چھاگلاسگون 20

حضرت پولُس مکدنیہ، ڈیس تانگ تروآسلا سکیودس۔

1ہیلینگس تشانگما میدکھان چھاچیگ، حضرت پولُسی لوبٹوگسگون بودّا زادتے کھونگونلا سپوسپا سالس، یانگ ستینگجوگی سلام مولتے کھونگ مکدنیہ سکیودس۔ 2بیسّی توسلا کھونگ لیبسّے ناسّاگونّی نانّگا ایمان چانگونلا سپوسپا سالین سکیودس، یُونانی یولجونگسلا لیبستے ستینگنے 3تیرو کھونگ لزاوا سوم ژوگس۔ کھونگ ٹُھوزینگی نانّگا سیرییا سکیودچیسّی ڈالڈیگ چوا زانے، یہُودی پاگونّی کھونگ سادچیسّی جوسنگان لدینگسکھانبو تشورپا، کھونگی لوگستے مکدنیہ گیُودتے چھاچیسلا تھاگچادس۔ 4کھونگ نیامپو بیریہانے پیرّوی بُوژا سوپاتیر، تھسلُنیکے نے ارِسترخُس تانگ سیکوندوس، دِربے نے گیُس، آسیہ یولجونگسنے تُخِکُس تانگ ترُفِمُس یانگ تِیمُتھیُس چھاچیس یودپین۔ 5کھونگون حضرت پولُسی سانگ سنگونلا سونگتے تروآس گیالسے نانّگا نگاجے پھیا ثونگستے دُوگس۔ 6سکیور میدکھانّی تاگی توسچھینّی ستینگنے نگاجا گُون فِلپّی نے ٹُھوزینگا ژونتے سونگپین، یانگ جاگ ثن٘ے ستینگنے تروآس گیالسا لیبتے جانما ٹوپاگون تھوگ، نگاجا تیرو جاگپو ردون دوگسپین۔

حضرت پولُسی کھیوگتونگجیگ سونتیا لانّگا زادس۔

7زانیمے جاگّا، مسیح دونتانگ زاچیسلا نگاجا تیرو یودکھانّی عبادت خانہ نیامپو دزومس، ستینگماجاگپو حضرت پولُس چھاچیس اینپا کھونگ تشانپھید تشوگپا چھوس شادین ژوگس۔ 8ستانگتھوگّا نگاجا گُون دزومستے یودکھانّی نانگبوے نانّگا اوت مانگپو توگستے یودپین۔ 9کھونگونی ٹوا ایوتیکوس زیرکھانّی کھیوگتونگجیگ کارکھونگی کا دُوگستے یودپین، حضرت پولُسی گورگور تشوگپا ڈولدور زادچیسپوے کھوا نیید لچینتے یونگس، یانگ تھوگتشاد سومنے تُھورلا بودتے شی۔ 10حضرت پولُس یوگا سکیودتے کھیوگتونگبوے زوگسپوا ٹھیلتے، ”جیگ ماجیگشیگ، کھو سونتے اینوگ“ مولس۔ 11تینے حضرت پولُس کھیتھوگّا لوگستے سکیودتے دونکییر چاگتے تشانگما دزومستے زوس، یانگ ناملانگس تشوگپا ڈولدور زادس، تینے کھونگ تیکانے سکیودس۔ 12کھونگونی تے بُوژا بُو سونتیا کھوے کھانگپا کھیرنیانپا کھونگونلا جیدے تھوب۔

حضرت پولُسی اِفسُس پے اُسکیونگونلا ستینگجوگی سلام جُوس۔

13حضرت پولُس اسُس ڈونگکھیرلا جابڈُولّا سکیودچیس یانگ نگاجا تیرو ٹُھوزینگی نانّگا سونگتے کھونگ نیامپو دزومچیسلا کھونگی تھابسلدینگس۔ 14اسُسلا کھونگ نگاجا گُون نیامپو تھوگّاچیگ، نگاجے کھونگ ٹُھوزینگا سکیونتے میتیلینے ڈونگکھیرلا سونگپین۔ 15تھوریزوگپو تیکانے ٹُھوزینگا ژونتے نگاجا گُون کیوس تشولینّگا لیب، یانگ ستینگماجاگپو ساموس تشولینّگا لیب۔ تے سانگ ستینگماجاگپو نگاجا گُون میلیتُس ڈونگکھیرلا لیب۔ 16حضرت پولُس اِفسُس سی نانّگا دوگّا مازادس، چیازیرنا آسیہ نانّگا جُوگستے توس گودلا ماتانّگا تسامتھوب نیانّانگ یروشالیمّا گیوگسپا سکیودچیسّی دودپا زادس۔ کالتیس نیانّا پینتیکوسّی توسچھینّی جاگتشاگپا تیرو لیبچیسلا تھادّادپین۔

17میلیتُسنے حضرت پولُسی اِفسُس سی عبادت خانہے اُسکیونگونلا کھونّگا تھوگّالا یونگ مولتے لون کالس۔ 18اُسکیونگون لیبّاچیگ، حضرت پولُسی کھونگونلا مولس، ”آسیہ نانّگا گومارانگ لیبّی جاگنے داگسا تشوگپا نگے کھیوجاگون نیامپو میتشے کازوگشیگّا پھودس، کھیوجاگونلا گیوس اینّوگ۔ 19نگا یہُودی پاگونّی جوسنگان مانگپوے دونگلین چوگوسنانگ، نگے نگارانگی میتشیے نانّگا ما نیامشونگ تانگ چھیما نیامپو مسیح جابستوگ جوسپین۔ 20کھیوجے کھانگپے نانّگا اینڈو یا پھیلوگا میمانگسّی لدُونلا کھیوجاگونلا پھانتھوگسچانّی لابجا تانگچیسلا نگے تھےژومس مانے ماچوسپین۔ 21خُدے سکوندونلا مُعافی زومستے نگاتانگی حضرت عیسیٰ مسیح یکا ایمان کھیونگوشیسّی گواہ نگے یہُودی پا تانگ یُونانی گُونلا تانگسپین۔“

22”تا ہلژخمہ رُوح بوے نگے سیمس ٹھیدتے کھیرّا زادچیسپوے نگا یروشالیمّا چھاگوس۔ نگا گیوسمید تیرو نگا نیامپو چی چھین۔ 23نگا گیوسیود، ہلژخمہ رُوح بوے گیالسا تشانگمے نانّگا نگے پھیا تسون تانگ ردوگنگال گُون ثونگستے یودکھانبوے سپانگپودّا زادّاد۔ 24کالتیس خُدے شزدے سکورّی گاموےناتسُول شادچیسّی کھاگ کا بو حضرت عیسیٰ مسیح نگا ستادا زادس، تیبو ڈوبچوگ ماتھوبنا نگے ثوگپو نگے پھیا رینمید این۔“

25”داگسا تشوگپا کھیوجاگونلا نگے خُدے گیالثیدّی سکورلا شادپین، اِین نانگ نگا گیوسیود تانیپھارلا کھیوجے ٹونے سوجیگیانگ نگا یانگسکیار مانے میتُھونگ۔ 26دیرینگ نگے کھیوجاگونلا زیرّاد، سوجیگ ایمان میدپا شیتے خُدے تھامیدکھانّی چھادپا پھوگنا تیبو نگے سکیون مان، 27چیازیرنا نگے کھیوجاگونلا تھےژومس میدپا خُدے نگاتانگونّی پھیا زادکھانّی تھابسلدینگس تشانگمے سکورلا گواہ تانگسپین۔ 28کھیوجارانگ تانگ خُدے لُوگ تشانگما سکیوبتے بورشیگ، کابویکا کھیوجاگون ہلژخمہ رُوح بوے اُسکیونگا لدامّا زادتے این، مسیح رانگی سکو ٹھاق شالّا زادتے نیوا زادکھانّی عبادت خانہ پوا لُوگ زی تسوگسلا ستاستوگ چوشیگ۔ 29نگا سونگتے ستینگنے کھیوجاگونّی ٹوا نودپا سکیالکھانّی شانگکوگون یونگستے عبادت خانہے نانّگا نودپا سکیالچیسپو نگا گیوسیود۔ 30کھیوجارانگی ٹونے خُدے لدینبے لونبو گیورتے زون تانگکھانگون بینگستے مسیح لوبٹوگسگون کھورانگونّی گیابنے ٹھیدتے کھیرچیسّی سونڈوس چوین۔ 31شانگ چوشیگ، کھیوجاگون نیامپو لو سوم یود زانے، تشانّیین میدپا نگے میگچھو نیامپو کھیوجاگونلا خُدے لامی کانے تھاگرینّگا میچھاچیسلا توسگیون سپانگپودکھانبو ایدتو چوشیگ۔“

32”تا نگے خُدے تانگ کھونگی شزدے سکورّی لونبو کھیوجاگونّی لاگا ستادّاد، تے لونبوے کھیوجاگون ایمانی نانّگا لدان چوگّا زادچیس، یانگ ہلژخمہ زادکھان تشانگمے ٹوا کھیوجاگونلا نورسکال سالّا زادنیانین۔ 33جانمے سیر یا مول یا کوسلاگی دودپا نگے ماچوسپین۔ 34نگے رانگی لاگپا بادتے نگارانگ تانگ نگے ٹوپاگونّی گھوسدوم ڈانڈا چوسکھانبو کھیوجا گیوس اینّوگ۔ 35نگے چوکھان تشانگمے نانّگا کھیوجاگونلا سونڈوس نیامپو لاس چوستے نگاتانگونّی نیامشونگّونلا روگس چوگوشیسپو ستانپین۔ نگاتانگونّی حضرت عیسیٰ مسیح مولکھانبو ایدتوا بورشیگ، ’لینچیسّی سانگ تانگچیسپو مانّگا برکت چان این‘۔“

36تے جالتاگون مولتے ستینگنے حضرت پولُسی تشانگما نیامپو پِیکدونگ جُوگستے دُعا جوس۔ 37کھونگ تشانگمے حضرت پولُس لا ٹھیلین پھوگتانگین ستینگجوگی سلام جوین نگوس۔ 38کھونگونی پھیا تشانگمے سانگ تشیرکھا چھینموبو نی حضرت پولُسی تانیپھارلا کھونگونی کھونگ یانگسکیار میتُھونگ مولچیسپو اینپین۔ تینے کھونگ تشانگما ٹُھوزینگ تشوگپا حضرت پولُس س سکیالّا سونگ۔

Currently Selected:

چھاگلاسگون 20: LBJNT

Highlight

Copy