چھاگلاسگون 19

اِفسُس سی نانّگا حضرت پولُس۔

1اُپلّوؔس کرِنتُھس گیالسے نانّگا یود زانے، حضرت پولُس آسیہ یولجونگسّی نانگکوگی لامگون گیُودتے اِفسُس لا لیب، تیرو کھونّگا لوبٹوگس کھاچیگ تھوگ۔ 2حضرت پولُسی کھونگونلا ٹیس، ”کھیوجے ایمان چواچیگ کھیوجیکا ہلژخمہ رُوح بابسّا؟“

کھونگونی لانتانگس، ”نگاجا ماتھوبلے، نگاجا ہلژخمہ رُوح بوے سکورلا تشور کھورانگ ماتشورلے۔“

3تینے حضرت پولُسی ٹیس، ”کھیوجاگونّی کازوگ غوتا شیگ لینپین۔“

کھونگونی لانتانگس، ”یوحنّانی غوتا۔“

4حضرت پولُسی مولس، ”یوحنّانی غوتا سالکھانبو نی گیودپا چوچیسّی پھیا اینوگ، کھونگی میگونلا، کھونگی ستینگنے سکیودچیسچانبویکا ایمان چوچیسلا مولس، کا بو نی حضرت عیسیٰ اینوگ۔“

5تیبو تشورتے کھونگونی حضرت عیسیٰ مسیح مِنتخسی نانّگا غوتا لینس۔ 6حضرت پولُسی کھونگونی گویکا چھاگ بورّاچیگ، کھونگ تشانگمیکا ہلژخمہ رُوح بابس۔ کھونگونی سکاد سوسوے نانّگا سپیرا تانگس یانگ لونگستان شادس۔ 7کھونگونی ٹانگسکا ہالام چوگنییس یودپین۔

8حضرت پولُس یہُودی پے مجلِسی نانّگا سکیودتے ہالام لزاوا سوم، ما ہامپا نیامپو چھوسشادتے خُدے گیالثیدّی سکورلا نیانکھانگونّی ایمان کھیونگنیانچیسّی ڈولدور چوا زادس۔ 9اِین نانگ کھاچیگی سیمس ما سکیونگپو چوستے ایمان کھیونگچیسلا ماتھاد، یانگ میمانگسّی لدُونلا مسیح لامیکا ڈولکھانگونّی سکورلا سپیرا نگانپا مانگپو زیرس۔ تیبویپھیا حضرت پولُس کھونگون بورتے لوبٹوگسگون کھونگرانگ نیامپو ٹھیدتے کھیرس، یانگ لوبجونگ چوسے ناسّا تیرّانّوسّی نانّگا جاگدانگ ڈولدور زادّادپین۔ 10تے ڈولدورّی تشیرکابو ہالام لو نیس تشوگپا ڈولپا، آسیہ یولجونگسّی نانّگا دوگکھانّی یہُودی پا تانگ یُونانی گُونلا مسیح کا تشور۔

11خُدے حضرت پولُس گیُودتے ما معجزہ گون زادّادپین۔ 12سپیرنا حضرت پولُسی چھاگ تھوگکھانّی چھاگپھیس یا کوسلاگ می زُومو یونگکھانگونّی تھوگنا زُومو گیالچیس یانگ ردود جُوگستے یودکھانگون بینگتے چھادپین۔

13ڈونگکھیرنے ڈونگکھیرلا ردود جوگسکھانگون پھینّگالا چھاکھانّی یہُودی پا کھاچیگی حضرت عیسیٰ سی تشان کولتے ردودگون پھینگچیسّی سونڈوس چوستے زیرس، ”حضرت پولُسی چھوس شادکھانّی حضرت عیسیٰ مسیح مِنتخسی نانّگا بینگتے چھاچیسلا نگے کاتانّگاد۔“ 14یہُودی پے اِمام کُنی چھونمو سکیوا زیرکھانّی بُوژا ردونکوے تیزوگ چوادپین۔ 15اِین نانگ جاگشیگ ردود پوے کھونگونلا زیرس، ”نگا حضرت عیسیٰ سی شیسّاد، یانگ حضرت پولُس سانگ، اِین نانگ کھیرانگّون سو این۔“ 16تینے تے ردود ژوگسکھانّی میبو کھونگّونّیکا لچیبس، کھونگونی سانگ وانگچھیا سونگتے کھونگونلا ثانٹے ردونگسپا کھونگون ٹھاق بینگین لجیرنیالّا تے کھانگپانے شور۔

17تے ناتشولبو اِفسُس سی نانّگا یودکھانّی یہُودی پا تانگ یُونانی گُونلا گیوسچھاچیگ، کھونگونی حضرت عیسیٰ مسیح جیگسّی نانّگا، کھونگی ژانلا سیوا ٹاگپو تانگس۔ 18ایمان کھیونگکھانّی می مانگپو یونگستے رانگرانگی لاس نگانپاگون می تشانگمے لدُونلا شادتے گیودپا چوس۔ 19یانگ جادُو چوکھانگونّی رانگی نگانپا جادوی شوقبُو گُون کھیونگستے می تشانگمے لدُونلا میا توگس، تے سپیچھاگونّی رینتشادپو سیسپا، مولّی گیرمو ستونگ نابچو بینگ۔ 20تیبوے جاستے مسیح کا کارونگسا پھیل یانگ ڈاسبو ٹاگپو سمین۔

21تے تشانگما جُونگستے ستینگنے حضرت پولُسی مکدنیہ تانگ اخیہ یول گُون گیُودتے یروشالیمّا چھاچیسلا تھاگچادس، یانگ کھونگی مولس، ”تیرو دُوگستے ستینگنے نگا رومّانگ چھاگوس۔“ 22حضرت پولُسی کھونگی ٹوپا تِیمُتھیُس تانگ اِراستُس گُون مکدنیہ لامچوگس یانگ کھونگرانگ آسیہ نانّگا توسبانشیگ جوگس۔

اِفسُس سی نانّگا ہیلینگس بینگ۔

23تینّا توسلا اِفسُس سی نانّگا مسیح لامیکا ڈولکھانّی گیابگالّا ما ہیلینگس ثانٹے پھینگس۔ 24دیمیترِیُس زیرکھانّی سیرگار کابوے ارتمِس بیت المقدِس سی زوگون مولّا چوستے تسونّگادپین۔ کھوے تشونگبو گیالّا ڈولپا، لاسمی زوپا مانگپوجیگ لاسّی پھیا بورتے یودپین۔ 25کھوے رانگی ٹوپا زوپا تشانگما یانگ تشونگ تانگ ڈیلتے یودکھانّی میگون بودتے زیرس، ”لاسچیدپا ٹوپاگون، ای لاسپو گیُودتے نگاتانّگا یونگو مانگپو یودکھانبو کھیوجاگونلا گیوس اینّوگ۔ 26اِین نانگ کھیوجاگونّی تھونگین یانگ تشورین اینوگ، تے می حضرت پولُسی اِفسُس ماتشاد آسیہ یول گانگپوے نانّگا می لاگپانے چوسکھانّی سکونڈاگون لدینبے خُدے مانوگ زیرتے می مانگپوا کھوے شادکھانبویکا ایمان کھیونگچوگس۔“ 27کھوے تارُوانگ زیرس ”میگونّی نگاتانگی زولاسپوا کُوسپا چوچیسپو پھانگچیسّی جیگسپا ماتشاد، جیگسپو ارتمِسّی لاموے بیت المقدِس سی سکورلانگ سپیرا سوگپوگون زیرین۔ یانگ آسیہ مانپا، دُنیا گانگپوے نانّگا ای لاموبوا چولکھانگونّیانگ کھونّگا خُدے تسوگسلا سیوا می تانگ۔“

28تے تشانگما تشورّاچیگ زولاسپاگونلا ماثانٹے ثو یونگستے کُوچو تانگین زیرس، ”اِفسُس پے لامو ارتمِس ما جیگسپو این۔“ 29تھونگین تھونگین تانگ گیالسا گانگپوے نانّگا ناسلوگ سوگپو سونگ، میگونّی مکدنیہ پا حضرت پولُسی بیسّی ٹوپا گیُس تانگ ارِسترخُس زومستے ٹُودین میگون دزومسّے ناسّا کھیرس۔ 30حضرت پولُس سانگ میتشوگسّی ٹوا سکیودنیین یودپین، اِین نانگ لوبٹوگسگونّی گاگستے سکیود ماچوگس۔ 31یانگ حضرت پولُسی دزاو، تے گیالکھاگی سپونبو کھاچیگیانگ کھونّگا میتشوگس دزومسّا ماسکیود زیرتے جُووا پھولین لون کالس۔

32میتشوگسّی نانّگا ہیلینگس چھینمو بینگ، می سوسوے سپیرا سوسو زیرین کُوچو تانّگادپین، یانگ مانگچھیابوا کھونگون تیرو چیپھیا یونگستے اینکھانبوانگ گیُوس میدپین۔ 33تے ناسلوگپو ہاگوچوگچیسلا یہُودی پاگونّی اسکندریہ میتشوگسّی لدُونلا ریلس۔ کھوے میگونلا چوبچادچیسلا ستاگس چوستے سپیرا زیرچیسّی سونڈوس چوس۔ 34اِین نانگ میگونّی کھو یہُودی پا، ارتمِس لا ماسیکھان اینکھانبو نگوشیسّاچیگ، می تشانگمے چیگ سونگتے چھوتشود نیس زام کُوچو تانگین زیرس، ”اِفسُس پے لامو ارتمِس جیگسپو این۔“

35اِین نانگ گیالسے سپونبوبوے، میتشوگسپوا چوبچادچوگنیان یانگ زیرس، ”اِفسُس پاگون، اِفسُس سی گیالسا، لامو ارتمِسّی بیت المقدِس تانگ نامکھانے بابسکھانّی کھونگی سکونڈا ثونگکھان اینکھانبو تشانگمالا گیوس اینّوگ۔ 36تے دینباگونلا سوجیگیانگ گیابگال چومینیانچیسپوے، کھیوجا تشانگما چوبچادتے دوگشیگ یانگ رینگیوگسّی نانّگا سامبا میدکھانّی لاس ماچوشیگ۔ 37کھیوجے زومستے ایکا کھیونگکھانگونّی نگاتی لاموا تتلوکما چوستوگ یا کھونگی بیت المقدِس ما چومستوگ۔“

38”کالتیس سیرگار دیمیترِیُس تانگ کھوے ٹوپا زوپاگونّی کھونگونی شریعت چاگستوگ سامّادنا، ٹھیمسکھونگ پھیستے شخ چوکان گُون یودتے اینوگ، تیرو کھونگونی گیابگالّا شاگس تانگ نیانچیس اینوگ۔ 39کالتیس کھیوجاگونلا کھونگونی گیابگالّا جانیانگ سکیون رجود یودنا تیگونّانگ تے شخ چوکان گونّی تھاگچاد نیانچیس اینوگ۔ 40دیرینگ جونگکھان تشانگمے ستینگنے رومپے وانگثولپے نگاتانّگا ہیلینگس بینگچوگچیسلا نیادگال کالچیسّی جیگسپا اینوگ۔ ای ہیلینگس پھینگچیسپوے پھیا چانگ گیونتشان گیالّاجیگ میدپا نگاتانگی چی لانتانگین۔“ 41تیزوگ زیرتے ستینگنے کھوے تے میتشوگسپو شولچوگس۔

Currently Selected:

چھاگلاسگون 19: LBJNT

Highlight

Copy