گونلا سنینگی تھیلنے چیسپا چوروگ۔ 21کھونگونی، نیرانگی یہُودی مانکھان گُونی ٹوا دوگکھانّی یہُودی پا تشانگمالا حضرت مُوسیٰؔ سی شریعت گون میثونگچیس یانگ بُوژا گُونلا لقپہ ہلژخمہ میچوچیس یا یہُودی پے لوگثولگون کھا مینیانچیس گُون لابدوگ زیرتے تشورتوگ۔ 22تا نگاتانگونّی چی چوین؟ نیرانگ یرو سکیودکھانبو کھونگونی تشورچیس تانتان اینوگ۔ 23نگاجے سامّاراگ نیرانگی اِیبو چوگوس۔ ایکا نگاجا نیامپو خُدے لدُونلا دامچھا چوکھانّی می جی یود۔ 24نیرانگ کھونگون نیامپو بیت المقدِس لا سکیودتے ژانگما چوچیسّی لوگثولّی نانّگا تھوس، یانگ گوریل چوستے ثا ڈاگسچیسّی رین رانگ ماتشاد کھونگونی پھیانگ شول۔ تینے نیرانگی ر گیابگالّا زیرکھانگون لدینبا مانکھان یانگ نیرانگی یہُودی پے شریعت گُون ثونگدوگ زیرتے تشانگمالا گیوسچھین۔ 25ایمان چانّی یہُودی مانکھان گُونلا نگاجے تھاگچادّی سکورلا ایگے ڈِیستے کالپین۔ تے ایگیبوے نانّگا سکونڈاگونلا چھودپا پھولکھانگون، ٹھاق یودکھان یا سکے کِیگستے سادکھانّی شا زا ماگوس، یانگ لوسڈیل نگانپاگونّے تھاگرینگ دُوگوس زیرتے ڈِیستے یود۔“

26ستینگماجاگا حضرت پولُس تانگ تے میگونّی لوگثول نانگجینلا ژانگما چوستے ستینگنے حضرت پولُس کھونگون نیامپو بیت المقدِس سی نانّگا سکیودتے ژانگما چوچیس تشارتے کھونگونی رانگرانگی پھیا چھودپا پھول نیانچیسّی جاگپو اِمام گُونلا شادّا زادس۔

حضرت پولُس زومس۔

27جاگ ردون تشانگکیس یود زانے حضرت پولُس بیت المقدِس لا تھونگکھانّی آسیہ پے یہُودی پا کھاچیگی میمانگسّی نانّگا ہیلینگس پھینگستے کھونگ زومس۔ 28تے اسیاپاگونّی کُوچو تانگستے زیرس، ”بنی اِسرائیل پاگون نگاجا روگس چوس۔ اینّا موبوے کارونگسا تشانگمالا نگاتانگون، نگاتانگی شریعت تانگ ای بیت المقدِس سی گیابگالّا لابجا تانگچیس، ماتشاد یہُودی مانکھان گُون نگاتانگی بیت المقدِس لا کھیونگستے ای ہلژخمہ ناسّابو تشیتو چوس۔“ 29(کھونگونی سنگونلا گیالسے نانّگا حضرت پولُس اِفسُس پا ترُفِمُس یہُودی مانکھان بُو نیامپو تھونگتے، کھوے تانتان ای میبو بیت المقدِس لا کھیرتے یودڈو سام پاسانگ تیزوگ زیرس)۔

30تینے گیالسا گانگپوے نانّگا ہیلینگس جوگس، یانگ میتشانگما گیُوگستے یونگستے دزومس۔ کھونگونی حضرت پولُس زومستے بیت المقدِس سی نانگنے ٹُودین پھیلوگا کھیرتے، تینّامالّا بیت المقدِس سی گھوگون چوگس۔ 31کھونگونی حضرت پولُس سادچیس چوین یود زانے، رومی ماگستونگی سپونبوا یروشالیم گانگپوے نانّگا ہیلینگس بینگتوگ زیرتے تشور۔ 32کھو تینّامالّا ماگمی تانگ گیاسپون گُون ٹھیدتے میتشوگس یودسا گیُوگستے سونگ۔ تے ماگستونگی سپونبو تانگ ماگمیگون یونّگا تھونگتے، میتشوگسّی حضرت پولُس لا ردونگچیس بان چوس۔

33ماگستونگی سپونبو حضرت پولُسی لدُونلا یونگس، یانگ کھونگ زومستے لچاگتھاگ نیس نیامپو لدامچیسلا کا تانگس۔ یانگ کھوے ای میبو سو اینوگ چی سکیون چوستوگ؟ زیرتے ٹیس۔ 34میتشوگسّی نانگنے کھاچیگی سپیرا چیگ یانگ کھاچیگی یانگسپیرا چیگ زیرس۔ ہیلینگسّی جاستے ماگستونگی سپونبوا لدینبا گانگپو ہاگو ماتھوبپا، حضرت پولُس ماگمی کیلے نانّگا کھیر زیرتے کا تانگس۔ 35حضرت پولُس ثاسکیکا لیبّاچیگ، میتشوگسلا رثو ثانٹے یونّگا تھونگتے ماگمیگونّی کھونگ کھُورتے کھیرس۔ 36حضرت پولُسی گیابنے یونگسکھانّی میمانگسّی کُوچو تانگین، ”کھو سود، کھو سود“ زیرس۔

حضرت پولُسی میتشوگسلا سپیرا سالس۔

37حضرت پولُس کیلے نانگکوگا کھیرین یود زانے کھونگی ماگستونگی سپونبوا مولس، ”نگے نیرانّگا سپیراجیگ زیرنا ڈیگّا؟“

ماگستونگی سپونبوے حضرت پولُس لا ٹیس، ”کھیورانّگا یُونانی سکاد شیسّادّا؟ 38توسبانشیگی سنگونلا رومی گیالپوا نگولوگ چوستے ستانشیگ ستونگ جی ریستونّگا ٹھیدتے کھیرکھانّی مصر پابو کھورانگ مانّا؟“

39حضرت پولُسی مولس، ”مان، نگا یہُودی پا کِلِکیہ پے یولجونگسّی ما کھاگچان گیالسا تَرسُس سی یولمی جیگ این۔ جوجو نگا ای میگونلا سپیرا زیرچیسّی گونگسپا سال۔“

40ماگسپونّے گونگسپا تھوبستے حضرت پولُس ثاسکیکا لانگستے میتشوگسلا چوبچادچیسلا لاگپا نیامپو ستاگس چوس۔ میتشوگس چوبچادّاچیگ، کھونگی عِبرانی سکادّی نانّگا مولچیس گوزوگ۔

Currently Selected:

چھاگلاسگون 21: LBJNT

Highlight

Copy